އިޓަލީގެ ފަސް ފަތުރުވެރިން މަރުވި ހާދިސާގެ ތަހުގީގު ކުރިއަށްދާއިރު، މީގެ 40 އަހަރު ކުރިން ހަމަ އެ ސަރަހައްދުގައި މަރުވި އެހެން އަންހެނެއްގެ ވާހަކަ އޭނާގެ ފިރިމީހާ ހިއްސާ ކޮށްފި

ދާދިފަހުން އިޓަލީގެ ފަސް ފަތުރުވެރިން މަރުވި ރާއްޖޭގެ ހަމަ އެ ސަރަހައްދަށް ފީނަން ގޮސް އުޅުމުގެ ތެރޭގައި މީގެ 40 އަހަރު ކުރިން، މަރުވި އަންހެނެއްގެ ފިރިމީހާ، އެ ހާދިސާގެ ހިތާމަވެރި ތަފްސީލުތައް ހިއްސާކޮށްފިއެވެ. އޭނާ ބުނި ގޮތުގައި އޭނާގެ އަންހެންނުންނަށް ފީނުމަށް ހުއްދަ ދީފައިވަނީ 65 ފޫޓު އަޑިއަށް ނަމަވެސް، ޑައިވް ގައިޑް ވަނީ އޭނާ 175 ފޫޓަށް ވުރެ ފުން ސަރަހައްދަކަށް ގެންގޮސްފައެވެ.

ޖިއޯޖިއޯ ބެޓިންގެ އަންހެނުން އަދި ކަނޑުއަޑީގެ ފޮޓޯގްރާފަރެއް ކަމަށްވާ އެނާ މާރިއާ ޕިސްޓޮލާޓޯ މަރުވީ، 11 ޖެނުއަރީ 1983 ގައި އެ ދެމަފިރިން ކައިވެންޏަށްފަހު ކުރި ފުރަތަމަ ދަތުރުގައި ވ. އަތޮޅުގެ އެ ސަރަހައްދަށް ފީނަން އުޅުމުގެ ތެރޭގައެވެ. މިއީ ދާދިފަހުން އިޓަލީގެ ފަސް މީހުން މަރުވި ސަރަހައްދެވެ.

މިދިޔަ މެއި މަހުގެ 14 ވަނަ ދުވަހު، ބޭނުންވާ ތަމްރީނާއި ހުއްދަ ނުވަތަ ސާމާނު ނެތި 160 ފޫޓު އަޑީގައި އޮތް ހޮހަޅައެއް ބަލަން ދިއުމަށް ނިންމީ ކޮން ފަރާތަކުންތޯ ބެލުމަށް ރޯމްގެ ޖިނާއީ ތަހުގީގު ކުރާ ފަރާތްތަކުން މަސައްކަތް ކުރަމުންދާއިރު، ބެޓިން އިޓަލީގެ 'އިލް ގަޒެޓީނޯ' ނޫހަށް ބުނީ އެއީ ކުރު ޑައިވް އަކަށް ވާނެ ކަމަށް ބެލެވުނު ނަމަވެސް، އޭގެ ފަހުން އޭނާގެ އަންހެންނުން ދިރިހުއްޓާ ފެނިފައިނުވާ ކަމަށެވެ.

ބެޓިން ބުނި ގޮތުގައި، ހަ މީހުންގެ އެ ގްރޫޕުން ރޭވީ 65 ފޫޓު އަޑިއަށް ފީނުމަށެވެ. ނަމަވެސް އޭނާ އުޅަނދުގައި ހުރެ އިންތިޒާރު ކުރަމުން ދަނިކޮށް، ޕިސްޓޮލާޓޯ އަނބުރާ މައްޗަށް ނޭރުމުން އޭނާއަށް ބޮޑު ސިހުމެއް ލިބުނެވެ.

އޭނާގެ ހަށިގަނޑު ފެނުނީ ގެއްލުނުތާ 20 ދުވަސް ފަހުންނެވެ. އެއިރު ހަށިގަނޑު އޮތީ ވަކިކުރަން ނޭނގޭ ވަރަށް ކުނިވެފައެވެ.

ބެޓިން ބުނި ގޮތުގައި، އެ ގްރޫޕުން ރާއްޖޭގައި މުނިފޫހިފިލުވުމަށް ފީނުމަށް ކަނޑައަޅާފައިވާ ގާނޫނީ އިމަށްވުރެ (100 ފޫޓަށްވުރެ) މާ ފުންކޮށް، މަދުވެގެން 175 ފޫޓު އަޑިއަށް ދިޔަކަން އޭނާއަށް އެނގުނީ މާ ފަހުންނެވެ. އަދި އެއީ އެއްވެސް ސަބަބެއް ބަޔާންކުރުމެއް ނެތި ގައިޑް ނިންމި ނިންމުމެއް ކަމަށްވެސް އޭނާ ބުންޏެވެ.

"އޭނާގެ މައްޗަށް މާލީ ބަދަލެއް ދިނުމަށް އަމުރުކުރި. އެކަމަކު ތެދަށް ބުނާނަމަ އެއީ އަހަންނަށް އެއްވެސް މާނައެއް ހުރި ކަމެއް ނޫން،" ބަދަލުގެ ގޮތުގައި ލިބުނު ފައިސާގެ އަދަދު ހާމަނުކޮށް ބެޓިން ބުންޏެވެ.

"އެ ދުވަހަށްފަހު އަހަރެން ދުވަހަކުވެސް ފީނަން ނުދަން."

ބެޓިން މި ވާހަކަތައް ހިއްސާކޮށްފައި މިވަނީ، އިޓަލީގެ ފަތުރުވެރިންގެ ގްރޫޕް "ޝާކް ކޭވް" (މިޔަރު ހޮހަޅަ) ތެރޭގައި މަރުވި ގޮތާއި، އެތަނަށް ވަނުމަށް ނިންމި ސަބަބު ރާއްޖޭގެ ފުލުހުން ތަހުގީގު ކުރަމުންދާ ދަނޑިވަޅެއްގައެވެ. އެ ގްރޫޕުގެ އަތުގައި ހުރީ އާންމުކޮށް ބޭނުންކުރާ އޮކްސިޖަން ޓޭންކުތަކެވެ. އެހާ ފުން ސަރަހައްދުތަކަށް ފީނާއިރު ބޭނުންކުރަންޖެހޭ އޮކްސިޖަން، ނައިޓްރޯޖަން އަދި ހީލިއަމް އެކުލެވޭ 'ޓްރައިމިކްސް' އެ ގްރޫޕް އަތަކު ނެތެވެ.

މަރުވި މީހުންގެ ހަށިގަނޑުތައް ނެގުމުގައި ހަރަކާތްތެރިވި ފިންލޭންޑުގެ ތަޖުރިބާކާރު ޑައިވަރަކު ބުނި ގޮތުގައި، އެމީހުންގެ ޓޭންކުތަކުގައި ހުރި ވައިގެ މިންވަރަށް ބަލާއިރު، އެހާ ފުން މިނެއްގައި އެމީހުންނަށް ދިރިތިބެވޭނީ ގިނަވެގެން 10 މިނެޓު ވަންދެނެވެ.

އިޓަލީގެ ޓުއާ އޮޕަރޭޓަރު 'އަލްބަޓްރޮސް' އާއި، ބައެއް މެރިން ބަޔޮލޮޖިސްޓުން ރާއްޖެއަށް ކުރި ދިރާސާ ދަތުރު އިންތިޒާމުކުރި ޔުނިވަރސިޓީ އޮފް ޖެނޯއާއިން ވަނީ، އެހާ ފުން ސަރަހައްދަކަށް ފީނުމަށް ހުއްދަ ދީފައި ނުވާނެ ކަމަށާއި، އެއީ ޕްލޭންގައި އޮތް ކަމެއް ނޫން ކަމަށް ބުނެފައެވެ.

މި ހާދިސާ ހިނގި ގޮތާއި އޭގެ ފަހުން ކަންތައްތައް ވެގެންދިޔަ ގޮތް ބެޓިންގެ އަންހެންނުންގެ ހާދިސާއާ ވަރަށް އެއްގޮތެވެ. ބެޓިން ބުނި ގޮތުގައި އެ ހާދިސާއަށްފަހު އޭނާއާ މެދު ކަންތައް ކުރި ގޮތުން އަދިވެސް އޭނާ ހިތްހަމަނުޖެހެއެވެ.

"ޖެހިގެން އައި ދުވަހުވެސް އެމީހުން އެންމެ ފުރަތަމަ ބޭނުންވީ އަހަރެން ގައުމަށް ފޮނުވާލަން. އެއީ އަންހެނުން ހޯދުމުގެ މަސައްކަތް ކުރިއަށް ދަނިކޮށް، އެމީހުން އަހަންނަށް އެނބުރިދާނެ ފްލައިޓެއް ހޯދައިދީ އިޓަލީއަށް ފޮނުވާލި،" އޭނާ ބުންޏެވެ.