ހިރިމަރަދޫ ރައްޔިތުންނަށް ހަނިމަދޫގައި ގެ އަޅާ ސަރަހައްދު އެޗްޑީސީ އިން ސާފުކުރުމުގެ ތެރެއިން، ކައުންސިލަށް އެންގުމެެއް ނެތި ހަނިމާދޫ ދަނޑުވެރިންގެ އެތަކެއް ހާސް ރުއްގަހެއް މުލުން ލުހެލައިފި
23 މެއި 2026 | ހޮނިހިރު 13:10ހދ. ހިރިމަރަދޫ ރައްޔިތުން ހަނިމާދުއަށް ބަދަލުކުރުމަށްޓަކައި ގެތައް އަޅާ ސަރަހައްދު ސާފުކުރުމުގެ ތެރެއިން، ކައުންސިލްގެ ހުއްދައެއް ނެތި އެޗްޑީސީން ދަނޑުވެރިންގެ އެތައް ހާސް ރުއްގަހަކަށް ބޮޑެތި ގެއްލުންތަކެއް ދިނުމާ ގުޅިގެން އެ ރަށު ކައުންސިލުން ކަންބޮޑުވުން ފާޅުކޮށްފި. އެއްވެސް އެންގުމަކާ ނުލައި ހިންގި މި އަމަލުގެ ސަބަބުން ދަނޑުވެރިންގެ އަމިއްލަ މުދަލަށް ބޮޑެތި ގެއްލުންތަކެއް ލިބިފައިވާތީ، ކައުންސިލުން މިހާރު ވަނީ އެ ސަރަހައްދުގެ ހުރިހާ މަސައްކަތެއް ހުއްޓުވައި، ފުރިހަމަ ސާވޭއެއް ހެދުމަށް އަންގާފަ. ކައުންސިލުން ބުނީ ކޮންމެ ބަޔަކު މަސައްކަތް ކުރި ނަމަވެސް، އެކަން ކުރަންޖެހޭނީ ގާނޫނާއި ގަވާއިދުގެ ތެރެއިން ރައްޔިތުންގެ މުދަލަށް އިހުތިރާމްކޮށްގެން ކަމަށް.
އެއްވެސް ހުއްދައެއް ނުނަގާ އަންގަން ޖެހޭ އެއްވެސް އެންގުމެއް ނާންގާ އެޗްޑީސީ އިން ހަނިމާދޫ ރައްޔިތުންގެ އެތައް ހާސް ރުއްގަހެއް މުލުން ލުހެލާފަ | ރާއްޖެ އެމްވީ
ހދ. ހިރިމަރަދޫ ރައްޔިތުން އެ އަތޮޅު ހަނިމާދޫ އަށް ބަދަލުކުރުމަށްޓަކައި ގެތައް އެޅުމަށް ހަމަޖެހިފައިވާ ސަރަހައްދު ސާފުކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށް ގެންދިޔައިރު، އެއްވެސް ހުއްދައެއް ނުނަގާ އަދި ދުރާލާ އެންގުމަކާ ނުލާ ހަނިމާދޫ ދަނޑުވެރިންގެ އެތައް ހާސް ރުއްގަހަކަށް ބޮޑެތި ގެއްލުންތަކެއް ދީފި އެވެ.
މި މަސައްކަތުގެ ތެރެއިން އެ ސަރަހައްދުގައި ހުރި ދަނޑުވެރިންގެ މުދަލަށް އަރައިގަނެ، އެއްވެސް ބަދަލެއް ދިނުމަކާ ނުލާ ގިނަ އަދަދެއްގެ ކެޔޮގަސްތަކާއި ރުއްތައް ވަނީ ބިންމާ ހަމަކޮށްލާފަ އެވެ.
ހަނިމާދޫ ކައުންސިލްގެ ރައީސް އަލީ އިބްރާހިމް މިކަމުގެ ކަންބޮޑުވުން ފާޅުކުރައްވަނީ
މިކަމާ ގުޅިގެން ކަންބޮޑުވުން ފާޅުކުރައްވަމުން ހަނިމާދޫ ކައުންސިލްގެ ރައީސް އަލީ އިބްރާހިމް ވިދާޅުވީ، އެޗްޑީސީން މި މަސައްކަތް ކުރިއަށް ގެންގޮސްފައިވަނީ ކައުންސިލްގެ އެއްވެސް ހުއްދައެއް ހޯދުމެއް ނެތި ކަމަށެވެ. އަދި އެ ސަރަހައްދުގައި ހުރި ދަނޑުވެރިންގެ އަމިއްލަ މުދަލަށް ގެއްލުންދީފައިވަނީ އެއްވެސް ބެލުމެއް ނެތި ސައުތު އިންޑިއަން ފިލްމު ތަކުގައި ނިކަމެތި ރައްޔިތުންގެ މުދަލަށް ގެއްލުންދޭ އުސޫލުން ކަމަށް އޭނާ ސިފަކުރެއްވި އެވެ. ކައުންސިލްގެ ރައީސް ފާހަގަކުރެއްވި ގޮތުގައި، އެޗްޑީސީގެ ސާވޭ ޓީމުން ކައުންސިލާ ބައްދަލުކޮށް، ސާވޭއެއް ނުކޮށް އެންމެ ރުކެއް ވެސް ނުނަގާނެ ކަމުގެ ޔަގީންކަން ދީފައި ވަނިކޮށް، ފެނިގެންދިޔައީ ހައިމާކު ބޭނުންކޮށްގެން ދަނޑުތައް އެއްކޮށް ސުންނާފަތިކޮށްލާފައިވާ މަންޒަރު ކަމަށެވެ.
މި ހާދިސާގައި އެންމެ ބޮޑު ގެއްލުމެއް ލިބުނު އެއް ދަނޑުވެރިއަކު މައުލޫމާތު ދިން ގޮތުގައި، އެއްވެސް އެންގުމަކާ ނުލާ ހައިމާކު ބޭނުންކޮށްގެންް އޭނާގެ ދަނޑުގައި ހުރި 1،200 އެއްހާ ކެޔޮގަސް ވަނީ މުލުން ލުހެލާފަ އެވެ. މުޅި ޖުމްލަ އެ ސަރަހައްދުން އެކި މީހުންގެ 8،000 އަށްވުރެ ގިނަ ކެޔޮގަސް ހަލާކުކޮށްލާފައިވާ ކަމަށް ލަފާކުރެވެ އެވެ. މި ގަސްތަކުގައި ހުރި ކެޔޮގަނޑުތައް ކަނޑާލުމުގެ ފުރުސަތެއް ވެސް ދަނޑުވެރިންނަށް ދީފައެއް ނުވެ އެވެ.
އެޗްޑީސީގެ ސާވޭ ޓީމުން ބުނެފައިވަނީ އެ ސަރަހައްދުގައި ފެންސު ޖަހައި ރުއްގަސް ނަގަމުންދާކަން އެ ފަރާތަށް އެނގިފައި ނުވާ ކަމަށެވެ. މި މަސައްކަތަކީ ހީރޯ ކިޔާ ކުންފުންޏަކާ ހަވާލުކޮށްގެން އެޗްޑީސީން ކުރިއަށްގެންދާ ޕްރޮޖެކްޓެއް ކަމަށް މައުލޫމާތި ވަނީ ލިބިފަ އެވެ. ކައުންސިލުން މިހާރު ވަނީ މިހާރު އެ ސަރަހައްދުގެ ހުރިހާ މަސައްކަތެއް ހުއްޓުވާފައެވެ.
ހަނިމާދޫ ކައުންސިލުން ނިންމާފައިވަނީ، ދެން އެ ސަރަހައްދުގައި އެއްވެސް މަސައްކަތެއް ކުރިއަށް ގެންދެވޭނީ ފުރިހަމަ ސާވޭއެއް ހަދައި، އެތަނުގައި ހުރި ރުއްގަހާއި އެހެނިހެން ތަކެތީގެ ތަފްސީލު ދެނެގަތުމަށްފަހު ކަމަށެވެ. އަދި މިކަމުގައި ހަނިމާދޫ ރައްޔިތުންގެ ނިންމުމެއް އޮންނަން ޖެހޭނެ ކަމަށާއި، ކައުންސިލްގެ ހުއްދައާ ނުލާ އެއްވެސް ރުކެއް ނުވަތަ ގަހެއް ރަށުން ބޭރު ނުކުރެވޭނެ ކަމަށް ވެސް ކައުންސިލުން ވަނީ އަންގާފަ އެވެ. ކައުންސިލުން ބުނީ ކޮންމެ ބަޔަކު މަސައްކަތް ކުރި ނަމަވެސް، އެކަން ކުރަންޖެހޭނީ ގާނޫނާއި ގަވާއިދުގެ ތެރެއިން، ރައްޔިތުންގެ މުދަލަށް އިހުތިރާމްކޮށްގެން ކަމަށެވެ.
