ދަރިވަރުން ވިސާ އަށް ފައިސާ ދެއްކުމަށް ޚާއްސަ ލިމިޓެއް ދޫކުރުމަށް ބީއެމްއެލުން ނިންމައިފި
ރާއްޖެއިން ބޭރުގައި ކިޔަވާ ދަރިވަރުންގެ ވިސާ ފީ ދެއްކުމުގައި ދިމާވާ ދަތިތަކަށް ހައްލެއް ހޯދައިދިނުމުގެ ގޮތުން، އެމްއެމްއޭގެ އެހީތެރިކަމާއެކު ބީއެމްއެލް އިން ކާޑުތަކަށް ޚާއްސަ ލިމިޓެއް ދޫކުރަން ވަނީ ނިންމާފައި. މި ބަދަލާއެކު، ދަރިވަރުން ބޭންކަށް ހުށަހެޅުމުން ވިސާ އާއި އައިއެޗްއެސް ފަދަ ޕޭމަންޓްތައް ދެއްކޭނެ އިންތިޒާމު ހަމަޖެހިގެންދާނެ. މީގެ އިތުރުން، ބޭރުގައި ކިޔަވާ ދަރިވަރުންގެ ޓިއުޝަން ފީ އާއި ދިރިއުޅުމުގެ ޚަރަދުތަކަށް ބޭނުންވާ ބޭރު ފައިސާ ޓީޓީ މެދުވެރިކޮށް އަދި މަހަކު 1200 ޑޮލަރުގެ ކާޑު ލިމިޓެއްގެ ދަށުން މިހާރުވެސް ދަނީ ފޯރުކޮށްދެމުން.
ބީއެމްއެލް ސްކޮލާޝިޕް ފަންޑް 2024 ގެ ދަށުން މަތީ ތައުލީމު ހާސިލުކުރުމުގެ ފުރުސަތު ލިބުނު ދަރިވަރުންތަކެއް ބީއެމްއެލްގެ ސީއީއޯ ޝަރީފާއެކު. | ބީއެމްއެލް
ރާއްޖޭން ބޭރުގައި ކިޔަވާ ހުރިހާ ދަރިވަރުން ވިސާ އަށް ފައިސާ ދެއްކުމަށް، ދަރިވަރުންގެ ކާޑުތަކަށް ޚާއްސަ ލިމިޓެއް ދޫކުރުމަށް ބޭންކް އޮފް މޯލްޑިވްސް (ބީއެމްއެލް) އިން ނިންމައިފި އެވެ.
ބީއެމްއެލުން މި ނިންމުން ނިންމިއިރު، އިނގިރޭސިވިލާތުގައި ކިޔަވާ ދަރިވަރުންގެ ވިސާ ހެއްދުމަށް ދައްކަންޖެހޭ އިމިގްރޭޝަން، ހެލްތު ސާޗާޖް (އައިއެޗްއެސް) އެބޭންކްގެ ކާޑު މެދުވެރިކޮށް ދެއްކޭނެ އެއްވެސް ގޮތެއް ނެތް ކަމަށް ބުނެ ގިނަ ބެލެނިވެރިންނާއި، ދަރިވަރުން ކަންބޮޑުވުންފާޅު ކުރަން ފެށުމާއެކު އެކަން މީޑިއާތަކުގައި ވަނީ ރިޕޯޓު ކޮށްފަ އެވެ.
މި މައްސަލައާ ގުޅިގެން ބީއެމްއެލްގެ ސްޕޯކްޕަރސަން މުހައްމަދު ސައީދު ވިދާޅުވީ، ރާއްޖެއިން ބޭރުގައި ކިޔަވާ ދަރިވަރުންނަށް ވިސާ އަށް ފައިސާ ދެއްކުމަށް މީގެ ކުރިން ''ކޭސްބައި ކޭސް'' އަށް ބެލުމަށް ފަހު ބޭންކުން އައީ ކާޑަށް ލިމިޓް ދެމުން ކަމަށެވެ.
މި ބޭނުމަށް ދަރިވަރުންނަށް ބޭރު ފައިސާ ހަމަޖައްސައި ދިނުމަށް އެމްއެމްއޭގެ އެހީތެރިކަމާއެކު ބުރާސްފަތި ދުވަހުން ފެށިގެން ހުރިހާ ދަރިވަރުންނަށް ވެސް ވިސާ އަށް ފައިސާ ދެއްކުމަށް ބޭންކަށް އެދި ހުށަހެޅުމުން ކާޑަށް ލިމިޓް ދިނުމަށް ނިންމާފައިވާ ކަަމަށް ސައީދު ވިދާޅުވި އެވެ.
މީގެ އިތުރުން ބީއެމްއެލް އިން ވަނީ ރާއްޖޭން ބޭރުގައި ކިޔަވާ ދަރިވަރުންނަށް ބޭނުންވާ ޓިއުޝަން ފީ އާއި ދިރިއުޅުމުގެ ޚަރަދުތަކަށް ބޭނުންވާ ބޭރު ފައިސާ ފަސޭހަކަމާއެކު ހަމަޖެއްސޭނެ އިންތިޒާމުތަކެއް ހަމަޖައްސައިދީފަ އެވެ.
އެގޮތުން ބޭރު ފައިސާއިން މުއާމަލާތްކުރުމަށް ރުފިޔާ ކާޑަށް ދަރިވަރުންނަށް މަހަކަށް 1،200 ޑޮލަރުގެ ލިމިޓެއް ބީއެމްއެލުން ވަނީ ކަނޑާއަޅާފަ އެވެ. އަދި ދަރިވަރުންގެ ނުވަތަ ބެލެނިވެރިޔާގެ ރުފިޔާ އެކައުންޓުން ޓިއުޝަން ފީ އާއި ތައުލީމާ ގުޅުންހުރި އެހެނިހެން ޚަރަދުތަކަށް ޓެލެގްރަފިކް ޓްރާންސްފާ (ޓީޓީ) މެދުވެރިކޮށް ފައިސާ ފޮނުވުމުގެ ފުރުސަތު ފަހިކޮށްދީފައިވާ ކަަމަށް ބީއެމްއެލުން ބުނެ އެވެ.
