އިޓަލީގެ ފަތުރުވެރިން މަރުވީ އޮކްސިޖަން ހުސްވެގެން ނުވަތަ ގެނބިގެން-ވަގުތީ ނަތީޖާ
ވ. އަތޮޅު ހޮހަޅައަށް ފީނަނިކޮށް މަރުވި އިޓަލީގެ ފަތުރުވެރިންގެ ހަށިގަނޑު އެ ގައުމަށް ފޮނުވާލާފައިވާއިރު، މި މައްސަލަ އިޓަލީގެ ކަމާބެހޭ ފަރާތްތަކުން ދަނީ އިހުމާލުގެ މައްސަލައެއްގެ ގޮތުގައި ތަހުގީގު ކުރަމުން. މި ހާދިސާގައި މަރުވި މީހުންގެ ޕޯސްޓްމޯޓަމް ރިޕޯޓްތައް ރާއްޖޭގެ ތަހުގީގީ އިދާރާތަކާ ހިއްސާކުރުމަށް އެއްބަސްވެފައިވާ އިރު، އެމީހުން ބޭނުންކުރި ޑައިވް ސާމާނުތަކާއި ކެމެރާތައް ދިރާސާކުރުމުގެ މަސައްކަތް ވެސް ދަނީ ކުރަމުން.
ދިވެހިރާއްޖޭގައި ހިނގި ޑައިވިން ހާދިސާއެއްގައި މަރުވި ހަތަރު ފަތުރުވެރިންގެ ހަށިގަނޑު، ވައިގެ މަގުން އިޓަލީގެ މިލާން މަލްޕެންސާ އެއާޕޯޓަށް ގެންދިއުމަށްފަހު، އެ ގައުމުގެ ގަލަރާޓޭގައި ހުންނަ ސެއިން އެންޓޯނިއޯ އެބާޓޭ ހޮސްޕިޓަލުގެ މޯޗަރީއަށް ގެންދަނީ. | ގެޓީ އިމޭޖަސް
މި މޭ މަހުގެ 14 ވަނަ ދުވަހު ވ. އަތޮޅުގެ "ދެވަނަ ކަނޑު" ގެ ގޮތުގައި މަޝްހޫރުވެފައިވާ ސަރަހައްދުގެ ހޮހަޅައަށް ފޭބި އިޓަލީގެ ފަތުރުވެރިން މަރުވީ އޮކްސިޖަން ހުސްވެގެން ނުވަތަ ގެނބިގެން ކަމަށް، އެމީހުންގެ ހަށިގަނޑުގެ ޕޯސްޓްމޯޓަމްގެ ވަގުތީ ނަތީޖާއިން ދައްކައިފިއެވެ.
އިޓަލީގެ ބައެއް ނޫސްތަކުން ރިޕޯޓްކޮށްފައިވާ ގޮތުގައި، މި ހާދިސާގައި މަރުވި ފަސް ޑައިވަރުންގެ ތެރެއިން ދެ މީހެއްގެ ޕޯސްޓްމޯޓަމްގެ ވަގުތީ ނަތީޖާ މިހާރު ވަނީ ލިބިފައެވެ. އެއީ ޔުނިވަރސިޓީ އޮފް ޖެނޯއާގެ ޕްރޮފެސަރެއް ކަމަށްވާ މޮނިކާ މޮންޓެފަލްކޯން އާއި އޭނާގެ ދަރިފުޅު ޖިއޯޖިއާ ސޮމަކަލްގެ ހަށިގަނޑެވެ.
ޕޯސްޓްމޯޓަމް ރިޕޯޓާ ހަވާލާދީ ނޫސްތަކުން ބުނެފައިވަނީ، މި ދެމީހުންވެސް މަރުވާން މެދުވެރިވީ އެމީހުން ބޭނުންކުރި އޮކްސިޖަން ސިލިންޑަރުން ވައި ހުސްވުމުގެ ސަބަބުން ނުވަތަ "އެނޮކްސިއާ" ގެ ހާލަތެއް ކުރިމަތިވެގެން ކަމަށެވެ. މިއީ ހަށިގަނޑަށް ބޭނުންވާ އޮކްސިޖަން ނުލިބުމުގެ ސަބަބުން ނުވަތަ ގެނބިގެން މަރުވުމަށް ކިޔާ ނަމެކެވެ.
މި ހާދިސާގެ ފުރިހަމަ ޕޯސްޓްމޯޓަމް ރިޕޯޓް ލިބޭނީ ކުރިއަށް އޮތް ތިން މަސްދުވަހުގެ ތެރޭގައި ކަމަށްވެސް އިޓަލީގެ ނޫސްތަކުން ރިޕޯޓްކޮށްފައިވެއެވެ.
މި މައްސަލައަކީ އިހުމާލުން މީހަކު މަރުވުމުގެ މައްސަލައެއްގެ ގޮތުގައި އިޓަލީގެ ކަމާބެހޭ ފަރާތްތަކުން މިހާރު ދަނީ ތަހުގީގު ކުރަމުންނެވެ. އެގޮތުން އިޓަލީގެ ޕްރޮސިކިއުޓަރސް އޮފީހުން ވަނީ މި ތަހުގީގަށް ބޭނުންވާ އެހީތެރިކަމާއި އެއްބާރުލުން ދިނުމަށް އެދި ދިވެހި ސަރުކާރުގެ ކަމާބެހޭ އިދާރާތަކަށް ސިޓީއެއް ފޮނުވާފައެވެ.
