ގޮވަރދަން އަސްރާނީ، ގިނަ ބަޔަކަށް ހަމައެކަނި އަސްރާނީގެ ނަމުން މަޝްހޫރު އިންޑިއާގެ މަޝްހޫރު ކޮމީޑިއަން އާސްރާނީ މަރުވެއްޖެ އެވެ. އޭނާގެ އުމުރަކީ 84 އަހަރެވެ.

އަސްރާނީ މަރުވި ޚަބަރު ހާމަ ކުރީ އޭނާގެ މެނޭޖަރު ބާބޫ ބާއީ ތިބާ އެވެ. ތިބާ ބުނި ގޮތުގައި އަސްރާނީ މަރުވީ އޮކްޓޯބަރު 20 ވަނަ ދުވަހުގެ މުންބާއީ ސިޓީގެ ހޮސްޕިޓަލެއްގައެވެ. އޭނާ ހޮސްޕިޓަލަށް އެޑްމިޓްކޮށްފައިވަނީ 4 ދުވަސް ކުރިން ނޭވާލުމުގެ ދަތިކަން ދިމާވުމާ ގުޅިގެންނެވެ.

އަސްރާނީގެ ދިގު މުއްދަތުގެ ކެރިއަރުގައި ހިންދީ އަދި ގުޖަރާތީ ސިނެމާގައި 50 ށް ވުރެ ގިނަ އަހަރު ހޭދަކުރިއެވެ. މި މުއްދަތުގެ ތެރޭގައި 400 އަށްވުރެ ގިނަ ހިންދީ އަދި ގުޖުރާތީ ފިލްމުތަކުގައި އޭނާ ފެނިގެން ދިޔައެވެ. އަދި ޚާއްޞަކޮށް ކޮމެޑީގެ ދާއިރާ އިން އޭނާގެ ހުނަރުވެރިކަމަށްޓަކައި ވަރަށް ގިނަ ބައެއްގެ ސަޕޯޓް ހާސިލު ކުރިއެވެ.

އަސްރާނީ އުފަންވީ 1 ޖެނުއަރީ 1941 ގައި އޭރުގެ ބްރިޓިޝް އިންޑިއާގެ ރާޖަސްތާން ސްޓޭޓްގެ ޖައިޕޫރު ސިޓީ ގައެވެ. އަސްރާނީ ނިސްބަތްވީ މެދުފަންތީގެ ޢާއިލާއަކަށެވެ. ކިޔަވަމުން ދިޔައިރު ޖައިޕޫރުގެ އޯލް އިންޑިއާ ރޭޑިއޯގައި އަޑު އަޅާ މީހެއްގެ ގޮތުގައި މަސައްކަތް ކުރިއެވެ. އޭގެފަހުން 1962 ގައި ފިލްމީ ދާއިރާއަށް ވަނުމަށްޓަކައި މުންބާއީ އަށް ބަދަލުވިއެވެ.

އޭނާ ރަސްމީކޮށް ތަމްރީނު ހޯދީ ޕޫނޭ ގެ ފިލްމް އެންޑް ޓެލެވިޜަން އިންސްޓިޓިއުޓް އޮފް އިންޑިއާ (އެފްޓީއައިއައި) އިންނެވެ. އެތަނުން 1966 ގައި ގްރެޖުއޭޓްވިއެވެ. އަދި ޖެހިގެން އައި އަހަރު 1967 ގައި "ހަރޭ ކާންޗް ކީ ޗޫރިޔާން" ނަމަކަށް ކިޔުނު ފިލްމުން ހިންދީ ފިލްމުތަކުގައި ފުރަތަމަ ފަހަރަށް ފެނިގެން ދިޔައެވެ.

އަސްރާނީ އޭނާގެ ކެރިއަރު ފެށީ ސީރިއަސް އަދި ސަޕޯޓިންގ ރޯލްތަކުން ނަމަވެސް، އޭނާގެ ހަޤީޤީ ހުނަރު ފާހަގަކުރެވުނީ ކޮމެޑީ އަދި ހަނދާންނައްތާނުލެވޭ ފަދަ ކެރެކްޓަރު ރޯލްތަކުންނެވެ. އޭނާގެ ފުރަތަމަ ފެނިލުންތަކުގެ ތެރޭގައި "ސަތްޔަކަމް" (1969) އަދި "މޭރޭ އަޕްނޭ" (1971) ހިމެނެއެވެ. ނަމަވެސް އޭނާގެ ކޮމެޑީ ޓައިމިންގ ގެ ސަބަބުން 1970 އަދި 1980 ގެ އަހަރުތަކުގައި ހިންދީ ސިނަމާ ގައި ވަރަށް މުހިންމު ޝަޚުސިއްޔަތެއްގެ ގޮތުގައި ފާހަގަ ވެގެން ދިޔައެވެ.

އޭނާގެ ކެރިއަރުގެ ތެރޭގައި، އަސްރާނީ ވަނީ އެތައް ބައިވަރު މަޝްހޫރު ފިލްމުތަކެއްގައި މަސައްކަތްކޮށްފައެވެ. އޭގެ ތެރޭގައި "ޝޯލޭ"، "ނަމަކް ހަލާލް"، "ޗުޕްކޭ ޗުޕްކޭ"، "ބާޒީގަރު" އަދި "އަމަރް އަކްބަރް އެންތަނީ" ފަދަ ކްލެސިކް ފިލްމުތައް ހިމެނެއެވެ.

އާސްރާނީ މަރުވި ޚަބަރާ އެކު، އިންޑިއާގެ ފިލްމީ ސިނާޢަތުގެ މަޝްހޫރު އެތައް ފަންނާނުންނެއް ހިތާމަ ފާޅު ކުރުމުގެ ޕޯސްޓުތައް ސޯޝަލް މީޑިއާ ގައި ޖަހާފައިވެއެވެ.