ހަތަރު މަހުގެ މުސާރައާއެކު 97 މުވައްޒަފަކު ފެނަކައިން ވަކިވާން އެދިއްޖެ
ފެނަކައިގެ ހިންގުމުގެ ޚަރަދު ކުޑަކުރުމަށް ހަތަރު މަހުގެ މުސާރަ ދޭ ގޮތަށް ހުޅުވާލި ފުރުސަތުގައި، އަމިއްލައަށް ވަޒީފާއިން ވަކިވުމަށް 97 މުވައްޒަފަކު ވަނީ ހުށަހަޅާފަ. ކުންފުނީގެ މުސާރައަށް މަހަކު 90 މިލިއަން ރުފިޔާ ހޭދަވާކަން ފާހަގަކުރައްވައި، އެމްޑީ މުޙައްމަދު ޢަފީފް ވިދާޅުވީ މި ފިޔަވަޅަކީ މަސައްކަތެއް ނެތް މުވައްޒަފުން ގިނަވުމުގެ ސަބަބުން ކުންފުންޏަށް ކުރިމަތިވެފައިވާ މާލީ ބުރަ ކުޑަކުރުމަށް ކުރާ މަސައްކަތެއް ކަމަށް. ނަމަވެސް، މިއީ ސިޔާސީ ގޮތުން ވަކި ބަޔަކު ވަޒީފާއިން ވަކިކުރުމަށް ކުރާ ކަމެއް ކަމަށް ބުނެ ބައެއް ފަރާތްތަކުން ދަނީ ފާޑުކިޔަމުން.
ފެނަކަ ކޯޕަރޭޝަން ލިމިޓެޑް | ކޯޕަރޭޓް މޯލްޑިވެސް
ފެނަކަ ކޯޕަރޭޝަން ލިމިޓެޑްގެ ހިންގުމުގެ ހަރަދުތައް ކުޑަކުރުމަށް ކުރިއަށްގެންދާ "ރައިޓްސައިޒް" ކުރުމުގެ މަސައްކަތުގެ ދަށުން، އެ ކުންފުނިން އަމިއްލައަށް ވަޒީފާއިން ވަކިވުމަށް 97 މުވައްޒަފަކު ހުށަހަޅައިފި އެވެ.
މިއީ ކުންފުނީގެ މާލީ ހާލަތު ރަނގަޅުކުރުމުގެ ނަމުގައި ކުރިއަށްގެންދާ އިސްލާހީ މަސައްކަތުގެ ބައެއް ކަމަށް ފެނަކަ އިން ވަނީ ބުނެފަ އެވެ.
ފެނަކަ އިން މިމަހުގެ ފުރަތަމަ ދުވަހު މުވައްޒަފުންނަށް ފޮނުވި އިންޓާނަލް މެމޯއެއްގައިވާ ގޮތުން، އަމިއްލައަށް އެދިގެން އެ ކުންފުނިން ވަކިވާ މުވައްޒަފުންނަށް ހަތަރު މަހުގެ މުސާރަ ދޭނެ އެވެ. މި ފުރުސަތުގެ ބޭނުން ހިފަން ބޭނުންވާ މުވައްޒަފުންނަށް އެކަމަށް އެދި ހުށަހެޅުމަށް ފުރުސަތު ހުޅުވާލާފައިވަނީ މި މަހުގެ 14 ވަނަ ދުވަހުގެ ނިޔަލަށެވެ.
މިކަމާ ގުޅޭގޮތުން މައުލޫމާތު ދެއްވަމުން ފެނަކައިގެ މެނޭޖިން ޑިރެކްޓަރ މުޙައްމަދު ޢަފީފް ޙުސައިން ވިދާޅުވީ، ކުންފުނި އިސްލާހު ކުރުމަށް ކުރާ މަސައްކަތުގެ ދަށުން މިހާތަނަށް 97 މުވައްޒަފަކު އަމިއްލައަށް ވަކިވާން ހުށަހަޅާފައިވާ ކަމަށެވެ.
އަފީފު ވިދާޅުވި ގޮތުގައި، މިދިޔަ އެޕްރީލް މަހުގެ 27 ވަނަ ދުވަހު އޭނާ އެ މަގާމާ ހަވާލުވެވަޑައިގެންނެވި އިރު، އެ ކުންފުނީގެ މުވައްޒަފުންގެ ޖުމްލަ އަދަދު 8000 އަށް އަރަ އެވެ. ކުންފުނީގެ މުވައްޒަފުންގެ މުސާރައަށް އެކަނިވެސް މަހެއްގެ މައްޗަށް ގާތްގަނޑަކަށް 90 މިލިއަން ރުފިޔާ ހޭދަކުރަންޖެހޭ ކަމަށް ޢަފީފް ވިދާޅުވި އެވެ.
ޢަފީފް އިތުރަށް ވިދާޅުވި ގޮތުގައި، ކުންފުނީގައި މިހާރު ތިބި ބައެއް މުވައްޒަފުންގެ ތެރޭގައި ލިޔަންކިޔަން ނޭނގޭ މީހުންނާއި، ޑިއުޓީ ގަޑީގައި މަސައްކަތަށް ނުގޮސް ގޭގައި ނިދަން ތިބޭ މީހުންވެސް ހިމެނެ އެވެ. މިފަދަ ކަންކަމުގެ ސަބަބުން ކުންފުންޏަށް ބޮޑެތި މާލީ ގެއްލުންތަކެއްވަމުންދާ ކަމަށާއި، މުހިންމު މަޝްރޫއުތަކަށް ބޭނުންވާ ފައިސާ ނުހުންނަނީ މިފަދަ އިސްރާފުތަކުގެ ސަބަބުން ކަމަށް އޭނާ ވިދާޅުވި އެވެ.
މިހާރު ކުރިއަށްދާ އިސްލާހީ މަސައްކަތުގެ ދަށުން، ކުރާނެ މަސައްކަތެއް ނެތް ބައެއް މުވައްޒަފުން ވަޒީފާއިން ވަކިވަމުންދާކަން އަފީފު ފާހަގަކުރެއްވި އެވެ.
އިދިކޮޅު ފަރާތްތަކުން ތުހުމަތުކުރާ ގޮތުގައި ފެނަކަ އަކީ މި ސަރުކާރު ވެރިކަމާ ހަވާލުވިފަހުން އިންތިޚާބުތަކާ ދިމާކޮށް އެންމެ ގިނަ ބަޔަކަށް ވަޒީފާ ދިން ކުންފުންޏެވެ. އަދި މިހާރު ތަފާތު ޕޮލިސީތައް ހަދައިގެން ސަރުކާރުން ކުރިއަށްގެންދާ މި މަސައްކަތަކީ ސަރުކާރާ ފިކުރު ތަފާތު މުވައްޒަފުން ވަޒީފާ އިން ވަކިކުރުމަށް ހިންގާ ސިޔާސީ އަމަލެއް ކަމަށް ގިނަ ބަޔަކު ދަނީ ބުނަމުންނެވެ.
