ހަނިމާދޫ ރައްޔިތުންނަށް ރުށްގަހުގެ ބަދަލެއް ނުލިބޭ، މިއީ ރުށްގަހުން ވެސް ވައްކަން ކުރާ ސަރުކާރެއް: ކައުންސިލްގެ ރައީސް

ހދ.ހަނިމާދޫ ރައްޔިތުންނަށް ރުށްގަސްތަކުން ލިބެންޖެހޭ ބަދަލު ނުލިބޭ ކަމަށާއި، މިއީ ރުށްގަހުން ވެސް ވައްކަން ކުރާ ސަރުކާރެއް ކަމަށް އެރަށުގެ ކައުންސިލްގެ ރައީސް އަލީ އިބްރާހިމް ވިދާޅުވެއްޖެ އެވެ.

ފަށާއިރު ޕްރޮގްރާމްގައި ކައުންސިލްގެ ރައީސް އަލީ ވަނީ ހަނިމާދޫ ރައްޔިތުންގެ ރުށްގަސްތައް ކަނޑާ މައްސަލައިގައި ކަންބޮޑުވުން ފާޅު ކުރައްވާފަ އެވެ. 

ހދ.ހިރިމަރަދޫ ރައްޔިތުން ހަނިމާދޫ އަށް ބަދަލު ކުރުމަށް މިސަަރުކާރުން ނިންމާފައިވާއިރު، އެރަށުން ކަނޑައަޅާފައިވާ ބިމަށް އިޝާރާތް ކުރައްވައި އަލީ ވިދާޅުވީ އެއީ ޗަކަ ބިމެއް ކަމަށާއި، އެބިމުގައި ވެސް ރައްޔިތުންގެ ވަރަށް ގިނަ ރުށްގަސް އެބަހުރި ކަމަށެވެ. އެއަށް ބަދަލު ދޭނެ ކަމަށް ސަރުކާރުން ބުނި ނަމަވެސް މިހާތަނަށް އެ މަސައްކަތް ކޮށްފައިނުވާ ކަމަށް އޭނާ ވިދާޅުވި އެވެ. އަދި ވިދާޅުވީ އެބިމުގައި ފެންސް ޖެހުމަށް ވެސް ބަދަލު ނުދީ ހާހަކަށް ނުވަތަ ދޮޅުހާހަކަށް ގާތްކުރާ އަދަދަށް ރުށްގަސް ނަގާ ވައްޓާލާފައިވާ ކަމަށެވެ. 

އަލީ ވިދާޅުވީ ރުށްގަސްތަކުގެ ބަދަލު ނުދޭތީ ރައްޔިތުން ވެސް ވަރަށް ބޮޑަށް ކަންބޮޑުވުން ފާޅު ކުރަމުންދާ ކަމަށެވެ. މިފައިސާ ލިބޭނެ ދުވަހެއް ވެސް ނޭނގޭ ކަމަށް އޭނާ ވިދާޅުވި އެވެ. 

އެ މިބިމުގައި މިހުންނަނީ ޗަކަ. އެޗަކަ ކަހާފައި ވެލި އަޅާފައި އެތާގައި ގެ އެޅޭނީ. އެތާގައި އެބަހުރި ރައްޔިތުންގެ 9000 ނުވަތަ 8000 ގާތްކުރާ އަދަދަށް ރުށްގަސް. އެރުށްގަހަށް ބަދަލު ދީފައި ނޫނީ އަޅުގަނޑުމެން މި ބުނަނީ އެރުށްގަސް ނުނަގާށޭ. އެހެންނަމަވެސް އަޅުގަނޑުމެންނަށް ފެނިގެންދިޔައީ މަސައްކަތް ކުރަން އައި އެޗްޑީސީގެ ބޭފުޅުން ރައީސުލްޖުމްހޫރިއްޔާ ވެސް ބޭނުންނުވާނެ ކަންނެންގެ އާއްމު ރައްޔިތުންގެ މުދަލަށް އަރައިގަނެފައި އެކަން ކުރާކަށެއް. ބަދަލު ނުދީއެއް. 

ހަނިމާދޫ ކައުންސިލްގެ ރައީސް އަލީ އިބްރާހިމް 

މީގެ އިތުރުން އަލީ ވަނީ ހަނިމާދޫ އެއަރޕޯޓު ހުޅުވިއިރު ސޭފް ޒޯން ސަރަހައްދުގައި ހުރި ރުށްގަސްތައް ނަގައި ބަދަލު ނުދޭ މައްސަލަ ވެސް ފާހަގަކުރައްވާފަ އެވެ. އަލީ ވިދާޅުވީ އެސަރަހައްދުން ވެސް ގާތްގަނޑަށް 9000 ށް ވުރެ ރުށް ނަގާފައިވާ ކަމަށާއި، މިއަދާ ހަމަައަށް ބަދަލު ދީފައިނުވާ ކަމަށެވެ. 

ދެން ހަމަ ރުށްގަހުގެ ކަންތަކުގައި އަޅުގަނޑުމެންނަށް އަނެއްކާ ވެސް ފެނިގެން މިދަނީ މިރަށުގައި އެއީ ވަރަށް ބޮޑު މައްސަލައެއް އާމިރު. އެއާޕޯޓު ހުޅުވިއިރު ސޭފް ޒޯން އެތަނުން ވެސް 9000ށް ވުރެ ގިނަ ރުށް ސޭފް ޒޯނުން ހަމަ ބަދަލު ދޭނަމޭ ރައްޔިތުން ކައިރީގައި ބުނެފައި ނަގާފި. ކައުންސިލުން ހުންނާނެ ކޮން ރައްޔިތުންގެ ރުށްގަހެއްތޯ ބަލާފައި އެ ރައްޔިތުންގެ އެކައުންޓާއި އަދަދާއި، ހުރިހާ އެއްޗެއް ފޮނުވާފައި. އަދި މިހާތަނަށް ލާރިއެއް ނުދޭ. އެކަމަކު ރުށްގަސްތައް ވައްޓާލާފައި.

ހަނިމާދޫ ކައުންސިލްގެ ރައީސް އަލީ އިބްރާހިމް 

އަލީ ވިދާޅުވީ ރުށްގަހަށް ދޭން ޖެހޭ ބަދަލު ނުދީ މިހައި ގިނަ ދުވަސްވެގެން ދިއުމަކީ ބަލައިގަނެވޭނެ ކަމެއް ނޫން ކަމަށެވެ. އަދި މިހާރު ފެންނަ މަންޒަރުތަކުން މިއީ ރުށްގަހުން ވެސް ވައްކަން ކުރާ ސަރުކާރެއް ކަމަށް އޭނާ ވިދާޅުވި އެވެ.