މަޝްހޫރު ހިންދީ ފިލްމީ ތަރި ދަރުމެންދުރާ މަރުވެއްޖެ

އިންޑިއާގެ މަޝްހޫރު ފިލްމީ ތަރި ދަރުމެންދުރާ މަރުވެއްޖެ އެވެ.

ހޯމަ ދުވަހު ދަރުމެންދުރާ މަރުވި ކަން އިންޑިއާގެ މީޑިއާ ތަކުން ރިޕޯޓު ކޮށްފައިވާ އިރު، އޭނާ އަކީ އިންޑިއާގެ ސިނަމާގައި ފަސްދޮޅަސް އަހަރަށް ވުރެ ދިގު މުއްދަތަކަށް ހަރަކާތްތެރިވެފައިވާ، އެ ގައުމުގެ އެންމެ މަޝްހޫރު، އަދި ގިނަ ދުވަސްތަކެއް ވަންދެން ފިލުމް އިންޑަސްޓްރީ އަށް ޚިދުމަތް ކުރި ތަރިންގެ ތެރޭގައި ހިމެނޭ ލެޖެންޑެކެވެ.

މަރުވި އިރު އޭނާގެ އުމުރަކީ 89 އަހަރެވެ.

ފާއިތުވެދިޔަ ހަފްތާތަކުގައި އޭނާ އަށް މުންބާއީގެ ހޮސްޕިޓަލެއްގައި ނޭވާލާ ނިޒާމުގެ މައްސަލަތަކާ ގުޅިގެން ފަރުވާދިނުމަށް ފަހު، ފަހުން ވަނީ ހޮސްޕިޓަލުން ދޫކޮށްލާފައެވެ.

ހިންދީ ސިނަމާގެ "ހީ-މޭން" ގެ ނަމުން އެތައް ޖީލުތަކަކަށް މަޝްހޫރުވެފައިވާ ދަރުމެންދުރާ، އަކީ އެކްޓިންގެ އާދަޔާ ޚިލާފު ހުނަރުވެރި ފަރާތެއްކަން ގިނަ ބަޔަކު ފާހަގަ ކުރެއެވެ. އޭގެ ނަތީޖާ އެއްގެ ގޮތުން 1960 ގެ އަހަރުތަކުން ފެށިގެން ދަރުމެންދުރާ އަކީ އެތައް ހާސް ބައެއްގެ ލޯބި ހޯދާފައިވާ ތަރިއެކެވެ.

އޭނާ 250 އަށް ވުރެ ގިނަ ފިލްމު ތަކުގައި އެކްޓް ކޮށްފައި ވެއެވެ. މިފިލްމުތަކުގެ ތެރޭގައި ބޮލީވުޑް ގެ އެންމެ ބޮޑެތި ކާމިޔާބީތަކުގެ ތެރޭގައި ހިމެނޭ "ޝޯލޭ،" "ޕޫލް އައުރު ޕައްތަރ،" "ސައްތުޔާކަމް،" "ޗުޕްކޭ ޗުޕްކޭ،" "ސީތާ އައުރު ގީތާ،" "ޔާދޯ ކީ ބާރާތު،" "ލޯފަރ،" "ބްލެކްމެއިލް" އަދި "ޖުގްނޫ" ފަދަ ފިލްމުތައް ހިމެނެއެވެ.