ވިޓްކޮފް އާއެކު މުހިންމު ފޯނު ކޯލެއް ކުރައްވާފައިވާ ކަމަށް ޒެލެންސްކީ ވިދާޅުވެއްޖެ

އެމެރިކާ ގެ ރައީސް ޑޮނަލްޑް ޓްރަމްޕް ގެ ޚާއްސަ މަންދޫބު ސްޓީކް ވިޓްކޮފް އާއެކު މުހިންމު ފޯނު ކޯލެއް ކުރައްވާފައިވާ ކަމަށް، ޔުކްރެއިން ގެ ރައީސް ވުލޮޑޮމިއަރ ޒެލެންސްކީ ވިދާޅުވެއްޖެ އެވެ.

ހޮނިހިރު ދުވަހު ޒެލެންސްކީ ވިދާޅުވެފައި ވަނީ ޓްރަމްޕް ގެ ޚާއްސަ މަންދޫބު ވިޓްކޮފް އަދި ޓްރަމްޕް ގެ ދަރިކަލުން ޖެރާޑް ކުޝްނާ އާއެކު ގިނަ ވަގުތު ތަކަށް ދެމިގެން ދިޔަ، ދިގު ފޯނު ކޯލެއް ކުރައްވާފައިވާ ކަމަށާއި، އެއީ ވަރަށް މުހިންމު ފޯނު ކޯލެއް ކަމަށެވެ.

ޒެލެންސްކީ ގެ އެކްސް އެކައުންޓު ގައި ކުރެއްވި ޕޯސްޓެއް ގައި އޭނާ ވިދާޅުވެފައި ވަނީ، ޔުކްރެއިން އަށް ހަގީގީ ސުލްޙައެއް ހޯދުމަށް އެމެރިކާގެ ފަރާތްތަކާ އެކު ހެޔޮ ނިޔަތުގައި މަސައްކަތް ކުރެވޭނެ ކަމުގެ ޔަގީންކަން އޮތް ކަމަށެވެ. ފޯނު ކޯލަށް އިޝާރާތް ކުރައްވައި ޒެލެންސްކީ ވިދާޅުވީ، އެމެރިކާ އާއެކު ކުރިއަށް ގެންދާނެ މަޝްވަރާތަކާއި، މަޝްވަރާތައް ކުރިއަށް ގެންދާނެ ގޮތްތައް އަދި ކުރިއަށް އޮތް ތަނުގައި އަޅާނެ ފިޔަވަޅު ތަކާ މެދު ވެސް އެއްބަސްވެވިފައިވާ ކަމަށެވެ.

މިދިޔަ ހަފުތާ ގެ ތެރޭގައި ވިޓްކޮފް އާއި ކުޝްނާ ވަނީ ޔުކްރެއިން ސަރުކާރު ގެ އިސް އޮފިޝަލުންނާ ވެސް ބައްދަލު ކުރައްވާފަ އެވެ. އެމެރިކާ ގެ މިއާމީގާއި ކުރިއަށް ދިޔަ އެ ބައްދަލުވުމުގައި ޔުކްރެއިންގެ ފަރާތުން އިސްކޮށް ބައިވެރިވެފައި ވަނީ ރުސްޓެމް އުމެރޮވް އެވެ. ދެ ދުވަހަށް ކުރިއަށް ގެންދިޔަ އެ ބައްދަލުވުމުގައި ވަނީ ބިނާކުރު ވަނިވި ގިނަ ކަންކަމަށް މަޝްވަރާ ކޮށްފައި ކަމަށް ހާމަ ކޮށްފައިވެ އެވެ.

އޭގެ ފަހުން ވިޓްކޮފް ވަނީ ރަޝިޔާ ގެ ވެރި ރަށް މޮސްކޯ އަށް ވަޑައިގެން، އެ ޤައުމު ގެ ރައީސް ވްލަޑިމިއަރ ޕުޓިންއާ ވެސް ބައްދަލު ކުރައްވައިފަ އެވެ. މީޑިއާ ތަކުގައި ބުނެފައިވާ ގޮތުން އެ ބައްދަލުވުމުގެ މައުލޫމާތު އުމްރޮވް އަށް ހިއްސާ ކުރާނެ ކަމަށް ބެލެވެ އެވެ. އެކަމާ ގުޅޭ ގޮތުން ޒެލެންސްކީ ވިދާޅުވެފައި ވަނީ، އުމެރޮވް އެނބުރި ޔުކްރެއިން އަށް ވަޑައިގެންނެވުމުން މަޝްވަރާ ތަކުގެ ތަފްސީލީ ރިޕޯޓެއް ލިބިވަޑައިގަންނަވާނެ ކަމަށެވެ.

އެކަން ފާހަގަ ކުރައްވައި ޒެލެންސްކީ ވިދާޅުވީ، ހުރިހާ ކަމަކީ ފޯނު ގުޅައިގެން މަޝްވަރާ ކުރެވޭނެ ކަންކަން ނޫން ކަމަށެވެ. އެހެންވެ، ހުށަހުޅުންތަކާއި، ޑިމާންޑުތަކާ ގުޅޭ ގޮތުން ޔުކްރެއިންގެ ޓީމުތަކާ އެކު ގާތުން މަސައްކަތް ކުރައްވަން ޖެހޭނެ ކަމަށެވެ. އަދި ވިދާޅުވީ ޔުކްރެއިންގެ އުސޫލަކީ ހުރިހާ ކަމެއް ވެސް އަމަލީ ގޮތެއްގައި ކުރުމުގެ އުސޫލު ކަމަށް ޒެލެންސްކީ ފާހަގަ ކުރެއްވި އެވެ.

ޒެލެންސްކީ އާއި ވިޓްކޮފް މަޝްވަރާ ކުރައްވާފައިވާއިރު، އެމެރިކާގެ ފަރާތުން ހަނގުރާމަ ނިންމުމަށް ހުށަހަޅާފައިވާ ޕްލޭންއާ ގުޅޭ ގޮތުން ގެންދަނީ މަޝްވަރާތައް ކުރިއަށް ގެންދަމުންނެވެ. ހަނގުރާމަ ނިންމުމަށް އެމެރިކާ އިން ވަރަށް ބޮޑަށް ބާރު އަޅަމުން އަންނައިރު، އެކަމުގައި އެއްބާރުލުން ދޭން ތައްޔާރަށް ތިބި ކަމަށް ޒެލެންސްކީ ވަނީ މީގެ ކުރިން ވެސް ހާމަ ކުރައްވާފަ އެވެ.