އީރާނުގެ ތެލުގެ އުފެއްދުންތައް ވިއްކުމާއި އުފުލުމަށް މަގުފަހިކޮށްދިނުމުގެ ގޮތުން އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ވަގުތީ ލުޔެއް އެމެރިކާ އިން ދީފި

އީރާނުން އުފައްދާ ސާފުނުކުރާ ތެލާއި، ތެލުގެ އުފެއްދުންތައް ވިއްކުމާއި އުފުލުމަށް މަގުފަހިކޮށްދިނުމުގެ ގޮތުން، އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް އަންނަ އޯގަސްޓް މަހުގެ 21 ވަނަ ދުވަހުގެ ނިޔަލަށް ވަގުތީ ލުޔެއް ދިނުމަށް ނިންމާފައިވާކަން އެމެރިކާ ސަރުކާރުން ހޯމަ ދުވަހު ހާމަކޮށްފިއެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވީ، މި ފިޔަވަޅުތައް މެދުކަނޑާލަން ނިންމީ ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް ހުރަހެއްނެތި ދަތުރުކުރެވޭނެ މަގު ފަހިކޮށްދިނުމަށާއި، އިންޓަރނޭޝަނަލް އެޓޮމިކް އެނާޖީ އެޖެންސީ (އައި.އޭ.އީ.އޭ) ގެ އިންސްޕެކްޓަރުންނަށް އީރާނަށް ވަނުމުގެ ހުއްދަ ދިނުމަށް މިހާރު ކުރިއަށްދާ މަޝްވަރާތަކުގައި އީރާނުން އެއްބަސްވެފައިވާތީ ކަމަށެވެ.

އެމެރިކާގެ ޓްރެޜަރީ ޑިޕާޓްމަންޓުން އާންމުކޮށްފައިވާ ލައިސަންސްގައިވާ ގޮތުން، އީރާނުން އުފައްދާ ސާފުނުކުރާ ތެޔޮ އުފެއްދުމާއި، ވިއްކުމާއި އަދި އުފުލުމާ ގުޅޭގޮތުން މީގެކުރިން މަނާކޮށްފައިވާ ހުރިހާ މުއާމަލާތްތަކަކަށް، 2026 ވަނަ އަހަރުގެ އޯގަސްޓް 21 ވަނަ ދުވަހުގެ ރޭގަނޑު 12:01 (އީސްޓަން ޑޭލައިޓް ޓައިމް) އާ ހަމައަށް ވަނީ ހުއްދަ ދީފައެވެ.

ލުބުނާނު ހަނގުރާމަ ހުއްޓާލުމަށް ޕާކިސްތާނާއި ގަތަރުން ކުރި ބުރަ މަސައްކަތުން ބޮޑެތި ކުރިއެރުންތަކެއް ލިބިފައިވާ ކަމަށް އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވިއެވެ. އަދި ތެލާއި ޕެޓްރޯކެމިކަލް އެކްސްޕޯޓް ކުރުމަށް ހުރި ހުރަސްތައް ނައްތާލައި، ބްލޮކޭޑް އުވާލައި، ހިފަހައްޓާފައިވާ ބައެއް ފައިސާ ދޫކޮށްލުމުގެ އިތުރުން، އީރާނު އާރާސްތުކުރުމާއި ތަރައްގީގެ ބޮޑު މަޝްރޫއެއް ފަށާފައިވާ ކަމަށްވެސް އޭނާ ވިދާޅުވިއެވެ.

މި ނިންމުމާ ގުޅިގެން، ބްރެންޓް ކްރޫޑް ތެލުގެ އަގު 3.3 އިންސައްތަ ދަށަށް ގޮސް، ފީފާއެއްގެ އަގު ހުރީ 77.91 ޑޮލަރުގައެވެ.

ގާތްގަނޑަކަށް 40 ދުވަހުގެ ހަނގުރާމައަށްފަހު، ހަނގުރާމަ ހުއްޓާލުމުގެ އެއްބަސްވުމަކަށް އައިސް، 60 ދުވަހުގެ މަޝްވަރާތަކަށް މަގުފަހިކުރުމުގެ ގޮތުން ތެހެރާނާއި ވޮޝިންގޓަނުން މިދިޔަ ހަފުތާގައި ވަނީ ފަހުމުނާމާއެއްގައި ސޮއިކޮށްފައެވެ.