ރާއްޖޭގެ އަސްކަރިއްޔާ އަށްވުރެ ފެނަކައިގެ މުވައްޒަފުން ގިނަ: ބޮންޑާ
ބޮންޑާ ވިދާޅުވީ، ފެނަކަ ކޯޕަރޭޝަންގެ މުވައްޒަފުންގެ އަދަދު 8،000 އަށްވުރެ މައްޗަށް އަރާފައިވާއިރު، އެއީ ރާއްޖޭގެ މުޅި އަސްކަރިއްޔާއަށްވުރެ ވެސް ބޮޑު އަދަދެއް ކަމަށް. މި ސަރުކާރުން ބޭކާރު ގޮތުގައި ވަޒީފާތައް އިތުރުކޮށް ހަރަދުތައް ބޮޑުކުރުމުގެ ސަބަބުން ދައުލަތުގެ ފައިސާ ހުސްވަމުންދާ ކަމަށާއި، ރައްޔިތުންނަށް ދަތިތަކާ ކުރިމަތިވަނީ ސަރުކާރަށް ކަންކަން މެނޭޖްކުރަން ނޭނގުމުން ކަމަށް އޭނާ ފާހަގަކުރެއްވި.
ފެނަކަ ކޯޕަރޭޝަން ލިމިޓެޑް. އިންތިޚާބުތަކާ ދިމާކޮށް ސަރުކާރުން ވަނީ އަތޮޅުތެރޭގެ ބްރާންޗުތަކުން ގިނަ މީހުންނަށް ވަޒީފާ ދީފައި. | ކޯޕަރޭޓް މޯލްޑިވެސް
ދިވެހިރާއްޖޭގެ އަސްކަރިއްޔާ އަށްވުރެ ފެނަކާ ކޯޕަރޭޝަން ލިމިޓެޑުގައި މަސައްކަތް ކުރާ މުވައްޒަފުން ގިނަ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
ރާއްޖެ ޓީވީގެ "ފަލަސުރުހީ" ޕްރޮގްރާމްގައި ބޮންޑާ ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފެނަކައިގައި މަސައްކަތް ކުރަމުންދިޔައީ 3000 މުވައްޒަފުން ކަމަށާއި، އެ އަދަދު އިތުރުވެ، އެކަމުގެ ކަންބޮޑުވުން އޭރު ވެސް ފާޅުކުރި ކަމަށެވެ. އަދި މުވައްޒަފުން މަދު ކުރުމަށް އަންގައި، ކަމާބެހޭ ފަރާތްތަކުން ޖަވާބުދާރީކޮށް، މަޖިލީހުގެ އިގްތިސާދީ ކޮމެޓީގައި އެކަމާ ގުޅޭ މަސައްކަތްތައް ކުރިއަށް ގެންދިޔަ ކަމަށް އޭނާ ވިދާޅުވި އެވެ.
ރައީސް ޑރ.މުހައްމަދު މުއިއްޒުގެ މިސަރުކާރުން ހުރިހާ ގޯސްކަމެއްގައި ކުރީ ސަރުކާރު ކުށްވެރި ކުރަމުން ގެންދާއިރު، މިސަރުކާރުގައި ފެނަކައިގެ މުވައްޒަފުންގެ އަދަދު 3000ން 8000ށް ވުރެ މައްޗަށް އިތުރު ކޮށްފައިވާ ކަމަށް އޭނާ ވިދާޅުވި އެވެ.
މީގެ އިތުރުން ބޮންޑާ ވިދާޅުވީ އަސްކަރިއްޔާގައި ސިފައިން ހަރަކާތްތެރިވާ މިންވަރަށް ވުރެ އިތުރަށް އިންޖީނުގެތައް ހިންގުމަށް ފެނަކައިގައި މަސައްކަތް ކުރާ މީހުންގެ އަދަދުތައް އިތުރު ކަމަށެވެ. މިއީ ވަރަށް ބޮޑު ކަންބޮޑުވުމެއް ކަމަށް ބޮންޑާ ވިދާޅުވި އެވެ.
ދިވެހިރާއްޖޭގެ އަސްކަރިއްޔާ. އަސްކަރިއްޔާގެ މައްޗަށް އެބައޮތް ލާޒިމްކުރޭ ކަންކަމެއް. އަސްކަރިއްޔާގައި އޮންނާނެ ފަޔަރފައިޓަރސް. އަލިފާން ނިއްވާ ބަޔަކު ވެސް ތިބޭނެ. އަދި މުޅި އަތޮޅުތެރެ އާއި ރަށުތެރެ ކޯސްޓުގާޑެއް ވެސް އޮންނާނެ. ޔުނިޓެއް ވެސް އޮންނާނެ. ރިޒަރވް ސިފައިން ވެސް ތިބޭނެ. މިހެންގޮސް އަސްކަރީ އަދި ވައިގެ ސިފައިން ވެސް ތިބޭނެ. ވައިގެ ބަނދަރުތައް ބަލަހައްޓާ އެކި ބަނދަރުތަކުގެ ސިފައިން ވެސް ތިބޭނެ. މި ހުރިހާ އެންމެން އެއްކޮށްލީމަ މިވަނީ ކިހާވަރެއްތޯ؟ ލަފާކޮށްލާފަ. 5000 ހަމަނުވޭ. މުޅި ދިވެހިރާއްޖޭގެ އަސްކަރިއްޔާ ބަޑިގުދަނާ ހުރިހާ ތަންތަނުގައި މި ތިބި ހުރިހާ އެންމެ އެއްކޮށްލީމަ ވެސް 5000 ހަމަނުވޭ. ފެނަކަ އެކަނި 8000 މީހުން. މިއީ އިންޖީނުގެއެއް ހިންގަން އުޅޭ ބައެއް.ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ)
ބޮންޑާ ވިދާޅުވީ ރާއްޖެއިން ފައިސާ ހުސްވަމުން ދަނީ މިސަރުކާރުގެ ބޭކާރު ހަރަދުތަކުގެ ސަބަބުން ކަމަށެވެ. އަދި ފެނަކައަށް އެކަނި މަސައްކަތެއް ނެތި ގިނަ މުވައްޒަފުންތަކެއް ވައްދާފައިވާއިރު، އެއީ ފެންނަން އޮތް މިސާލެއް ކަމަށް އޭނާ ވިދާޅުވި އެވެ.
ބޮންޑާ ވިދާޅުވީ، ރައްޔިތުންނަށް ދަތިތައް ކުރިމަތިވަމުން ދަނީ ކުރީ ސަރުކާރުންގެ ސަބަބުން ނޫން ކަމަށާއި، މިސަރުކާރަށް ކަންކަން ރަނގަޅަށް މޭނޭޖްކޮށް ހިންގަން ނޭނގޭތީ ކަމަށް އޭނާ ވިދާޅުވި އެވެ.
