ބައެއް ގާނޫނުތައް ހަދާފައި ހުންނަގޮތުން ރަށްފުށުގައި ދިރިއުޅޭ ރައްޔިތުން ތިބީ ކަސްތޮޅު އެޅުވިފައި: މެންބަރު ސަމީރު
ރަށްވެހިކަމުގެ ގާނޫނަށް ހުށަހަޅާފައިވާ އިސްލާހަށް ބަހުސްކުރައްވަމުން، ރަށްފުށުގެ ރައްޔިތުންނަށް ލިބެންޖެހޭ ހައްގުތަކުން މަހުރޫމުވެފައިވާތީ އެކަން ބަދަލުކުރަންޖެހޭ ކަމަށް ތޮއްޑޫ ދާއިރާގެ މެންބަރު ސަމީރު ވިދާޅުވި. އާންމު ޚިދުމަތްތައް ހޯދުމުގައި ވަކި ރަށަކަށް ނިސްބަތްވާތީ ކުރިމަތިވާ ތަފާތުކުރުންތައް ނައްތާލައި، ހުރިހާ ރައްޔިތުންނަށް ހަމަހަމަކަމާއެކު ޚިދުމަތް ލިބޭނެ ގޮތަށް ގާނޫނުތައް އިސްލާހުކުރުމަށް އޭނާ ގޮވާލެއްވި. އެހެންކަމުން ރައްޔިތުންނަށް ކުރިމަތިވެފައިވާ ތަކުލީފުތަކަށް ހައްލެއް ހޯދުމަށް މި ބިލު ފާސްކުރުން މުހިންމުކަން މެންބަރު ފާހަގަކުރެއްވި.
ރައްޔިތުންގެ މަޖިލީހުގައި ތޮއްޑޫ ދާއިރާގެ މެންބަރު ހުސެއިން ސަމީރު ވާހަކަ ދައްކަވަނީ. | ރާއްޖެއެމްވީ
ރާއްޖޭގައި ބައެއް ގާނޫނުތައް ހަދާފައިވާ ގޮތުން ރަށްފުށުގައި ދިރިއުޅޭ ރައްޔިތުން ތިބީ ކަސްތޮޅު އެޅުވިފައި ކަމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެ އެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުޙައްމަދު އިބްރާހީމް ހުށަހެޅުއްވި ރަށްވެހިކަމުގެ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުން މެންބަރު ސަމީރު ވިދާޅުވީ ބައެއް ގާނޫނުތައް ހަދާފައި ހުންނަގޮތުން ރަށްރަށުގައި ދިރިއުޅޭ ރައްޔިތުން ކަސްތޮޅު އެޅުވިފައިވާ ކަމަށާއި، ލިބެންޖެހޭ އެތައް ހައްގަކުން މަހުރޫމްވެފައިވާ ކަމަށެވެ. އަދި އެކަމުގެ ސަބަބުން އުފުލަން ނުޖެހޭ އެތައް ތަކުލީފެއް އުފުލަން ޖެހިފައިވާ ކަމަށް މެންބަރު ސަމީރު ވިދާޅުވި އެވެ.
މެންބަރު ސަމީރު ވިދާޅުވީ މިކަން ބަދަލު ކުރާން ޖެހޭ ކަމަށާއި، ރަށްވެހިކަމުގެ ގާނޫނަށް އިސްލާހު ގެންނަން ޖެހޭ ކަމަށެވެ.
އަޅުގަނޑުމެންނަށް އެނގޭ އަޅުގަނޑުމެންގެ ވެރިކަމުގައި އޮންނަ ފަރާތްތަކުން ނޫނީ އަޅުގަނޑުމެންގެ ގާނޫނުހަދާ މަޖިލީހެއް ހެދޭ ގާނޫނުގެ ސަބަބުން އަޅުގަނޑުމެންގެ ރަށްފުށުގައި އުޅޭ މީހުން އެޅިފައި ހުރި ކަސްތޮޅު. އަޅުގަނޑުމެންނަށް ލިބެންވާ އެތައް ބައިވަރު ހައްގެއް އަޅުގަނޑުމެންގެ މައިންބަފައިން އުފުލަންނުޖެހޭ އެތައް ބައިވަރު ތަކުލީފެއް އަޅުގަނޑުމެން އުފުލާފައި މި ތިބީ. އަޅުގަނޑުމެން މިއަދު ނަޒަރު ހިންގާ ބަލައިލާއިރު، މި މަޖިލީހުގެ ބޮޑު ބައެއް މި ބުނާ، ރާއްޖެތެރޭ ރަށްފުށު މީހުންނަށް ނިސްބަތްވާއިރުގައި އަޅުގަނޑު ގަބޫލެއް ނުކުރަން، މިފަދަ ގާނޫނުތަކަކީ އިސްލާހުނުވެ، މިފަދަ ކަސްތޮޅުތަކުގައި އަޅުގަނޑުމެން އެޅެން ތިބެންޖެހޭނެކަން. އަޅުގަނޑުމެން މިއަދު އުފާވޭ، މި ރައްޔިތުންގެ މަޖިލީހުގެ އިއްޒަތްތެރި ރައީސަކީ ވެސް ރާއްޖެތެރޭ ރަށަކަށް ވާ މީހަކަށްވާތީ.ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު
މެންބަރު ސަމީރު ވިދާޅުވީ، ރައްޔިތުންގެ މަޖިލީހުގެ މެންބަރުންނަކީ ވެސް ވަކި ރަށެއް، ވަކި ބައެއް ނުވަތަ ވަކި ކުލައަކަށް ބެލުމެއް ނެތި ހަމަހަމަކަމާއެކު ހުރިހާ ރައްޔިތުންނަށް ޚިދުމަތް ކުރަން ޖެހޭ ބައެއް ކަމަށާއި، ގާނޫނުތައް ވެސް އެގޮތަށް ހަދަން ޖެހޭ ކަމަށެވެ. އަދި ވިދާޅުވީ ވަކި ދާއިރާއަކުން އިންތިޚާބު ކުރި ނަމަވެސް ވަކި ރަށެއް ތަމްސީލު ކުރަން ނުޖެހޭ ކަމަށާއި، މަސައްކަތް ކުރަން ޖެހޭނީ ހުރިހާ ރައްޔިތުންގެ ހައްގުގައި ކަމަށެވެ.
ނަމަވެސް އާއްމު ޚިދުމަތްތައް ދެމުންދާއިރު، ވަކި ރަށަކަށް، ވަކި ތަނަކަށް ނިސްބަތްވާތީވެ އެމީހަކު ވަރަށް ގިނަ ހައްގުތަކުން މަހުރޫމުވާ ކަމަށެވެ.
އެހެންކަމުން މިފަދަ މައްސަލަތައް ހައްލު ކުރުމަށް ރަށްވެހިކަމުގެ ގާނޫނަށް ހުށަހަޅާފައިވާ އިސްލާހު ބަލައިގަނެ، ފާސް ކުރަން ޖެހޭ ކަމަށް މެންބަރު ސަމީރު ގޮވާލެއްވި އެވެ.
