ޑޮލަރުން އިންވެސްޓްކޮށްގެން 25 އިންސައްތައާ ހަމައަށް ފައިދާ ހޯދުމުގެ ފުރުސަތެއް ބީއެމްއެލް އިން ހުޅުވާލައިފި

 ބޭންކް އޮފް މޯލްޑިވްސް (ބީއެމްއެލް) އިން ފީގެ ގޮތުގައި އާމްދަނީ ލިބޭ ވިޔަފާރީގެ މުޢާމަލާތްތަކަށް އިންވެސްޓްކުރުމުގެ އައު ފުރުސަތުތަކެއް ކަސްޓަމަރުންނަށް ހުޅުވާލައިފި އެވެ.

މި ނިޒާމުގެ ދަށުން އިންވެސްޓްކުރާ ޑޮލަރުން ކުރާ ވިޔަފާރިން ލިބޭ އާމްދަނީގެ ބޮޑު ބައެއް އިންވެސްޓްކުރާ ފަރާތްތަކަށް ފައިދާގެ ގޮތުގައި ދިނުމަށް ބޭންކުން ވަނީ ނިންމާ ފައެވެ.

އަންގާރަ ދުވަހު ބޭއްވި "ޗެޓް ވިތު ސީއީއޯ" އިވެންޓުގައި ތަޢާރަފުކުރި މި ޚިދުމަތާއެކު، ކޮންމެ ދުވަހަކުވެސް ތަފާތު މިންވަރަށް ފައިދާލިބޭ އިންވެސްޓްމެންޓް ޕޫލްތައް ބޭންކުން އާންމުކުރާނެ އެވެ. ބީއެމްއެލް އިން މަޢުލޫމާތު ދޭ ގޮތުގައި، ބޭންކުގެ މޯބައިލް އެޕް އަދި އިންޓަރނެޓް ބޭންކިންގ މެދުވެރިކޮށް މި ޕޫލްތަކުގެ މަޢުލޫމާތް ބަލައި، އޮންލައިންކޮށް ފަސޭހަކަމާއެކު އިންވެސްޓް ކުރެވޭނެ އެވެ.

މިގޮތުން އިންވެސްޓްކުރާ ޑޮލަރުގެ އަދަދަށްވާ ދިވެހި ރުފިޔާ އިންވެސްޓްކުރާ ފަރާތުގެ އެކައުންޓަށް ވަގުތުން ޖަމާވާނެ އެވެ. އަދި އިންވެސްޓްމަންޓްގެ ފައިދާ ޖެހިގެން އަންނަ ދުވަހު ކަސްޓަމަރުގެ ރުފިޔާ އެކައުންޓަށް ޖަމާވާއިރު، ބައެއް ޕޫލްތަކުން %25 އާ ހަމަޔަށް ފައިދާ ލިބުމުގެ ފުރުސަތު އޮންނާނެ ކަމަށް ބޭންކުން ބުނެ އެވެ.

މި ޚިދުމަތް އިފްތިތާޙު ކޮށްދެއްވަމުން ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ މުޙައްމަދު ޝަރީފް ވިދާޅުވީ، ރާއްޖެއިން ބޭރުން މުދަލާއި ޚިދުމަތް ހޯދުމަށް ކާޑުތަކުން ކުރާ މުޢާމަލާތްތައް ފާއިތުވި 5 އަހަރު ތެރޭގައި 3.7 ގުނަ އިތުރުވެފައިވާ ކަމަށެވެ. އަދި މަހެއްގެ މައްޗަށް އެވްރެޖްކޮށް 39.3 މިލިއަން ޑޮލަރު މިފަދަ މުޢާމަލާތްތަކަށް ބޭންކުން ވިއްކަމުންދާ ކަމަށް އޭނާ ފާހަގަކުރެއްވި އެވެ.

ކޮންމެ މަހަކު ގާތްގަނޑަކަށް 2.5 ލައްކަ އާއި 3 ލައްކަ އާއި ދެމެދުގެ އަދަދަކަށް މީހުން ރުފިޔާ ކާޑުތަކުން ބޭރުގެ މުޢާމަލާތްތައް ކުރަމުންދޭ. މީގެ އެންމެ މުހިންމު ސަބަބަކީ ދިވެހިން ބޭރުގެ ގައުމުތަކުން އޮންލައިންކޮށް މުދާ ގަތުން ނުވަތަ ކްރޮސް-ބޯޑަރ އީ-ކޮމާސް އިތުރުވުން. މިއީ ރާއްޖޭގެ އިގްތިސާދާއި ޑިޖިޓަލް ބޭންކިންގ އަށް އައިސްފައިވާ ބޮޑު ކުރިއެރުމެއް،

ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ މުޙައްމަދު ޝަރީފް

ސީއީއޯ އިތުރަށް ވިދާޅުވީ، ފާއިތުވި 36 މަސް ތެރޭގައި 1.6 ބިލިއަން ޑޮލަރު ބޭންކުން ވިއްކާފައިވާއިރު، އޭގެ 60 އިންސައްތައަކީ ކާޑު މުޢާމަލާތްތައް ކަމަށެވެ. މި އައު އިންވެސްޓްމަންޓް ނިޒާމުގެ މައިގަނޑު ބޭނުމަކީ ޑޮލަރުން އާމްދަނީ ލިބޭ ފަރާތްތަކަށް ފައިދާ ހޯދައިދިނުމާއެކު، ބޭންކަށް ޑޮލަރު ހޯދައި ކަސްޓަމަރުންގެ ޒަރޫރީ ބޭނުންތަކަށާއި އިމްޕޯޓް މުދަލަށް ބޭނުންވާ ޑޮލަރު ދެމެހެއްޓެނިވި ގޮތެއްގައި ފޯރުކޮށްދިނު މެވެ.

މި ހަފްލާގައި ވަނީ އެފް.އެކްސް އިންވެސްޓްމަންޓް ޚިދުމަތް ބޭނުންކުރާނެ ގޮތުގެ ޑެމޯއެއް ދައްކާލައި، ބޭންކުގެ ކުރިމަގުގެ ސްޓްރެޓެޖީތަކާ ބެހޭ ތަފްސީލީ މަޢުލޫމާތު މީޑިއާއާ ހިއްސާކޮށްފަ އެވެ.