ޔޫރަޕްގެ އެންމެ ހަރަކާތްތެރި އަލިފާން ފަރުބަދަ މައުންޓް އެޓްނާ އަނެއްކާވެސް ގޮވައިފި

އިޓަލީގެ ސިސިލީ އައިލެންޑުގައި ހުންނަ މި އަލިފާން ފަރުބަދަ ގޮވުމުގެ ސަބަބުން، އޮރެންޖު ކުލައިގެ އުޖާލާ ލާވާތަކުން ރޭގަނޑުގެ އުޑުމަތި ދިއްލިގެން ދިޔައިރު، އެ މަންޒަރު އެތައް މޭލެއްގެ ދުރަށް ފެންނަން ހުއްޓެވެ.

މައުންޓް އެޓްނާ އަކީ އާންމުކޮށް ގޮވާ އަލިފާން ފަރުބަދައަކަށް ވީނަމަވެސް، މިކަމުގެ ސަބަބުން އެ ސަރަހައްދުގެ އާންމު ދިރިއުޅުމަށް މާބޮޑު ބުރޫއެއް ނާރާ ފަދައިން، މިއީ އާންމު ރައްޔިތުންނަށް އޮތް ނުރައްކަލެއް ކަމަކަށްވެސް ބެލެވިފައެއް ނުވެ އެވެ.

ޔޫރަޕްގެ އެންމެ ހަރަކާތްތެރި އަލިފާން ފަރުބަދަ ކަމަށްވާ މައުންޓް އެޓްނާ އަނެއްކާވެސް ގޮވުމާ ގުޅިގެން، އެ ފަރުބަދައިގެ ބޭރުން ރަތްކުލައިގެ ދިޔާ އަލިފާންގަނޑުތައް ކޯރުތަކެއް ފަދައިން ތިރިއަށް ފައިބަން ފަށައިފި | ރޮއިޓާސް

އެހެންނަމަވެސް، ސައިންސްވެރިން ވިދާޅުވާ ގޮތުގައި ފަހަކަށް އައިސް މި އަލިފާން ފަރުބަދަ ގޮވާ މިންވަރު ވަނީ އިތުރުވެފަ އެވެ. އަދި މިގޮތަށް ގޮވާ ވަގުތުތަކުގައި ބާރުގަދަ ގޮވުންތައް ގޮވާކަންވެސް ސައިންސްވެރިން ފާހަގަކުރައްވަ އެވެ.

މައުންޓް އެޓްނާ ހުންނަނީ އިޓަލީގެ އައްސޭރިފަށުގައި އޮންނަ މެޑިޓެރޭނިއަން ކަނޑުގެ ރަށެއް ކަމަށްވާ ސިސިލީގަ އެވެ.

މި ފަރުބަދަ ގޮވަމުންދަނީ "ސްޓްރޮމްބޯލިއަން" އުސޫލުން ކަމަށްވާއިރު، މިއީ އަލިފާން ފަރުބަދައިގެ އެތެރެއިން ގޭހާއި ދިޔާ އަލިފާން ނުވަތަ ލާވާ ބޭރުވަމުންދާ ގޮތެކެވެ | ގެޓީ އިމޭޖަސް

މިއީ ދުނިޔޭގައި ހުރި އެންމެ ހަރަކާތްތެރި އަލިފާން ފަރުބަދަތަކުގެ ތެރޭގައި ހިމެނޭ ތަނެކެވެ. އަދި އަހަރަކު އެތައް ފަހަރަކު، ބައެއް ފަހަރު މަހެއްގެ ތެރޭގައި އެތައް ފަހަރަކުވެސް މި އަލިފާން ފަރުބަދަ ގޮވަ އެވެ.

އިޓަލީގެ އަލިފާން ފަރުބަދަތައް މޮނިޓަރ ކުރާ ނޭޝަނަލް އިންސްޓިޓިއުޓް އޮފް ޖިއޯފިޒިކްސް އެންޑް ވޮލްކަނޮލޮޖީން ހުކުރު ދުވަހު ރިޕޯޓްކޮށްފައިވާ ގޮތުގައި، އެޓްނާގެ އިރުމަތީ ފަރާތުން މިހާރު ވަނީ ލާވާ ފޭބުމަށް ފަށާފަ އެވެ.

އަލިފާން ފަރުބަދަ ގޮވައި، އޭގެއިން ބޭރުވި އޮރެންޖު ކުލައިގެ ދިލަ އަލިގަދަ ލާވާތަކުން މުޅި ރޭގަނޑުގެ އުޑުމަތި ދިއްލާލައިފިއެވެ | ރޮއިޓާސް

މި ފަހަރުގެ ގޮވުން ހިނގާފައިވަނީ ހޯމަ ދުވަހުގެ ރޭގަނޑުގެ ވަގުތެއްގަ އެވެ. މާހިރުން ވިދާޅުވާ ގޮތުގައި ގާތްގަނޑަކަށް 3،000 މީޓަރުގެ އުސްމިނުގައި ހުރި އަލިފާން ފަރުބަދައިގެ ދިގު ރެނދަކުން (ވެންޓް) ދިޔާވެފައިވާ ހިލަތައް ނުވަތަ ލާވާ ވަނީ ބޭރުވާން ފަށާފަ އެވެ.

މީގެ އިތުރުން ފަރުބަދައިން ދުން އަރަމުންދާކަން ފާހަގަކުރެވިފައިވާއިރު، ކަމާބެހޭ އިދާރާތަކުން ވަނީ އަލިފާން ފަރުބަދައިގެ އެލާޓް ލެވެލް ފެހި ކުލައިން ރީނދޫ ކުލައަށް މަތިކޮށްފަ އެވެ. އަދި އެޓްނާގެ ހަރަކާތްތައް އިތުރުވޭތޯ ބެލުމަށްޓަކައި މޮނިޓަރިންގެ މަސައްކަތްތައް މިހާރު ވަނީ އިތުރަށް ވަރުގަދަކޮށްފަ އެވެ.