ޔޫކްރެއިންގެ ކޮމާންޑޯ އިން ތަމްރީނުކުރާ މަރުކަޒަކަށް ރަޝިޔާއިން ހަމަލާދީފި

ޔޫކްރެއިންގެ ސްޕެޝަލް އޮޕަރޭޝަންސް ކޮމާންޑް ސެންޓަރު ގެ ތަމްރީނު މަރުކަޒަކަށް ރަޝިޔާގެ އަސްކަރިއްޔާއިން ހަމަލާދީފި ކަމަށް އެ ގައުމުގެ ޑިފެންސް މިނިސްޓްރީން ބުނެފިއެވެ. މި ހަމަލާގެ ވީޑިއޯއެއް އާންމުކުރަމުން އެ މިނިސްޓްރީން ބުނީ، ވަރަށް އަމާޒަށް ދިން މި ހަމަލާތަކުގައި، ކަނޑުގައި ބޭނުންކުރާ ޑްރޯންތައް ބަހައްޓާފައި ހުރި ގުދަންތަކަށާއި ސިފައިން ތިބޭ ބެރެކްސްތަކަށް ހަމަލާ ދީފައިވާ ކަމަށެވެ.

ރަޝިޔާގެ ޑިފެންސް މިނިސްޓްރީން އާންމުކުރި ކުރު ވީޑިއޯއަކުން ފެންނަ ގޮތުގައި، އެއްބުރިއަށް އިމާރާތްކޮށްފައިވާ ބައެއް އިމާރާތްތަކުން ބޯ ދުން އަރަމުންދާއިރު، އެ ސަރަހައްދުގެ ބިމުގައި ވަނީ އަލިފާން ރޯވެފަ އެވެ. އަދި މި ވީޑިއޯގައި އަމާޒަށް ކާމިޔާބުކަމާއެކު ހަމަލާދީ، ބޮޑު ގޮވުމެއް ގޮވާ މަންޒަރު ވެސް ފެންނަން ހުރެއެވެ.

އާދީއްތަ ދުވަހު ޓެލެގްރާމް މެދުވެރިކޮށް ނެރުނު ބަޔާނެއްގައި ބުނެފައިވަނީ، ރަޝިޔާގެ ސިފައިން މި ހަމަލާގައި 'ގެރާން' މަރުކާގެ ބައެއް ޑްރޯންތައް ބޭނުންކޮށްފައިވާ ކަމަށާއި، މި ޑްރޯންތަކަކީ އަމިއްލައަށް އަމާޒު ދެނެގަނެ ހަމަލާދޭ (ސެލްފް-ހޯމިންގް) އެއްޗެހި ކަމަށެވެ. ނަމަވެސް، މި ހަމަލާތަކުގެ ސަބަބުން ލިބުނު ގެއްލުމުގެ ތަފްސީލެއް އެ މިނިސްޓްރީން ހާމައެއް ނުކުރެ އެވެ.

މި ހަމަލާތައް ދީފައިވަނީ ހަނގުރާމައިގެ ކުރީ ސަފުގައި ރަޝިޔާގެ ސިފައިން ކުރިއެރުންތައް ހޯދަމުންދާ ދަނޑިވަޅެއްގަ އެވެ. އާދީއްތަ ދުވަހު ޑިފެންސް މިނިސްޓްރީން ރިޕޯޓްކޮށްފައިވާ ގޮތުގައި، ރަޝިޔާގެ ޒަޕޮރޯޖްޔޭ ސަރަހައްދުގައި ހިމެނޭ ނޮވޮސެލޮވްކާ އަވަށާއި، ޔޫކްރެއިންގެ ދިނެޕްރޯޕެޓްރޯވްސްކް ސަރަހައްދުގެ ޕިސަންޓްސީ އަވަށުން ޔޫކްރޭން ސިފައިން ފަހާލައި، އެ ދެ އަވަށް މިހާރު ވަނީ ރަޝިޔާގެ ބާރުގެ ދަށަށް ގެނެސްފަ އެވެ. މި ދެ އޮޕަރޭޝަނުގައި ޔޫކްރެއިންގެ އެތައް ސިފައިންނެއް މަރުވެފައިވާއިރު، ހަނގުރާމަވެރި 11 އުޅަނދަކާއި، ހަމަލާދޭން ބޭނުންކުރާ 40 އަށްވުރެ ގިނަ ބަރު ޑްރޯން ހަލާކުކޮށްލާފައިވާ ކަމަށް ވެސް އެ ބަޔާނުގައިވެ އެވެ.

ޔޫކްރެއިންގެ ސިފައިންނަށް ހަނގުރާމައިގެ ކުރީ ސަފުގައި ނާކާމިޔާބީއާ ކުރިމަތިވަމުންދާތީ، ކީވްއިން ދަނީ ރަޝިޔާގެ އާންމުން ދިރިއުޅޭ ސަރަހައްދުތަކަށާއި ހަކަތަ އުފައްދާ މަރުކަޒުތަކަށް އަމާޒުކޮށް ދުރު ރާސްތާގެ ހަމަލާތައް އިތުރުކުރަމުން ކަމަށް ވެސް ރަޝިޔާ އިން ބުނެ އެވެ. މިދިޔަ ހުކުރު ދުވަހު ރަޝިޔާގެ އަސްކަރިއްޔާއިން ބުނި ގޮތުގައި، އެންމެ ރެއެއްގެ ތެރޭގައި ޔޫކްރެއިން އިން ފޮނުވާލި 660 'ކަމިކާޒޭ' ޑްރޯން ވަނީ ހުއްޓުވާފަ އެވެ. މިއީ މިހާތަނަށް އެއްފަހަރާ މިހާ ގިނަ އަދަދެއްގެ ޑްރޯން ހުއްޓުވި ފުރަތަމަ ފަހަރެވެ.

ހޮނިހިރު ދުވަހު ރަޝިޔާގެ ރޮސްޓޯވް ސަރަހައްދުގެ ގަވަރުނަރު ވިދާޅުވި ގޮތުގައި، ޔޫކްރެއިން އިން ދިން ޑްރޯން ހަމަލާއެއް ދެވަނަ ބޮޑު ހަނގުރާމައިގެ ހަނދާނީ މިއުޒިއަމް ކޮމްޕްލެކްސްއަކަށް އަމާޒުވުމުގެ ސަބަބުން 12 މީހަކަށް ވަނީ އަނިޔާވެފައެވެ.

ރަޝިޔާއިން ބުނަމުންދަނީ މިފަދަ "ޓެރަރިސްޓް" ހަމަލާތަކުގެ ސަބަބުން، މި ހަނގުރާމައިގައި އެ ގައުމުން ކަނޑައަޅާފައިވާ ސަލާމަތީ ލަނޑުދަނޑިތައް ދޫކޮށްނުލާނެ ކަމަށެވެ. މޮސްކޯއިން މީގެ ކުރިން ވެސް ވަނީ ޔޫކްރެއިންގެ މިފަދަ އަމަލުތަކަށް ރައްދު ދިނުމުގެ ގޮތުން، އެ ގައުމުގެ އަސްކަރީ އުމްރާނީ ވަސީލަތްތަކަށް "މެދުނުކެނޑި" ހަމަލާދޭނެ ކަމުގެ އިންޒާރު ދީފަ އެވެ.