ޓިޕް ދޭންޖެހޭލެއް ގިނަކަމުން ވޯލްޑްކަޕް ބަލަން އެމެރިކާއަށް ދިޔަ ސަޕޯޓަރުން ފޫހިވެއްޖެ

ވޯލްޑް ކަޕް ބެލުމަށް އެމެރިކާއަށް ގޮސް އުޅޭ ބައިނަލްއަގުވާމީ ގިނަ ސަޕޯޓަރުންތަކެއް، އެ ގައުމުގައި ޚިދުމަތްދޭ މުވައްޒަފުންނަށް "ޓިޕް" ނުވަތަ ޚިދުމަތް ދިނުމުން ފައިސާ ދޭންޖެހޭ ސަގާފަތާ މެދު ހިތްހަމަނުޖެހުން ފާޅުކުރަން ފަށައިފި އެވެ. ބީބީސީއާ ވާހަކަދެއްކި ބައެއް ސަޕޯޓަރުން ބުނި ގޮތުގައި، ކޮންމެ ކަމަކަށް ޓިޕް ދޭންޖެހުމުގެ ސަބަބުން މިހާރު ވަނީ އެކަމަށް ފޫހިވާން ފަށާފަ އެވެ.

އިނގިރޭސިވިލާތުގެ ސަޕޯޓަރެއް ކަމަށްވާ ޖެފް ޕްރަޔާ ބުނި ގޮތުގައި، ރަނގަޅު ޚިދުމަތެއް ލިބުމުން ޓިޕް ދިނުމަކީ އޭނާއަށް ބަލައިގަނެވޭ ކަމެކެވެ. ނަމަވެސް، ފެންފުޅިއެއް ފަދަ އެއްޗެއް ގަންނަ އިރުވެސް، އެއްވެސް އިތުރު ޚިދުމަތެއް ނުދީ ޓިޕް ހޯދަން މަސައްކަތް ކުރުމަކީ ވަރަށް "އާދަޔާ ޚިލާފު" ކަމެއްގެ ގޮތުގައި އޭނާ ސިފަކުރި އެވެ.

އެމެރިކާގެ ބައެއް ރެސްޓޯރެންޓްތަކާއި ބާރތަކުގައި މަސައްކަތްކުރާ މުވައްޒަފުންނަށް ގަޑިއަކު އުޖޫރައިގެ ގޮތުގައި ލިބެނީ އެންމެ 2 ޑޮލަރަށްވުރެ ކުޑަ މިންވަރެކެވެ. އެހެންކަމުން، ދިރިއުޅުމުގެ ޚަރަދުތައް ހަމަޖެއްސުމަށްޓަކައި، ކަސްޓަމަރުން އަތުން ބިލުގެ ޖުމްލަ އަދަދުގެ 20 އިންސައްތަ ޓިޕްގެ ގޮތުގައި ލިބޭނެ ކަމަށް އެ މުވައްޒަފުން އުންމީދު ކުރެ އެވެ.

މި މައްސަލައިގައި ޚިދުމަތްދޭ މުވައްޒަފުންގެ ވެސް ޝަކުވާތަކެއް އެބަހުއްޓެވެ. އެކަކު ބުނި ގޮތުގައި، ވޯލްޑް ކަޕަށް އައިސް އުޅޭ ގިނަ ފަތުރުވެރިންނަކީ އެކަށީގެންވާ ވަރަށް ޓިޕް ދޭ ބައެއް ނޫނެވެ.

އޮސްޓްރޭލިއާގެ ދެ ސަޕޯޓަރުން ކަމަށްވާ ކްރިސް އޯފްލިން އަދި ރޮބަޓް މެކްނަމާރާ ބުނި ގޮތުގައި، ފުޓްބޯޅަ މެޗުތަކުގެ ޓިކެޓް އަގުބޮޑުވުމުގެ ސަބަބުން އެމީހުންގެ އަތުން ގިނަ ފައިސާތަކެއް ވަނީ ހޭދަވެފަ އެވެ. އަދި އޭގެ އިތުރުން ޓިޕް ދޭންޖެހުމުން ޚަރަދުތައް އިންތިހާއަށް ބޮޑުވަމުންދާ ކަމަށް އެމީހުން ފާހަގަކުރި އެވެ.

"މި ސަގާފަތް އޮންނަންޖެހޭ ސަބަބެއް އަދިވެސް އަހަންނަކަށް ނުވިސްނޭ. އޮސްޓްރޭލިއާގައި އޮންނަނީ ކަނޑައެޅިފައިވާ ވަކި އަގެއް، އެ އަގު އަހަރެމެން ދައްކަނީ. އެކަމަކު މިތަނުގައި މީހުން ޓިޕަށް އެދޭ، ނޫނީ ޓިޕް ލިބޭނެ ކަމަށް އުންމީދުކުރޭ. ބައެއް ފަހަރު ދޭންޖެހެނީ ކިހާ ވަރެއްކަމެއްވެސް ނޭނގޭ،" އޯފްލިން ބުންޏެވެ.

"މިތަނަށް އައިސް އުޅޭ ގިނަ އޮސްޓްރޭލިއާ މީހުން ގަބޫލުކުރާ ގޮތުގައި، މުވައްޒަފުންނަށް ރަނގަޅު އުޖޫރައެއް ދިނުމަކީ ވިޔަފާރިވެރިންގެ ޒިންމާއެއް. މުވައްޒަފުންނަށް ރަނގަޅު މުސާރައެއް ލިބޭކަން ކަށަވަރުކުރަން ޖެހޭނީ ވިޔަފާރިން، ކަސްޓަމަރުންނެއް ނޫން."

މެކްނަމާރާ ބުނި ގޮތުގައި، އެ ގައުމަށް ޒިޔާރަތްކުރާ ބައެއްގެ ހައިސިއްޔަތުން އެތަނުގެ އާދަކާދަތަކަށް ބޯލަނބަން އެމީހުން މަސައްކަތް ކުރެ އެވެ. ނަމަވެސް ޓިޕް ދިނުމުގެ ސަގާފަތަކީ އެމީހުންނަށް ބޮޑު ސިހުމެއް ލިބުނު ކަމެކެވެ.

"ކޮންމެ ބުއިމަކަށް ފަހު އެމީހުން ޓިޕަށް އުންމީދުކުރޭ. އެހެންވީމާ ވަރަށް އަވަހަށް ޚަރަދު ބޮޑުވެގެންދޭ. ބުއިމެއް ގަނެފައި އޭގެ އިތުރަށް 5 ޑޮލަރު ދޭންޖެހުމަކީ ބަލައިގަންނަން އުނދަގޫ ކަމެއް،" މެކްނަމާރާ ބުންޏެވެ. ޓިޕް ނުލައިވެސް ތަކެތީގެ އަގުތައް ހުރީ ވަރަށް މަތީގައި ކަމަށް އޭނާ ފާހަގަކުރި އެވެ.

އިނގިރޭސިވިލާތުގެ މީހެއް ކަމަށްވާ ޖެފް ޕްރަޔާ، މުބާރާތް ބަލަން އެމެރިކާގެ އެކި ސިޓީތަކަށް ދަތުރުކުރަމުންދާއިރު، ފެންފުޅިއަކަށް ޓިޕް ދޭންޖެހުމުން ހިތްހަމަނުޖެހުނު ނަމަވެސް، ރެސްޓޯރެންޓްތަކުގައި ޓިޕް ދިނުމުގެ މުހިންމުކަން އޭނާއަށް ވިސްނެ އެވެ.

"އަހަންނަށް އެނގޭ އިނގިރޭސިވިލާތާ އަޅާބަލާއިރު މިތަނުގެ މުވައްޒަފުންނަށް މުސާރަ ލިބޭލެއް މަދުކަން. އަދި އާންމުކޮށް ޚިދުމަތްތައް ވެސް ރަނގަޅު. އެހެންވީމާ ޚިދުމަތް ރަނގަޅު ނަމަ އެމީހުންނަށް ރަނގަޅު ޓިޕެއް ހައްގުވޭ،" އޭނާ ބުންޏެވެ.

ޓޯކިޔޯއިން ޑެލަސްއަށް ޖަޕާން ކުޅޭ މެޗު ބަލަން އައިސް އުޅޭ މައިކޯ އަސާހީ އާއި އޭނާގެ އާއިލާއިން ބުނި ގޮތުގައި، ޓިޕް ދިނުމަކީ އެމީހުންގެ ގައުމުގައި ކުރާ ކަމެއް ނޫނެވެ. "ޓިޕް ނުލައިވެސް އަގުތައް ހުރީ ވަރަށް ބޮޑުކޮށް. ޓިޕާ އެކު އަގުތައް އަތްނުފޯރާ ފަށަށް ދޭ،" އަސާހީ ބުންޏެވެ.

އޭނާގެ ދަރިފުޅާއެކު ދަތުރުކުރަމުންދާ ޖަޕާނުގެ އެހެން ސަޕޯޓަރެއް ކަމަށްވާ އަކިހީރޯ ވެސް ވަނީ އަގުތައް ބޮޑުވުމުގެ ޝަކުވާ ކޮށްފަ އެވެ.

"ރެސްޓޯރެންޓަކުން ލިބޭ އެންމެ އަގުހެޔޮ ކެއުމުގެ އަގުވެސް އުޅެނީ ގާތްގަނޑަކަށް 30 ޑޮލަރުގައި. އޭގެ މައްޗަށް 13 އިންސައްތައާއި 20 އިންސައްތައާ ދެމެދުގެ ޓިޕެއް އިތުރުކުރުމުން، އެ ޓިޕަށް ދިޔަ ފައިސާއިން އިތުރު ކެއުމެއް ގަނެވޭނެއޭ ހިތަށް އަރާ،" އޭނާ ބުންޏެވެ.

ރެސްޓޯރެންޓްގެ ވެރިޔަކު ބުނާ ގޮތުގައި ޓިޕް ނުލިބޭ ނަމަ މުވައްޒަފުންނަށް ދިރިއުޅުމަކީ މުސްތަހީލު ކަމެކެވެ.

ކެލިފޯނިއާގެ ލޮސް އެންޖެލިސްގައި، ޓިޕް ލިބޭ މުވައްޒަފުންގެ އަސާސީ އުޖޫރައަކީ ގަޑިއަކު 16.20 ޑޮލަރެވެ. މިއީ މުޅި އެމެރިކާގައި ވެސް މިފަދަ މުވައްޒަފުންނަށް ދޭ އެންމެ މަތީ އުޖޫރަތަކުގެ ތެރޭގައި ހިމެނޭ އަދަދެކެވެ.

ލޮސް އެންޖެލިސްގެ ޑައުންޓައުންގައި ޖަރުމަނު ކެއުންތަކަށް ޚާއްސަ ރެސްޓޯރެންޓެއް ކަމަށްވާ "ވޯސްޓްކޫޗޭ" ހިންގާ ޖޯސެފް ޕިޓްރުޒެލީ ބުނި ގޮތުގައި، ވޯލްޑް ކަޕް ދުވަސްވަރު ޓިޕް ދޭ މިންވަރަށް މާ ބޮޑު ބަދަލެއް އައިތަނެއް އޭނާއަކަށް ނުފެނެ އެވެ.

"އަހަރެމެން ލަފާދެނީ 10، 15 ނުވަތަ 20 އިންސައްތައިގެ ޓިޕެއް ދިނުމަށް. އެކަމަކު ބައެއް ތަންތަނުން 20، 25 ނުވަތަ 30 އިންސައްތަ ދިނުމަށް ވެސް އެދޭ. އެއީ ވަރަށް ބޮޑު އަދަދެއް،" އޭނާ ބުންޏެވެ.

"އަހަރެމެންނަށް ލިބޭ ޓިޕް ފައިސާ ބަހާލަނީ ކަސްޓަމަރުންނަށް ފުރިހަމަ ޚިދުމަތެއް ދިނުމުގައި ބައިވެރިވާ ހުރިހާ މުވައްޒަފުންގެ މެދުގައި. އޭގެ ތެރޭގައި ތަށި ދޮންނަ މީހުންނާއި، ބަދިގޭގެ ކައްކާ މީހުންނާއި، ވެއިޓަރުން ވެސް ހިމެނޭ."

އިންޑިޕެންޑެންޓް ރެސްޓޯރެންޓް ކޯލިޝަންގެ ބޯޑު މެންބަރެއް އަދި "އެލް ޕޮންސޭ" ރެސްޓޯރެންޓްގެ ވެރިޔާ ރޯސާ ތާންހާ ބުނި ގޮތުގައި، ވޯލްޑް ކަޕްގެ ސަޕޯޓަރުން އަންނަން ފެށި ފަހުން ޓިޕް ދޭ އުސޫލަށް ބަދަލުތަކެއް އައިސްފައިވާކަން ވިޔަފާރިތަކަށް ވަނީ ފާހަގަކުރެވިފަ އެވެ. ދުނިޔޭގެ އެކި ހިސާބުތަކުގައި މިކަން އޮންނަ ގޮތް ތަފާތު ނަމަވެސް، އެމެރިކާގެ މި ސިނާއަތުގައި ޓިޕް ދޭންޖެހޭ މިންވަރު ވަރަށް ތަފާތެވެ. މިތަނުގައި 20 އިންސައްތައަކީ އާންމު މިންގަނޑެވެ.

"އެއީ މައިގަނޑު ގޮތެއްގައި މިތަނުގެ އެންމެ ކުޑަ އުޖޫރައާއި މުސާރަ ދިނުމުގެ އޮނިގަނޑު އޮންނަ ގޮތް ވަރަށް ތަފާތުވުމުގެ ސަބަބުން ދިމާވާ ކަމެއް،" އޭނާ ކިޔައިދިނެވެ.

މިސާލަކަށް އެޓްލާންޓާގައި، ޓިޕް ލިބޭ ވެއިޓަރަކަށް ނަގުދު ފައިސާއިން ދޭ އެންމެ ކުޑަ އުޖޫރައަކީ ގަޑިއަކު 2.13 ޑޮލަރެވެ. ލިބޭ ޓިޕާއި މުސާރަ އެއްކޮށްލުމުން އެ ސްޓޭޓްގެ އެންމެ ކުޑަ އުޖޫރަ ކަމަށްވާ 7.25 ޑޮލަރަށް ނުއަރާ ނަމަ، އެ ފަރަގު ފޫބައްދައިދޭން ޖެހެނީ ވަޒީފާދޭ ފަރާތުންނެވެ.

"އެމީހުންނަށް އެއްވެސް ޓިޕެއް ނުލިބޭ ނަމަ، ޚިދުމަތްދޭ ދާއިރާގައި ދިރިއުޅުމަކީ މުސްތަހީލު ކަމެއް،" ތާންހާ ބުންޏެވެ.

އެމެރިކާގެ ސްޓޭޓްތަކަށް ރެސްޓޯރެންޓް މުވައްޒަފުންގެ މުސާރަ ބޮޑުކުރުމަށް ގާނޫނު ހެދި ނަމަވެސް، އެމެރިކާ ސަރުކާރުން ވެސް ބަލަނީ ޓިޕަކީ އެފަދަ މުވައްޒަފުންގެ އާމްދަނީގެ މައިގަނޑު އަދި ކޮންމެހެން ލިބެންޖެހޭ ބައެއްގެ ގޮތުގައެވެ.