ލަތާގެ އާއިލާއަށް ރައީސްގެ ތައުޒިޔާ
ލަތާގެ ވަކިވުމަކީ އިންޑިއާއަށް ގެއްލިގެން ދިޔަ ތަރިކަ އެއް
މަޝްހޫރު ލަވަކިޔުންތެރިތާ ލަތާ މަންގޭޝްކަރު
އިންޑިޔާގެ މަޝްހޫރު ލެޖެންޑްރީ ލަވަކިޔުންތެރިޔާ ލަތާ މަންގޭޝްކަރު މަރުވުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ލަތާގެ އާއިލާއަށް ތައުޒިޔާ ވިދާޅުވެއްޖެއެވެ.
ލަތާ މަރުވުމުގެ ހިތާމަފާޅު ކުރައްވާ ރައީސް ކުރެއްވި ޓްވީޓެއްގައި ވިދާޅުވީ ލަތާގެ ވަކިވުމަކީ އިންޑިއާއަށް ގެއްލިގެން ދިޔަ ތަރިކައެއް ކަމަށެވެ. ލަތާގެ ތަފާތު ލަވަތަކުން އަދިވެސް ދުނިޔޭގެ އެތައް މިލިއަން ބަޔަކަށް ހިތްހަމަޖެހުން ލިބެމުންދާ ކަމަށްވެސް ވިދާޅުވިއެވެ.
ލަތާ މަރުވުމުން އޭނާގެ އާއިލާއާ އިންޑިއާގެ ރައްޔިތުންނަށް ހަމްދަރުދީ ފޮނުވާ ކަމަށްވެސް ރައީސް ވިދާޅުވިއެވެ.
އުމުރުން 92 އަހަރުގެ ލަތާ ކޮވިޑް-19 އަށް ޕޮޒިޓިވްވެ، މުމްބާއީގެ ބްރީޗް ކޭންޑީ ހޮސްޕިޓަލުގައި އެޑްމިޓުކޮށްފައިވަނީ މިދިޔަ ޖެނުއަރީ މަހުގެ ކުރީކޮޅެވެ. ޖެނުއަރީ މަހުގެ ފަހުކޮޅު ކޮވިޑުން ފަސޭހަވެފައި ވީނަމަވެސް އޭނާ މަރުވިއިރު ގެންދިޔައީ ވެންޓިލޭޓަރުގައި ފަރުވާދެމުންނެވެ. ކޮވިޑަށް ޕޮޒިޓިވްވީއިރު، އޭނާ ވަނީ ނިއުމޯނިއާއަށްވެސް ފަރުވާކޮށްފައެވެ.
ބްރީޗް ކޭންޑީ ހޮސްޕިޓަލުގައި ލަތާ މަންގޭޝްކަރަށް ފަރުވާދިން ޑޮކްޓަރ، ޑރ.ޕްރެޓިޓް ސަމްދާނީ ވިދާޅުވި ގޮތުގައި, ވެންޓިލޭޓަރުގައި ފަރުވާދޭން ފެށީ ލަތާގެ ހާލަތު އިތުރަށް ގޯސްވާން ފެށުމުންނެވެ. ޑޮކްޓަރުން ދިޔައީ އޭނާގެ ޙާލަތު ގާތުން މޮނިޓަރ ކުރަމުންނެވެ. އޭނާ މަރުވެފައިވަނީ އާދިއްތަ ދުވަހުގެ ހެނދުނުގެ ވަގުތެއްގައެވެ.
36 ބަހަކުން ހާހަކަށްވުރެ ގިނަ ލަވަ ރެކޯޑު ކޮށްފައިވާއިރު، އޭނާގެ ލަވަތަކަކީ ބެލުންތެރިންގެ މެދުގައި ނުހަނު މަޤްބޫލު ލަވަތަކެއްވެސްމެއެވެ. އޭނާގެ ޖަނާޒާގެ ކަންކަންވެސް ކުރިއަށް ގެންދިޔައީ ދައުލަތުގެ އިއްޒަތާއި ޝަރަފާއެކުއެވެ. ދެ ދުވަހުގެ ހިތާމަފާޅު ކުރުންވެސް އެ ޤައުމުގައި ކުރިއަށް ގެންދާގޮތަށް ހަމަޖައްސާފައިވެއެވެ. ހަމައެއާއެކު ޤައުމުގެ ދިދަ ބައިދަނޑިއަށް ތިރިކުރުމަށް ނިންމާފައިވާއިރު، އެ ޤައުމުގެ ބޮޑުވަޒީރު ނަރެންދުރަ މޯދީވެސް ވަނީ ލަތާގެ ޖަނާޒާގައި ބައިވެރިވެވަޑައިގެންފައެވެ.
އިންޑިއާގެ ‘ނައިޓިންގޭލް’ ލަތާ މަންގޭޝްކަރު ވަނީ ލަވަކިޔުމުގެ ދާއިރާއިން ގިނަ އެވޯޑުތަކެއް ހާސިލްކޮށްފައެވެ.
ލަތާގެ ހިތްގައިމު އަދި އަޑު އަހާލަން ފަސޭހަ ލަވަތަކުގެ ތެރޭގައި "ތުމްސޭ ނަޒަރް" އާއި "ބާހޯމެ ޗަލެ އާއޯ" ގެ އިތުރުން "މެހްބޫބު މެރޭ" ފަދަ ބެލުންތެރިންގެ މެދުގައި މަޤުބޫލުވެގެންދިޔަ ލަވަތައް ފާހަގަކޮށްލެވެއެވެ.
