ގަނޑުކުރި ކަނޑުމަހުގެ ތެރޭން ބައި ޓަނަށްވުރެ ގިނަ ކޮކެއިން ރަޝިޔާއިން އަތުލައިގަނެފި

އިކުއެޑޯއިން އެތެރެކުރި ގަނޑުކުރި ކަނޑުމަސްތަކެއްގެ ތެރޭގައި ފޮރުވާފައި ހުރި ބައި ޓަނަށްވުރެ ގިނަ ކޮކެއިން އަތުލައިގަނެފައިވާ ކަމަށް ރަޝިޔާގެ ފެޑަރަލް ސެކިއުރިޓީ ސާވިސް (އެފް.އެސް.ބީ) އިން ހާމަކޮށްފި އެވެ.

ބުދަ ދުވަހު އެ އެޖެންސީން ނެރުނު ބަޔާނެއްގައި ބުނެފައިވަނީ، މި މަސްތުވާތަކެތި ފެނިފައިވަނީ ކަނޑުމަގުން ސެއިންޓް ޕީޓާސްބާގްގެ ބޮޑު ބަނދަރަށް ގެނައި ކޮންޓޭނަރެއްގެ ތެރެއިން ކަމަށެވެ. މި ކޮކެއިންތައް ފޮރުވާފައި ހުރީ ގާނޫނީ ހަމަތަކުގެ މަތިން އެތެރެކޮށްފައިވާ، ގޮހޮރު ނުނަގައި ގަނޑުކޮށްފައި ހުރި ކަނޑުމަސްތަކެއްގެ ބަނޑުތެރޭގަ އެވެ.

މި އަމަލު ހިންގުމުގައި އެހީތެރިވެދިން ކަމަށް ތުހުމަތުކުރެވޭ ރަޝިޔާގެ ރައްޔިތަކު މިހާރު ވަނީ ހައްޔަރުކޮށްފަ އެވެ. އެފް.އެސް.ބީގެ އޮފިސަރަކު ފާހަގަކުރި ގޮތުގައި، ހައްޔަރުކުރި މީހަކީ ވަޒީފާއެއް ނެތް މީހެއް ނަމަވެސް، އޭނާއަކީ ކޮކެއިން ސްމަގްލްކުރުމުގައި ހަރަކާތްތެރިވާ ކުށްވެރި ގްރޫޕަކާ ގުޅުން އޮންނަ މީހެކެވެ.

އެ އެޖެންސީން ވަނީ މި އޮޕަރޭޝަންގެ ވީޑިއޯއެއް ވެސް އާންމުކޮށްފަ އެވެ. އެ ވީޑިއޯއިން ފެންނަ ގޮތުގައި އޮފިސަރުން އެ މީހާ ހައްޔަރުކުރުމަށްފަހު، ކަރަންޓު ކީސް ބޭނުންކޮށްގެން ގަނޑުކޮށްފައި ހުރި އެތައް މަހެއް ފަޅައި، އޭގެ ތެރޭގައި ފޮރުވާފައި ހުރި ކޮކެއިން ބަންދުކޮށްފައިވާ ސަތޭކައަށްވުރެ ގިނަ ޕެކެޓު ނެރެއެވެ.

އެފް.އެސް.ބީގެ އޮފިސަރުން ވަނީ ތުހުމަތުކުރެވޭ މީހާ ދިރިއުޅޭ ގެ ވެސް ބަލައި ފާސްކޮށްފަ އެވެ. އެގޭގެ ތެރެއިން 613،000 އެމެރިކާ ޑޮލަރާ އެއްވަރުގެ ކްރިޕްޓޯ ފައިސާ ހުރި ޑިޖިޓަލް ވޮލެޓްތަކާއި، 1.3 މިލިއަން ޑޮލަރަށްވުރެ އަގުބޮޑު 13 ލަގްޒަރީ ގަޑިއާއި، މަދުވެގެން 1.6 މިލިއަން ޑޮލަރުގެ އަގުހުރި މަތީ ފަންތީގެ ފަސް ކާރު ވަނީ އަތުލައިގަނެފަ އެވެ.

ބަންދުގައި ހުރި މި މީހާގެ މައްޗަށް ކުށް ސާބިތުވެއްޖެނަމަ، ގިނަވެގެން 15 އަހަރުގެ ޖަލު ހުކުމެއް އަންނާނެ އެވެ.

މި ފަހަކަށް އައިސް ރަޝިޔާއިން ވަނީ ބޮޑެތި އަދަދުތަކުން ކޮކެއިން އަތުލައިގަނެފައެވެ. އެގޮތުން 2025 ވަނަ އަހަރުގެ ސެޕްޓެމްބަރު މަހު، ލެޓިން އެމެރިކާއިން އެތެރެކުރި ދޮންކެޔޮ ޝިޕްމަންޓެއްގެ ތެރޭގައި ފޮރުވާފައި ހުރި، 240 މިލިއަން ޑޮލަރަށްވުރެ އަގުބޮޑު 1،500 ކިލޯގެ ކޮކެއިން ސެއިންޓް ޕީޓާސްބާގުން އަތުލައިގަނެފައިވާ ކަމަށް އެފް.އެސް.ބީން ބުނެފައިވެ އެވެ.

އދ. ގެ އޮފީސް އޮން ޑްރަގްސް އެންޑް ކްރައިމް (ޔޫ.އެން.އޯ.ޑީ.ސީ) އިން ޖޫން މަހު އިންޒާރު ދީފައިވާ ގޮތުގައި، ދުނިޔޭގެ ފެންވަރުގައި ކޮކެއިން ބޭނުންކުރާ މިންވަރު ފާއިތުވި އަހަރުތަކުގައި ވަނީ އެހެން ހުރިހާ މަސްތުވާތަކެއްޗަށްވުރެ ބޮޑަށް އިތުރުވެފަ އެވެ. ކޮކެއިން އުފައްދާ މިންވަރު 2024 ވަނަ އަހަރު ރެކޯޑް އަދަދަކަށް ނުވަތަ 4،000 ޓަނަށް އަރާފައިވާއިރު، މިއީ މީގެ ދިހަ އަހަރު ކުރިއާ އަޅާބަލާއިރު ހަތަރު ގުނަ އިތުރު އަދަދެކެވެ. އަދި ކޮކެއިން ބޭނުންކުރާ މީހުންގެ އަދަދު 2013 ވަނަ އަހަރު ހުރި 17 މިލިއަނުން، 2024 ވަނަ އަހަރު 25 މިލިއަނަށްވުރެ މައްޗަށް އަރާފައިވާ ކަމަށް ލަފާކުރެވެ އެވެ.