ޓްރަމްޕް އާ އެކު ފޮޓޯ އެއް ނެގުމަށް އިޓަލީގެ ބޮޑުވަޒީރު މެލޯނީ "އާދޭސްކުރެއްވި" ކަމަށް ބުނާ ވާހަކަ ޓްރަޕްމް ތަކުރާރުކުރައްވައިފި
އީރާނާ ދެކޮޅަށް އެމެރިކާއިން ކުރިއަށްގެންދާ އަސްކަރީ އޮޕަރޭޝަންތަކަށް އިޓަލީގެ އެހީތެރިކަން ނުލިބޭ ކަމަށް ވިދާޅުވެ، ރައީސް ޑޮނަލްޑް ޓްރަމްޕް އެގައުމުގެ ބޮޑުވަޒީރު ޖޯޖިއާ މެލޯނީއަށް ވަރުގަދަ ބަހުގެ ހަމަލާތަކެއް އަމާޒުކުރައްވައިފި. މެލޯނީގެ މަގުބޫލުކަން ކުޑަވެފައިވާ ކަމަށާއި އޭނާ ޓްރަމްޕާ އެކުވެރިވާން އުޅެނީ އަމިއްލަ ފައިދާއަށް ކަމަށް ވިދާޅުވުމުން، މެލޯނީ ވަނީ އެމެރިކާގެ ރައީސް އެކުވެރި ގައުމުތަކާ މެދު އަމަލުކުރައްވާ ގޮތާ މެދު ހިތާމަކުރައްވާ ކަމަށް ވިދާޅުވެ ރައްދު ދެއްވާފައި. މި މައްސަލަ ހޫނުވުމާ ގުޅިގެން އިޓަލީގެ ފޮރިން މިނިސްޓަރު އެމެރިކާއަށް ކުރައްވަން އޮތް ދަތުރުފުޅުވެސް މިހާރު ވަނީ ކެންސަލް ކުރައްވާފައި.
ފްރާންސްގެ އެވިއަން-ލެ-ބެއިންސްގައި 2026 ޖޫން 16 ވީ އަންގާރަ ދުވަހު ބޭއްވި ޖީ7 ގެ ގައުމުތަކާއި މެދުއިރުމަތީގެ ލީޑަރުންގެ މެންދުރުގެ ފަރިއްކޮޅެއްގެ ތެރެއިން، އެމެރިކާގެ ރައީސް ޑޮނަލްޑް ޓްރަމްޕް ޖަރުމަނުގެ ޗާންސެލަރ ފްރެޑްރިކް މާރޒްއާ ވާހަކަފުޅު ދައްކަވާއިރު އިޓަލީގެ ބޮޑުވަޒީރު ޖިއޯޖިއާ މެލޯނީ ބަލަހައްޓަވައިގެން. | ގެޓީ އިމޭޖަސް
މި ހަފުތާގައި ބޭއްވި ޖީ7 ސަމިޓުގެ ތެރެއިން ޓްރަމްޕާއެކު ފޮޓޯއެއް ނެގުމަށް މެލޯނީ "ވަރަށް ބޮޑަށް" އެދިވަޑައިގަތް ކަމަށް ވިދާޅުވާ ވާހަކަ އެމެރިކާގެ ރައީސް ޑޮނަލްޑް ޓްރަމްޕް އަނެއްކާވެސް ތަކުރާރު ކުރައްވައިފިއެވެ.
ޓްރޫތް ސޯޝަލްގައި ކުރެއްވި ޕޯސްޓެއްގައި ޓްރަމްޕް ވަނީ، އީރާނުން ނިއުކްލިއާ ހަތިޔާރު ހޯދުން ނުވަތަ އުފެއްދުން ހުއްޓުވުމަށް އެމެރިކާއިން ކުރަމުންދާ މަސައްކަތްތަކަށް މެލޯނީ އެއްބާރުލުން ނުދެއްވާ ކަމަށް ވިދާޅުވެ ވަރަށް ބޮޑަށް އެކަމަނާ އަށް ފާޑު ވިދާޅުވެފައެވެ.
އީރާނުގައި އެމެރިކާއިން ހިންގާ އަސްކަރީ އޮޕަރޭޝަންތަކަށް އިޓަލީގެ ވައިގެ މަރުކަޒުތައް ބޭނުންކުރުން މެލޯނީ މަނާކުރެއްވުމުގެ ސަބަބުން، ލޮޖިސްޓިކް ގޮތުން އެމެރިކާއަށް ބޮޑެތި ދަތިތަކެއް ކުރިމަތިވި ކަމަށް ޓްރަމްޕް ވިދާޅުވިއެވެ.
މެލޯނީ ފޮޓޯއަކަށް "އާދޭސްކުރެއްވި" ކަމަށް ވިދާޅުވެ ޓްރަމްޕް ކުރިން ދެއްކެވި ވާހަކަތަކާ ގުޅިގެން، އެކަމާ ހައިރާންވާ ކަމަށް ހުކުރު ދުވަހު ބޮޑުވަޒީރު މެލޯނީ ވަނީ ވިދާޅުވެފައެވެ.
އޭގެ އެއްދުވަސް ފަހުން ޓްރޫތް ސޯޝަލްގައި ކުރެއްވި ޕޯސްޓުގައި ޓްރަމްޕް ވިދާޅުވީ، އިޓަލީގައި މެލޯނީގެ މަގުބޫލުކަން އޮތީ ވަރަށް ބޮޑަށް ދަށަށް ގޮސްފައި ކަމަށެވެ.
"މިހާރު، އެމެރިކާއިން އަސްކަރީ ގޮތުން އީރާނު ބަލިކުރުމުން، އޭނާގެ 'މަގުބޫލުކަން އިތުރުކުރުމަށް' އަނެއްކާވެސް އެކުވެރިވާން އެބަ ބޭނުންވޭ. ނޫނޭ، ޝުކުރިއްޔާ!،" ޓްރަމްޕް އިތުރަށް ވިދާޅުވިއެވެ.
މިދިޔަ މާރިޗު މަހު، އީރާނާ ދެކޮޅަށް ހިންގާ އޮޕަރޭޝަންތަކަށް ސިސިލީގައި ހުންނަ ސިގޮނެއްލާ އެއާ ބޭސްގައި އެމެރިކާގެ އަސްކަރީ މަތިންދާބޯޓުތައް ޖެއްސުމުގެ ހުއްދަ އިޓަލީން ނުދިން ކަމަށް ރިޕޯޓުތައް ބުނެއެވެ.
މި އަހަރު އީރާނާ ދެކޮޅަށް ޓްރަމްޕް ފެއްޓެވި އަސްކަރީ ފިޔަވަޅުތަކަށްފަހު، ދެ ގައުމުގެ ދެމެދުގައި އުފެދިފައިވާ ނުތަނަވަސްކަން މި ބަހުގެ ހަމަލާތަކުން ވަނީ އިތުރަށް ހާމަވެފައެވެ.
މި މައްސަލަތަކާ ގުޅިގެން، އިޓަލީގެ ފޮރިން މިނިސްޓަރު އެންޓޯނިއޯ ތަޖާނީ އަންނަ ހަފުތާގެ ކުރީކޮޅު އެމެރިކާއަށް ކުރެއްވުމަށް ހަމަޖެހިފައި އޮތް ދަތުރުފުޅުވެސް މިހާރު ވަނީ ކެންސަލް ކުރައްވާފައެވެ.
ފްރާންސްގައި ބޭއްވި ޖީ7 ސަމިޓުގެ ތެރެއިން ޓްރަމްޕާއި މެލޯނީ ގާތްކޮށް ވާހަކަދައްކަވަނިކޮށް ފޮޓޯއަކުން ފެނިފައިވާއިރު، ދެ ބޭފުޅުންގެ ގުޅުމަށް ބަދަލެއް ނާންނަ ކަމަށާއި އެއްވެސް ޝަކުވާއެއް ނެތް ކަމަށް މެލޯނީ ފަހުން ނޫސްވެރިންނަށް ވިދާޅުވިއެވެ.
ނަމަވެސް އޭގެ ކުޑަވަގުތުކޮޅެއް ފަހުން، އިޓަލީގެ ލާ7 ޓީވީ ޗެނަލަށް ފޯނުން ދެއްވި އިންޓަވިއުއެއްގައި ޓްރަމްޕް ތުހުމަތު ކުރެއްވި ގޮތުގައި، މެލޯނީ އޭނާއާއެކު ފޮޓޯއެއް ނެގުމަށް އާދޭސްކުރެއްވުމުން، އޭނާގެ މައްޗަށް ހަމްދަރުދީ އުފެދުނީއެވެ.
"އަޅުގަނޑު އެކަމަނާ އާ ވާހަކަދެއްކުމުން އޭނާ ހުންނަވާނީ އުފަލުން ކަމަށް ބެލެވޭ،" ޓްރަމްޕް ވިދާޅުވިއެވެ. ލާ7 ޗެނަލުން ޓްރަމްޕްގެ އަސްލު އިނގިރޭސި ބަސްތައް ބްރޯޑްކާސްޓް ކުރުމުގެ ބަދަލުގައި، އޭނާގެ ވާހަކަތައް ގެނެސްދިނީ އިޓަލީ ބަހުން އަޑު އަޅައިގެންނެވެ.
މި ވާހަކަތަކަށް ރައްދު ދެއްވަމުން މެލޯނީ އިންސްޓަގްރާމްގައި އާންމުކުރެއްވި ވީޑިއޯއެއްގައި ވިދާޅުވީ، އެ ވާހަކަތަކުން އޭނާ ހުރީ "ބަސްހުއްޓިފައި" ކަމަށެވެ.
"އެމެރިކާގެ ރައީސް އެކުވެރި ގައުމުތަކާ މެދު މިފަދަ ގޮތަކަށް އަމަލުކުރައްވަނީ ކީއްވެގެން ކަމެއް އަޅުގަނޑަކަށް ނޭނގޭ،" މިފަދަ ކަމެއް ހިނގި މިއީ ފުރަތަމަ ފަހަރު ނޫންކަން ފާހަގަކުރައްވަމުން މެލޯނީ ވިދާޅުވިއެވެ.
"އަޅުގަނޑަށް ބުނެވެން އޮތީ، ހުޅަނގުގެ ދުޝްމަނުންނާއި އެމެރިކާގެ ދުޝްމަނުންނާ މެދު އޭނާ މިފަދަ ހަރުކަށިކަމެއް ނުދައްކަވާތީ ހިތާމަކުރާ ކަމަށް. އޭގެ ބަދަލުގައި އެފަދަ ލީޑަރުންނަށް އެމަނިކުފާނު މާ ބޮޑަށް ދޫދެއްވާ ތަން ފެނޭ."
"އެކަމަކު އޭނާ ހަނދާން ބަހައްޓަންޖެހޭ އެއް ކަމެއް އެބައޮތް: އަޅުގަނޑު ވެސް އަދި އިޓަލީން ވެސް ދުވަހަކުވެސް އާދޭހެއް ނުކުރާނެ."
މި ދެ ލީޑަރުންގެ މެދުގައި މީގެ ކުރިން ސިޔާސީ ގޮތުން ގާތް ގުޅުމެއް އޮތްއިރު، ޖެނުއަރީ 2025 ގައި ބޭއްވި ޓްރަމްޕްގެ ރައީސްކަމުގެ ހުވާކުރުމުގެ ރަސްމިއްޔާތުގައި ބައިވެރިވެވަޑައިގަތް ވިލާތުގެ ހަމައެކަނި ލީޑަރަކީވެސް މެލޯނީއެވެ.
މަސްދަރު: ބީބީސީ
