މައިންޑްކޯ އާއި ބޭންކް އޮފް މޯލްޑިވްސް އިން މޯލްޑިވްސް އޭއައި ލެބް އިފްތިތާހުކޮށްފި
މައިންޑްކޯ އާއި ބީއެމްއެލް ގުޅިގެން "މޯލްޑިވްސް އޭއައި ލެބް" އިފްތިތާހުކުރުމާއެކު، އޭއައި ބޭނުންކުރުމުގެ ގައުމީ އުސޫލުތައް ކަނޑައެޅުމަށް "ކޯ.ލެބް 26" ގެ ނަމުގައި ހަތަރު ދުވަހުގެ ހަރަކާތެއް ވަނީ ފަށާފަ. މި ހަރަކާތުގެ ތެރެއިން ސަރުކާރުގެ ހިންގުން ހަރުދަނާކުރުމަށާއި ފިންޓެކް ދާއިރާ ކުރިއެރުވުމަށް އޭއައި ބޭނުންކުރާނެ ގޮތްތަކާ ގުޅޭގޮތުން މަޝްވަރާކޮށް، ހާއްސަ ހެކަތަންއެއް ކުރިއަށްގެންދިއުމަށް ވަނީ ރޭވިފަ. މި މަޝްރޫއުގެ މައިގަނޑު މަގްސަދަކީ ރާއްޖޭގެ އަމިއްލަ އޭއައި އަދި ޑޭޓާގެ ގާބިލުކަން ބިނާކޮށް، ދިވެހި ހުނަރުވެރިންގެ އެހީގައި އިގްތިސާދީ އަދި އިޖުތިމާއީ މަންފާ ހޯދުން.
މޯލްޑިވްސް އޭއައި ލެބް އިފްތިތާހުކުރަން ބޭއްވި ރަސްމިއްޔާތުގައި ބޭންކް އޮފް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވާހަކަ ދައްކަވަނީ | ބީއެމްއެލް
މައިންޑްކޯ އާއި ބޭންކް އޮފް މޯލްޑިވްސް (ބީއެމްއެލް) ގުޅިގެން، ރާއްޖޭގެ ފުރަތަމަ ގައުމީ އޭއައި އެންޑް ޑޭޓާ ކޮމްޕެޓެންސީ ސެންޓަރ، "މޯލްޑިވްސް އޭއައި ލެބް" ރަސްމީކޮށް އިފްތިތާހުކޮށްފި އެވެ.
ހޯމަ ދުވަހު ބޭއްވި ހާއްސަ ރަސްމިއްޔާތެއްގައި މި ސެންޓަރު އިފްތިތާހުކޮށްދެއްވީ މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ އަލީ އިހުސާން އެވެ. މި ސެންޓަރުގެ މަސައްކަތްތައް ފެށިގެންދިޔައީ އޭއައި ބޭނުންކުރުމާ ގުޅޭ ގައުމީ އުސޫލުތައް ބައްޓަންކުރުމަށް ބާއްވާ ހަތަރު ދުވަހުގެ ހަރަކާތެއް ކަމަށްވާ "ކޯ.ލެބް 26" އާއެކުގަ އެވެ. މި ހަރަކާތުގެ ފުރަތަމަ ދެ ދުވަހު އޭއައި ބޭނުންކުރާނެ މުހިންމު ދާއިރާތައް ދެނެގަތުމާއި ޒިންމާދާރުކަމާއެކު އޭއައި ބޭނުންކުރުމާ ގުޅޭގޮތުން މަޝްވަރާކުރެވޭނެ އެވެ.
މި ޕްރޮގްރާމުގެ ފަހު ދެ ދުވަހު ކުރިއަށްދާނީ ތަޖުރިބާކާރުންގެ އިރުޝާދާއެކު ބާއްވާ ހާއްސަ ހެކަތަންއެކެވެ. މި ހެކަތަންގައި ސަރުކާރުގެ މަސައްކަތްތަކަށް އޭއައި ބޭނުންކުރާނެ ގޮތްތައް ދެނެގަތުމަށް ހާއްސަ "އެޕްލައިޑް އޭއައި ޓްރެކް" އާއި، ބީއެމްއެލްގެ 'ސްވައިޕް އޭޕީއައި' ބޭނުންކޮށްގެން ކުރިއަށްގެންދާ "ފިންޓެކް އިނޮވޭޝަން ޓްރެކް" ހިމެނެ އެވެ.
ބޭންކް އޮފް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، ކަސްޓަމަރުންގެ ބޭނުންތައް ދެނެގަތުމާއި، ސްކޭމްތައް ދެނެގަތުމާއި، ސައިބަރ ސެކިއުރިޓީ ވަރުގަދަކުރުމުގެ އިތުރުން، އަވަސް އަދި މައުލޫމާތުގެ މައްޗަށް ބިނާވެފައިވާ ނިންމުންތައް ނިންމުމުގެ ގާބިލުކަން އޭއައިއަށް ލިބިގެންވާ ކަމަށެވެ. އަދި ޓެކްނޮލޮޖީ އަކީ މިހާރު ހަމައެކަނި މަސައްކަތަށް އެހީތެރިވެދޭ އެއްޗެއް ނޫން ކަމަށާއި، އެއީ އިގްތިސާދީ ބައިވެރިވުން ބައްޓަންކުރާ މުހިންމު ވަސީލަތެއްކަން އޭނާ ފާހަގަކުރެއްވި އެވެ.
މައިންޑްކޯގެ މެނޭޖިންގ ޑިރެކްޓަރ ސައީދާ އުމަރު ވިދާޅުވި ގޮތުގައި، މިފަދަ މަރުކަޒެއްގެ ސަބަބުން ރާއްޖޭގެ އަމިއްލަ އޭއައި އަދި ޑޭޓާގެ ގާބިލުކަން ބިނާކުރުމަށް ފުރުސަތު ލިބި، ދިވެހި ހުނަރުވެރިން ބިނާކުރުމަށް މަގުފަހިވާނެ އެވެ. މިއީ ވަކިވަކިން ކުރެވޭ މަސައްކަތްތަކުގެ ބަދަލުގައި، މުޅި ގައުމަށް އަމާޒުކޮށްގެން ނިޒާމީ ސިފައެއްގައި ކުރިއަށްދާނެ މަސައްކަތެއްކަން އޭނާ ފާހަގަކުރެއްވި އެވެ.
މިނިސްޓަރ އަލީ އިހުސާންގެ ވާހަކަފުޅުގައި، އޭއައި ބޭނުންކުރަންވާނީ ދިވެހިންގެ ލާބައާއި މަންފާއަށްޓަކައި ކަމަށް ވިދާޅުވި އެވެ. އަދި ރާއްޖޭގެ ޓެކްނޮލޮޖީ ދާއިރާ ކުރިއެރުވުމަށާއި، ސަރުކާރުގެ ހިންގުން ހަރުދަނާކޮށް އިގްތިސާދީ ކުރިއެރުން ހޯދުމަށް ސަރުކާރާއި އަމިއްލަ ފަރާތްތައް ގުޅިގެން މަސައްކަތްކުރުމުގެ މުހިންމުކަން މިނިސްޓަރ ފާހަގަކުރެއްވި އެވެ.
