ފެނަކައިން މުވައްޒަފުންނަށް ހަތަރު މަސްދުވަހުގެ މުސާރަ އާއެކު ވަކިވުމުގެ ފުރުސަތު ހުޅުވާލައިފި
ފެނަކަ ކޯޕަރޭޝަނުގެ މާލީ ހާލަތު ރަނގަޅުކޮށް، މުވައްޒަފުންގެ އަދަދު މަދުކުރުމަށްޓަކައި އަމިއްލައަށް އެދިގެން ވަޒީފާއިން ވަކިވާ ފަރާތްތަކަށް ހަތަރު މަހުގެ މުސާރަ ދޭ ގޮތަށް އެ ކުންފުނިން ވަނީ ހުޅުވާލާފަ. މި ފުރުސަތުގެ ދަށުން ވަކިވާން ބޭނުންވާ މުވައްޒަފުންނާއި އާލީ ރިޓަޔާމަންޓް ޕްރޮގްރާމްގައި ބައިވެރިވާން އެދޭ ފަރާތްތަކުން ޖޫން 14 ވަނަ ދުވަހުގެ ނިޔަލަށް ހުށަހަޅަންޖެހޭ. ކޮރަޕްޝަނާއި ސިޔާސީ ބޭނުމަށް މުވައްޒަފުން އިތުރުކުރުމުގެ ސަބަބުން ކުންފުނި ދަރަނިވެރިވެފައިވާތީ، މިއީ ހަރަދު ކުޑަކުރުމަށް އަޅާ ފިޔަވަޅެއް ކަމަށް އެ ކުންފުނިން ބުނޭ.
ފެނަކައިގެ މެނޭޖްމަންޓުތަކުން ކޮރަޕްޝަނުގެ އަމަލުތައް ހިންގާފައިވާ ކަމަށް ތުހުމަތުކުރެވޭއިރު، މީގެ ސަބަބުން އެ ކުންފުނިން ފޯރުކޮށްދޭ ހިދުމަތަށް ވެސް ބުރޫއަރާކަމަށް ގިނަ ރައްޔިތުން ފާހަގަކުރޭ. | ރާއްޖެ އެމްވީ
ބޮޑު ގެެއްލުމަކާއެކު ހިންގަމުންދާ ފެނަކަ ކޯޕަރޭޝަނުން މުވައްޒަފުން މަދުކުރުމަށް ކުރަމުންދާ މަސައްކަތްތަކުގެ ތެރެއިން، ހަތަރު މަހުގެ މުސާރައާއެކު ވަކިވުމުގެ ފުރުސަތު މުވައްޒަފުންނަށް ހުޅުވާލައިފި އެވެ.
އެ ކުންފުނީގެ ޗީފް ކޯޕަރޭޓް އޮފިސަރު އުސައިދު ހަސަން ސޮއިކުރެއްވުމަށްފަހު އަންގާރަ ދުވަހު ހުރިހާ ޑިޕާޓްމަންޓަކަށް ފޮނުވި މެމޯއެއްގައި ވާ ގޮތުން، މުވައްޒަފުން އެދިގެން އަދާކުރަމުން އަންނަ ވަޒީފާ އިން ވަކިވުމުގެ ފުރުސަތު ވަނީ ހުޅުވާލާފަ އެވެ. މި ފުރުސަތު ދެނީ އެ ކުންފުނިން މުވައްޒަފުން މަދުކުރުމަށް ކުރަމުންއަންނަ މަސައްކަތުގެ ތެރެއިންކަމަށް މެމޯގައި ވަނީ ބުނެފަ އެވެ.
އެ މެމޯގައި ވަނީ، އަމިއްލައަށް އެދިގެން ވަކިވާ މުވައްޒަފުންނަށް ހަތަރު މަހުގެ މުސާރަ ދިނުމަށް ހަމަޖެހިފައިވާ ކަމަށެވެ. އެކަމަށް އެދުމުގެ ފުރުސަތު ބުދަ ދުވަހުން ފެށިގެން ޖޫން 14 ވަނަ ދުވަހުގެ 15:00 ގެ ނިޔަލަށް ވަނީ ހުޅުވާލާފަ އެވެ. އެގޮތުން އަމިއްލައަށް ވަކިވާން ބޭނުންވާ މުވައްޒަފުން އެކަން ހުށަހަޅަން އަންގާފައިވަނީ ފެނަކައިގެ ހިއުމަން ރިސޯސް ޑިޕާޓްމަންޓަށެވެ.
މީގެ އިތުރުން އެ ކުންފުނީގެ އާލީ ރިޓަޔަމަންޓް ޕްރޮގްރާމްގެ ދަށުން ރިޓަޔާވުމަށް ބޭނުންވާ މުވައްޒަފުންނަށް ވެސް އެ ފުރުސަތު ވަނީ ހުޅުވާލާފަ އެވެ.
ފެނަކައަކީ ގެއްލުމުގައި ހިންގާ ކުންފުންޏެއް ކަމަށްވާއިރު، އެ ކުންފުންޏަށް ފާއިތުވި އަހަރުތަކުގައި ކޮރަޕްޝަނުގެ ބޮޑެތި ތުހުމަތުތައް ކުރެވިފައިވެ އެވެ. އެގޮތުން، އިންތިޚާބުތަކާ ދިމާކޮށް ގިނަ އަދަދަކަށް މުވައްޒަފުން ނަގާ ކަމުގެ ޝަކުވާ އޮތީ ބޮޑުވެފަ އެވެ.
ނިމިގެންދިޔަ އިންތިހާބާ ދިމާކޮށް ރަށްރަށުގައި ފެނަކައިން އެތައް ސަތޭކަ ވަޒީފާ އެއް އުފެއްދި އެވެ. އެ ވަޒީފާތައް ދީފައިވަނީ ސަރުކާރަށް މެޖޯރިޓީ ހޯދުމުގެ ގޮތުންކަމަށް ބުނެ އެވެ. ނަމަވެސް އިންތިހާބުތަކުން ސަރުކާރަށް ލިބުނު ބޮޑު ނާކާމިޔާބީއާއެކު ގިނަ ފަރާތަކެއް ވަޒީފާ އިން ވަކިކުރާކަމުގެ މައްސަލަތައް ވަނީ އިތުރުވެފަ އެވެ.
ފެނަކައިގެ މެނޭޖްމަންޓުތަކުން ކޮރަޕްޝަނުގެ އަމަލުތައް ހިންގާފައިވާ ކަމަށް ތުހުމަތުކުރެވޭއިރު، މީގެ ސަބަބުން އެ ކުންފުނިން ފޯރުކޮށްދޭ ހިދުމަތަށް ވެސް ބުރޫއަރާކަމަށް ގިނަ ރައްޔިތުން ފާހަގަކުރެ އެވެ. މުވައްޒަފުންގެ އަދަދު އިތުރުވުމާއި ކޮރަޕްޝަނުގެ ސަބަބުން ފެނަކަ ކޯޕަރޭޝަން ދަރަނިވެރިވެ، ކުންފުނީގެ މާލީ ހާލަތު ވަނީ ވަރަށް ބޮޑަށް ދަށަށް ގޮސްފަ އެވެ.
