ބޮލީވުޑް ލަވަކިޔުންތެރިޔާ ކޭކޭ ހާޓްއެޓޭކެއް ޖެހި މަރުވެއްޖެ

ބޮލީވުޑްގެ މަޝްހޫރު ލަވަކިޔުންތެރިޔާ ކްރިޝްނަކުމާރް ކުންނަތު (ކޭކޭ) ކުއްލިއަކަށް މަރުވެއްޖެއެވެ.

އޭނާ މަރުވެފައިވަނީ އަންގާރަ ދުވަހު ރޭ ކޮލްކައްތާގައި އޮތް ކޮންސަޓެއް ނިންމާފައި ހޮޓަލަށް ދިޔަ ފަހުން ހާޓްއެޓޭކެއް ޖެހިގެންނެވެ. އޭނާ މަރުވި އިރު އުމުރުން 53 އަހަރެވެ.

އިންޑިއާގެ ނޫސްތަކުގައި ރިޕޯޓްކޮށްފައިވާ ގޮތުގައި އޭނާ ކޮންސަޓް ނިންމާފައި ހޮޓަލަށް ދިޔަ ފަހުން ހާލު ދެރަވެގެން ހޮސްޕިޓަލަށް ގެންދިޔައެވެ. ނަމަވެސް ހޮސްޕިޓަލަށް ގެންދިޔަ އިރުވެސް މަރުވެފައިވާ ކަމަށް ޑޮކްޓަރު ބުނެފައިވާ ކަމަށް ރިޕޯޓް ތައްބުނެއެވެ.

ކޭކޭ ވަނީ އޭނާގެ ފަހު ކޮންސަޓުގައި ގާތްގަޑަކަށް އެއްގަޑިއިރު ވަންދެން ލަވަ ކިޔާފައެވެ. އޭނާގެ ހާލު ސީރިއަސް ވީ އެހާ ގިނައިރު ލަވަކިޔަން ހުރުމުން ކަމަށް ވެސް ބައެއް މީހުން ލަފާ ކުރެއެވެ.

ކޭކޭ އަކީ އިންޑިއާގެ ގިނަ އަދަދެެއްގެ ބަހުރުވަތަކުން ލަވަ ކިޔަމުން އައި ލަވަކިޔުންތެރިއެކެވެ. އެތޮުން، ހިންދީ، ތެލުގޫ، ތަމިލް، ކަންނާޑާ، މަލްޔާލަމް، މަރާޓީ އަދި ބަންގާލީ ބަހުރުވައިން އޭނާ ލަވަކިޔާފައިވެއެވެ.

ކޭކޭގެ އެންމެ މަޝްހޫރު ލަވަތަކުގެ ތެރޭގައި "އޯމް ޝާންތި އޯމް" ގެ "އާކޯމެ ތެރީ" އާއި "ގުންޑޭ"ގެ "ތޫނެ މާރި އެންޓްރިޔާން" އާއި "ތުމް މިލޭ" ގެ "ދިލް އިބާދަތު" ހިމެނެއެވެ.