އުރުގުއޭ މުބާރާތުން ކެޓުން - "ވިހަ" މީހެއް ކަމަށް އަމިއްލަ އަށް ސިފަކުރި ހެޑް ކޯޗު ބުނީ މި މާޔޫސްކަމުގެ ޒިންމާ އުފުލަނީ އޭނާ ކަމަށް

ގުއަޑަލަހާރާގައި ސްޕެއިން އަތުން 1-0 އިން ބަލިވުމާއެކު، ދެ ފަހަރު ވޯލްޑް ކަޕް ކާމިޔާބުކޮށްފައިވާ އުރުގުއޭ، ޖެހިޖެހިގެން ދެވަނަ ފަހަރަށް މުބާރާތުގެ ގްރޫޕް ސްޓޭޖުން ކަޓައި، ބޮޑު ލަދަކާ ކުރިމަތިލާން ޖެހިއްޖެ އެވެ.

މި ނަތީޖާއަކީ އެ ޓީމުގެ ހެޑް ކޯޗު މާސެލޯ ބިއެލްސާ އުރުގުއޭ ޓީމާ އެކު ކުރަމުންދިޔަ އުނދަގޫ މަސައްކަތްތައް ސިފަކޮށްދޭ ނަތީޖާއެކެވެ.

ސައުދީ އަރަބިއްޔާ އަދި ކޭޕް ވާޑްއާ ދެކޮޅަށް ކުޅުނު މެޗުތައް އެއްވަރުވެ، ޔޫރަޕްގެ ޗެމްޕިއަން ސްޕެއިންއާ ދެކޮޅަށް ރަނގަޅު ނަތީޖާއެއް ހޯދަން މަޖުބޫރުވި ހާލަތުގައި ވެސް ކަންތައް ކުރި ފަދައިން، މި ނާކާމިޔާބީގެ ޒިންމާ ވެސް ބިއެލްސާ އެޅުވީ އަމިއްލަ ބޮލުގަ އެވެ.

މުބާރާތް ފެށުމުގެ ކުރިން ނޫސްވެރިންގެ ގާތުގައި އޭނާއަކީ "ވިހަ" (ޓޮކްސިކް) މީހެއް ކަމަށް ބުނި އުމުރުން 70 އަހަރުގެ ބިއެލްސާ ބުނީ، މި މާޔޫސްކަމުގެ ޒިންމާ އުފުލަނީ އޭނާ ކަމަށެވެ.

ބިއެލްސާ އިތުރަށް ބުނީ، އޭނާގެ ކޯޗުކަމުގެ ދަށުން ޓީމުން ދެއްކި ކުޅުން މާނަކޮށްދޭން ނުޖެހޭނެ ކަމަށާއި، ގައުމީ ޓީމާއެކު އޭނާ ހޭދަކުރި ދުވަސްތައް ހަނދާން ކުރެވޭނީ އެއްވެސް ކުރިއެރުމެއް ނުލިބުނު ދުވަސްތަކެއްގެ ގޮތުގައި ކަމަށެވެ.

"އަހަރެން އުރުގުއޭގެ ފުޓްބޯޅައަށް ދޫކޮށްފައިދާނެ އެއްވެސް ކަމެއް ނެތް. ސަބަބަކީ ތިން އަހަރު ވަންދެން މަސައްކަތް ކުރި ގައުމަކަށް އަހަރެން ކޮށްދޭ ކޮންމެ ޚިދުމަތަކީ، ނަތީޖާ ނުނެރެވޭ ނަމަ އޭގެ ބޭނުމެއް ހިފޭނެ ކަންކަމެއް ނޫން،" ބިއެލްސާ ބުންޏެވެ.

އެހެން ކަންކަން ހުރި ނަމަވެސް، ބިއެލްސާގެ ތިން އަހަރުގެ ދައުރުގައި އެންމެ ބޮޑަށް ފާހަގަކުރެވޭނެ އެއް ކަމަކީ، ސްޕެއިން މެޗުގެ ފުރަތަމަ ހާފުގައި ހެދުނު ގޯހަކުން ސްޕެއިންއަށް ލީޑު ލިބުމާ ގުޅިގެން، ލެޖެންޑަރީ ގޯލްކީޕަރު ފެނާންޑޯ މުސްލޭރާ ހާފް ޓައިމްގައި ބަދަލުކުރުމެވެ.

އުމުރުން 40 އަހަރުގެ މުސްލޭރާ، ބިއެލްސާގެ އެދުމުގެ މަތިން މާޗް މަހު ގައުމީ ޓީމަށް ކުޅުން ހުއްޓާލާފައި އޮތް އޮތުން ނިމުމަކަށް ގެނެސް އެނބުރި އައި ނަމަވެސް، އޭނާ ވެފައިވަނީ އެއް ވޯލްޑް ކަޕެއްގައި ބައިކޮޅަށް ގޯލު ވަންނަން މެދުވެރިވި ތިން ގޯސް ހެދި ފުރަތަމަ ކީޕަރަށެވެ.

ބިއެލްސާ ބުނި ގޮތުގައި މުސްލޭރާ ބަދަލުކުރީ އޭނާ އަމިއްލައަށް އެދިގެންނެވެ. އަދި ދެވަނަ ހާފުގައި ކެޕްޓަން ފެޑެރީކޯ ވަލްވާޑޭ ބަދަލުކުރީ އެޓޭކަށް އިތުރު ބާރެއް ގެނައުމަށް ކަމަށް ވެސް އޭނާ ކިޔައިދިނެވެ.

"އަހަރެން ނިންމި ނިންމުމަކީ މުސްލޭރާގެ އިތުބާރު ގެއްލުވާލުމަށް ނިންމި ނިންމުމެއް ނޫން، އޭގެ ބަދަލުގައި އެ އިތުބާރު ދެމެހެއްޓުމަށް ނިންމި ނިންމުމެއް،" ބިއެލްސާ ބުންޏެވެ.

2010 ވަނަ އަހަރުގެ ވޯލްޑް ކަޕް ސެމީ ފައިނަލަށް އުރުގުއޭ ދަތުރުކުރިއިރު ބޮޑު ދައުރެއް އަދާކުރި މުސްލޭރާ، ސްޕެއިން މެޗުގައި ކުޅުނީ އޭނާގެ 137 ވަނަ މެޗެވެ. މިއީ އޭނާ ގައުމީ ޓީމަށް ކުޅެދޭނެ ފަހު މެޗަށް ވުން ގާތެވެ.

އުމުރުން 70 އަހަރުގައި ބިއެލްސާގެ ކާމިޔާބު ކެރިއަރު ނިމުމަކާ ގާތްވެފައިވާއިރު، އުރުގުއޭއާއެކު އޭނާ ކުރި މަސައްކަތަކީ އެދެވޭ މަސައްކަތެއް ކަމަށް ބުނެވޭކަށް ނެތެވެ. އަދި ޓީމުގެ ކުޅުން ދަށްވެފައިވާ މިންވަރު ވަރަށް ސާފުކޮށް ފެންނަން އެބައޮތެވެ.

އެހެންނަމަވެސް، މި މުބާރާތުގައި ކުރިމަތިވި ގޮންޖެހުންތަކާއެކު ވެސް، ވޭތުވެދިޔަ ދެ އަހަރު ދެއްކި ކުޅުމަށްވުރެ ރަނގަޅު ކުޅުމެއްގެ ކުލަވަރު ބައެއް ފަހަރު ފެނިގެންދިޔަ އެވެ.

ފެށުން ވަރަށް ރަނގަޅެވެ. ގަތަރު ވޯލްޑް ކަޕަށްފަހު، އާ ޖީލެއް ބޭނުންވެފައި އޮތް އުރުގުއޭ ޓީމާ ބިއެލްސާ ހަވާލުވިއިރު، އެ ޓީމުގައި ތިބީ އޭނާގެ ހަލުވި އަދި އެޓޭކިންގް ސްޓައިލަށް ފެތޭ ކުޅުންތެރިންނެވެ.

ދެކުނު އެމެރިކާގެ ވޯލްޑް ކަޕް ކޮލިފައިންގައި އުރުގުއޭއިން ވަނީ އާޖެންޓީނާ އާއި ބްރެޒިލް ބަލިކޮށް، ފުރަތަމަ ހަ މެޗުގައި އެހެން ހުރިހާ ޓީމަކަށްވުރެ ގިނައިން ލަނޑު ޖަހާފަ އެވެ.

ނަމަވެސް، 2024 ވަނަ އަހަރުގެ ކޮޕާ އެމެރިކާއަށްފަހު ހުރިހާ ކަމެއް ބަދަލުވި އެވެ. ގިނަ ލަނޑުތަކަކާއެކު މުބާރާތް ފެށި ނަމަވެސް، މާ ގިނަ ދުވަސްތަކެއް ނުވެ ޓީމުގެ ކުޅުން މުޅިން ހުއްޓުމަކަށް އައެވެ.

ނޮވެމްބަރު މަހު އެމެރިކާ އަތުން 5-1 އިން ބަލިވިއިރު، މާޗް މަހު ވެމްބްލީގައި އިންގްލެންޑާ ދެކޮޅަށް ކުޅުނު މެޗުގައި ޓީމަށް ބޯޅަ ހިފަހައްޓާލެވުނީ ކިރިޔާ އެވެ. މިއީ ބިއެލްސާގެ ޓީމަކުން ފެންނާނެ ކަމަށް އުންމީދު ކުރެވޭނެ ކަމެއް ނޫނެވެ.

މިހާ ބޮޑަށް ކަންތައްތައް ގޯސްވީ ކީއްވެގެން؟

މީގެ ޖަވާބުގެ އެއްބައި އޮތީ ކޯޗުގެ އަމިއްލަ އިޚްތިޔާރުން ބޭރުގަ އެވެ. އުރުގުއޭގެ ގިނަ ކުޅުންތެރިންތަކަކަށް ކްލަބް ފެންވަރުގައި އެދެވޭ ކުޅުމެއް ނުދެއްކޭކަން ފާހަގަކުރެވެ އެވެ. ފެޑެރީކޯ ވަލްވާޑޭ ރެއާލް މެޑްރިޑްގައި ތަރިއެއްގެ ގޮތުގައި ހުރި ނަމަވެސް، މި މުބާރާތުގައި އޭނާއަށް އެދެވޭ ނަތީޖާއެއް ނެރެދެވިފައެއް ނުވެ އެވެ.

ރޮޑްރީގޯ ބެންޓަންކޫރް، މެނުއަލް އުގާޓޭ، ފަކުންޑޯ ޕެލިސްޓްރީ އަދި ޑާވިން ނޫނޭޒް ފަދަ ކުޅުންތެރިންގެ ކުޅުން ވަނީ މަޑުޖެހި ނުވަތަ ދަށަށް ގޮސްފަ އެވެ.

އެހެންނަމަވެސް، އަތުގައި ހުރި ވަސީލަތްތަކުގެ ބޭނުން ހިފައިގެން ބިއެލްސާއަށް މިއަށްވުރެ ރަނގަޅު ނަތީޖާއެއް ނެރެވޭނެ ކަމަށް ބެލެވުނެވެ.

ބިއެލްސާގެ ކުޅުމުގެ ވައްޓަފާޅި އެންމެންނަށް އެނގޭ ފެންވަރަށް ބަދަލުވީ ހެއްޔެވެ؟

އޭނާގެ "ހައި-ޕްރެސް" ސްޓައިލަކީ އެއްދުވަސްވަރެއްގައި އާ ކަމަކަށް ވިޔަސް، މިހާރު އެއީ އާންމު ކަމެކެވެ.

ބިއެލްސާ އަމިއްލައަށް ވެސް ޝައްކުތަކެއް އުފެދުނެވެ. ވޯލްޑް ކަޕްގެ ކުރިން އެއްވެސް އެކުވެރިކަމުގެ މެޗެއް ނުކުޅެ، އޭނާ އިސްކަންދިނީ ތަމްރީނުތަކަށެވެ. އެގޮތުން ވަލްވާޑޭ އަރިމަތިން ކުޅުވައި، ދެ ފޯވާޑުން ބޭނުންކޮށްގެން އާ ސިސްޓަމެއް ތައާރަފު ކުރި ނަމަވެސް، އެކަން ނާކާމިޔާބުވެ، ސައުދީ މެޗުގެ ހާފް ޓައިމްގައި އަނެއްކާވެސް އޭނާގެ އާންމު 4-3-3 ފޯމޭޝަނަށް ބަދަލުކުރަން ޖެހުނެވެ.

ދެވަނަ ހާފުގައި އަދި ކޭޕް ވާޑް މެޗުގައި ވެސް އުރުގުއޭއިން ފުރުސަތުތައް ތަނަވަސްކުރި އެވެ. އަމިއްލައަށް ދެ ގޯހެއް ނުހެދުނު ނަމަ، އެއް މެޗު ބާކީ އޮއްވައި އެ ޓީމު ގަދަ 32 އަށް ދަތުރުކުރީހެވެ.

ނަމަވެސް މައްސަލައަކީ ހަމައެކަނި ޓެކްޓިކްސްއެއް ނޫނެވެ. މީގެ އަސްލު ސަބަބަކީ ކުޅުންތެރިންނާއި ކޯޗާ ދެމެދު އޮތް ގުޅުން ކަމަށް ބެލެވެ އެވެ. 2024 ވަނަ އަހަރުގެ ކޮޕާ އެމެރިކާގައި އެކުގައި ހޭދަކުރި މަސްދުވަހުގެ ތެރޭގައި ޑްރެސިންގް ރޫމްގެ މަސްލަހަތު ވަނީ ގެއްލިފަ އެވެ.

ލުއިސް ސުއަރޭޒް ގައުމީ ޓީމަށް ކުޅުން ހުއްޓާލުމަށްފަހު ބޭއްވި ނޫސްވެރިންގެ ބައްދަލުވުމުގައި، ބިއެލްސާގެ ހަރުކަށިކަމާއި، ކުޅުންތެރިންނާ މެދު އަމަލުކުރާ ގޮތުގެ އިތުރުން ޓީމުގެ ތެރޭގައި އޮތް ނުތަނަވަސްކަމަށް ވަރަށް ބޮޑަށް ފާޑުކިޔާފައިވެ އެވެ.

ފާހަގަކޮށްލެވޭ ކަމަކީ، އުރުގުއޭގެ ތާރީޚުގައި އެންމެ ގިނަ ލަނޑު ޖެހި ސުއަރޭޒްގެ ވާހަކަތަކަށް ޓީމުގެ އެއްވެސް ކުޅުންތެރިއަކު ދެކޮޅު ހަދާފައި ނުވާކަމެވެ.

ސްޕެއިން މެޗުގެ ފަހުކޮޅު ރަތް ކާޑު ދެއްކި އަގުސްޓިން ކަނޯބިއޯ ވަނީ މީގެ ކުރިން ބިއެލްސާއާ ބޮޑު ދެބަސްވުމެއް ހިނގާފައިވާ ކަމަށް ބުނެފަ އެވެ. އޭނާ ބުނި ގޮތުގައި މައްސަލަ ގޯސްވީ އޭނާ އިށީނދެގެން އިން ގޮތަށް ކޯޗު ފާޑުކިޔުމުންނެވެ.

އެމެރިކާ އަތުން ބަލިވި މެޗަށްފަހު، ބިއެލްސާ ވަނީ އޭނާއަކީ މީހުންނާ ގުޅުން ބޭއްވުމުގައި އުނދަގޫތަކެއް ހުރި "ވިހަ" މީހެއްގެ ގޮތުގައި އަމިއްލައަށް ސިފަކޮށްފަ އެވެ.

މިއީ ބިއެލްސާގެ ތަފާތު މިޒާޖު، މިހާރުގެ ކުޅުންތެރިންނާ ނުގުޅޭ ކަމުގެ ހެއްކެކެވެ. މިހާރުގެ ކުޅުންތެރިން ބޭނުންވަނީ ކޯޗާ ގާތް ގުޅުމެއް ބޭއްވުމަށެވެ.

ބިއެލްސާ ގަބޫލުކުރާ ގޮތުގައި، ކުޅިވަރުގެ ސައިންސް ކުރިއަރާފައިވީ ނަމަވެސް، ޓީމެއް އެކަތިގަނޑަކަށް ހެދުމަށް ތައްޔާރީތަކަށްވުރެ ބޮޑަށް ބޭނުންވަނީ ކުޅުންތެރިންގެ ޝައުގުވެރިކަމެވެ. ނަމަވެސް ވޭތުވެދިޔަ ދެ އަހަރު އޭނާއަށް އެކަން ކުރެވިފައެއް ނުވެ އެވެ.

ބައެއް ފަހަރު އޭނާ ފެންނަނީ މިހާރުގެ ފުޓްބޯޅައާ ބީރައްޓެހި މީހެއްގެ ގޮތުގަ އެވެ. މެޗުތަކުގެ މެދުތެރެއިން ފެން ބޯންދޭ ވަގުތުކޮޅަށް (ހައިޑްރޭޝަން ބްރޭކްސް) ފާޑުކިޔަމުން އޭނާ ބުނީ އެއީ ފުޓްބޯޅައިގެ އަސްލު ގެއްލުވާލާ ކަމެއް ކަމަށެވެ.

މީގެ އިތުރުން، ވޯލްޑް ކަޕްގެ ރަސްމީ ފޮޓޯޝޫޓްގައި ބައިވެރިވާން ވެސް އޭނާ ދެކޮޅު ހެދި އެވެ. ބިންގަނޑަށް ބަލަހައްޓައިގެން ހުއްޓާ ފޮޓޯ ނެގުމުން އޭނާ ބުނީ "އަހަރެންނަކީ މޮޑެލެއް ނޫން" ކަމަށެވެ.

މި މުބާރާތަށްފަހު ބިއެލްސާ މަގާމުން ވަކިވާނެކަން ކުރިން ވެސް އެނގުނު ނަމަވެސް، އެކަމުން ވެސް ޓީމަށް އާ ރޫހެއް ނުލިބުނެވެ.

3.4 މިލިއަން މީހުންގެ ކުޑަ އާބާދީއެއް އޮތް ނަމަވެސް، ދުނިޔޭގެ ފުޓްބޯޅައިގައި ބޮޑު ނަމެއް އޮތް އުރުގުއޭ އަދި އެނބުރި އަންނާނެ އެވެ.

ނަމަވެސް ބިއެލްސާއަށް ބަލާއިރު، ފުޓްބޯޅައިގެ އެންމެ ތަފާތު އެއް ކޯޗުގެ ކެރިއަރު މިވަނީ ނިމުމަކާ ގާތްވެފަ އެވެ.