'ލާލް ސިންގ ޗައްޑާ'ގެ ބައެއް ސީންތަކާއި ގުޅިގެން އާމިރު ޚާން އާއި ދެކޮޅަށް މައްސަލަ އެއް!
އެ ފިލްމުން އަސްކަރިއްޔާ އާއި ހިންދޫންގެ ގަދަރަށް އުނިކަން އަންނަ ކަމަށް ތުހުމަތުކޮށްފައިވޭ
ލާލް ސިންގ ޗައްޑާގެ ފިލްމުގެ މަންޒަރެއް
ހިންދީ ފިލްމް، ލާލް ސިންގ ޗައްޑާގެ ބައެއް ސީންތަކާއި ގުޅިގެން އެ ފިލްމްގެ ބަތަލް އާމިރު ހާން އާއި ދެކޮޅަށް މައްސަލަ އެއް ހުށަހަޅައިފިއެވެ.
ހުކުރު ދުވަހު އިންޑިއާގެ ދިއްލީ އަށް ނިސްބަތްވާ ލޯޔަރަކު ދިއްލީ ފުލުހުންނަށް ހުށަހެޅި އެ މައްސަލަ އަކީ އާމިރު ހާންގެ އެ ފިލްމުގެ ބައެއް މަންޒަރުތަކުން އިންޑިއާގެ އަސްކަރިއްޔާ އާއި ހިންދޫންގެ ގަދަރަށް އުނިކަން އަންނަ ކަމަށް ބުނެ ހުށަހަޅާފައިވާ މައްސަލައެކެވެ. އެޑްވޮކޭޓް ވިނީތް ޖިންދާލް އެ މައްސަލަ ހުށަހަޅާފައި ވަނީ ފިލްމުގެ ބަތަލުގެ އިތުރުން ފިލްމް އުފައްދާ ފަރާތާއި ދެކޮޅަށެވެ.
އެގޮތުން އެ ފިލްމުގައި ބުއްދި ސަލާމަތުން ނެތް މީހަކު އަސްކަރިއްޔާ އަށް ވައްދާ ކާގިލް ހަނގުރާމައިގައި ބައިވެރިވާން ހުއްދަ ދީފައިވާތީ އެކަމާއި މެދު ކަންބޮޑުވުން ފާޅުކޮށްފައިވެއެވެ. އެހެންނަމަވެސް ކާގިލް ހަނގުރާމައިގައި ބައިވެރިކުރީ ފުރިހަމަ އަސްކަރީ ތަމްރީނު ލިބިފައިވާ މީހުން ކަމަށް ވާއިރު އެ ހަގީގަތް އޮޅުވާލާފައި ވަނީ އަސްކަރިއްޔާގެ އަގު ވައްޓާލަން ކަމަށް ވިނީތް ހުށަހެޅި މައްސަލައިގައި ވަނީ ބުނެފައެވެ.
މީގެ އިތުރުން ހިންދޫންގެ ދީނަށް މަލާމާތްކޮށް އެ ފިލްމުގެ ބައެއް ޑައިލޮގްތައް ހިމަނާފައިވާތީ އެ މައްސަލަ ބަލާދިނުމަށް ވެސް އޭނާ ވަނީ އެދިފައެވެ. މިއީ އިންޑިއާގައި އޮތް ދީނީ ހިލާލު ތަފާތު ވުންތައް ބޮޑުވެ ހަމަނުޖެހުމަށް މަގުފަހި ކުރުމުގެ ނިޔަތުގައި ކޮށްފައިވާ ކަމެއް ކަަމަށް އެ މައްސަލައިގައި ފާހަގަކޮށްފައިވެއެވެ.
އަދްވައިތް ޗަންދަން ޑައިރެކްޓްކޮށްފައިވާ ލާލްސިންގ ޗައްޑާ އަކީ ހޮލީވުޑްގެ ފޮރެސްޓް ގަމްޕް އަށް ބިނާކޮށް ހަދާފައިވާ ފިލްމެކެވެ. މި ފިލްމުން މޯނާ ސިންގ އާއި ކަރީނާ ކަޕޫރުގެ އިތުރުން ނަގާ ޗައިތަންޔާ ފަދަ ތަރިން ފެނިގެންދެއެވެ.
