އޭއައިއާ ގުޅޭ ޤަވާއިދު ތަކެއް އެކުލަވާލުމަށް، މެކްރޮން ގޮވާލައްވައިފި

ތަރައްޤީ ވެފައިވާ އާޓިފިޝަލް އިންޓެލިޖެންސް ނުވަތަ އޭއައި ނިޒާމުތައް ރެގިއުލޭޓު ކުރުމުގައި އެކުގައި މަސައްކަތް ކުރުމަށް، ފްރާންސްގެ ރައީސް އިމަނުއެލް މެކްރޮން ދުނިޔޭގެ ޤައުމު ތަކަށް ގޮވާލައްވައިފި އެވެ. 

މެކްރޮން މިފަދައިން ގޮވާލައްވާފައި ވަނީ އޭއައި ދާއިރާގެ އެންމެ އިސް އެގްޒެކެޓިވް އިން ބައިވެރިވި މަތީ ފެންވަރުގެ ބައްދަލުވުމެއްގައި ދެއްކެވި ވާހަކައިގަ އެވެ. 

އޯޕަން އޭއައި ކުންފުނީގެ ވެރިޔާ ސޭމް އޯލްޓްމަން ވެސް ވަނީ ފްރާންސްގައި ބޭއްވި ގްރޫޕް އޮފް ސެވަން ނުވަތަ ޖީ ސެވަން ސަމިޓުގައި އެފަދަ ގޮވާލުމެއް ގޮވާލައްވައިފަ އެވެ. އޭނާ ވިދާޅުވީ އޭއައި ގަވާއިދުތައް އެކުލަވާލުމަށް ގައުމު ތަކަށް ބައިނަލްއަގުވާމީ އެއްބާރުލުމެއް ބޭނުންވާ ކަމަށެވެ. އޭނާ ވިދާޅުވީ އޭއައި ސަލާމަތީ ކަންކަން ޓެކްނޮލޮޖީ ކުންފުނި ތަކަށް ދޫކޮށްލުން ރަނގަޅު ނޫން ކަމަށެވެ.

އޭއައި ބާރުވެރި ކުރުމާ ބެހޭ މަޝްވަރާ ތަކުގައި މިފަދަ ވާހަކަ ތަކެއް އައިސްފައިވަނީ ރައީސް ޑޮނަލްޑް ޓްރަމްޕްގެ ސަރުކާރުން ފާއިތުވި ހަފްތާގައި ނެރުއްވި އަމުރެއް މެދުވެރިކޮށެވެ. އެ އަމުރުގައި ބިދޭސީ ރައްޔިތުންނަށް އެންތްރޮޕިކް ކުންފުނީގެ އެންމެ ފަހުގެ އަދި އެންމެ ބާރު ގަދަ އޭއައި މޮޑެލްތައް ބޭނުން ކުރުން މަނާ ކޮށްފައިވެ އެވެ.

ފްރާންސްގެ ރައީސް މެކްރޮން ވިދާޅުވީ، އެމެރިކާގެ އޮފިޝަލުން ފްރޮންޓިއާ އޭއައި މޮޑެލްތައް ނުރައްކާތެރި ކަމަށް ގަބޫލު ކުރެއްވުމަކީ ރަނގަޅު ކަމެއް ކަމަށެވެ. ނަމަވެސް އެކަމަށް ނެގި ފިޔަވަޅަކީ މުޅިން ގައުމީ ވަންތަކަމުގެ ރައްދެއް ކަމަށް ވިދާޅުވެ، މެކްރޮން އެކަމަށް ފާޑު ކިޔުއްވި އެވެ.

ފްރާންސްގައި ކުރިއަށް ދިޔަ ޖީ7 ގެ ބައްދަލުވުމުގައި އޭއައި ދާއިރާގެ މުހިންމު ބޭފުޅުން ވެސް ބައިވެރިވެ ވަޑައިގެންނެވި އެވެ. އޭގެ ތެރޭގައި ބާރުގަދަ ތިން، އޭއައި ކުންފުނީގެ ވެރިން ހިމެނި ވަޑައިގަންނަވަ އެވެ. އެއީ އޯލްޓްމަން އާއި ގޫގުލް ޑީޕްމައިންޑްގެ ވެރިޔާ ޑެމިސް ހަސަބިސް އަދި އެންތްރޮޕިކްގެ ވެރިޔާ ޑާރިއޯ އަމޯޑޭ އެވެ. ބައްދަލުވުމުގެ މައުޟޫޢަކީ އޭއައި ސަލާމަތާއި އަވަހަށް އަދި ފައިދާ ހުރި ގޮތުގައި ތަންފީޒު ކުރުމަށް ކަށަވަރު ކުރުމެވެ.