ޖަޕާނުގައި 100 އަހަރުން މަތީގެ މީހުންގެ އަދަދު ގާތްގަނޑަކަށް 100،000 އަށް އަރައި ރެކޯޑެއް ހަދައިފި

ޖަޕާނުގެ ސަރުކާރުން އިއުލާން ކުރި ގޮތުގައި އެ ގައުމުގައި 100 އަހަރު ނުވަތަ އެއަށްވުރެ ދޮށީ އުމުރުގެ މީހުންގެ އަދަދު ރެކޯޑު އަދަދަކަށް އަރައިފިއެވެ.

އުމުރުން ދޮށީ މީހުންގެ އާބާދީ ވިދިވިދިގެން 55 ވަނަ އަހަރަށް ކޮންމެ އަހަރަކު އައު ރެކޯޑެއް ހަދަމުން، ސެޕްޓެމްބަރުގެ ނިޔަލަށް ޖަޕާނުގައި 100 އަހަރުން މަތީގެ މީހުންގެ އަދަދު 99،763 އަށް އަރާފައިވާ ކަމަށް ހެލްތު މިނިސްޓްރީން ހުކުރު ދުވަހު ބުންޏެވެ. މީގެ ތެރެއިން 88% އަކީ އަންހެނުންނެވެ.

ޖަޕާނަކީ ދުނިޔޭގައި އެންމެ ދިގު އުމުރު ލިބޭ ގައުމެވެ. އަދި ގިނަ ފަހަރަށް ދުނިޔޭގައި އެންމެ ދޮށީ އުމުރުގެ މީހާ ދިރިއުޅެނީ ވެސް ޖަޕާނުގައިކަން ފާހަގަކުރެވެއެވެ.

އަނެއް ކޮޅުން ޖަޕާނު ވެފައި ވަނީ އެންމެ ހަލުއި ކޮށް އާބާދީ ދޮށިވަމުންދާ އާބާދީ އޮތް ގައުމުތަކުގެ ތެރެއިން އެއް ގައުމު ކަމުގައެވެ.

ޖަޕާނުގެ ރައްޔިތުން ސިއްހަތަށް ފައިދާހުރި ކާނާ ކައިއުޅޭ ކަމަށް ފާހަގަ ވެފައިވާއިރު، އުފަންވާ ކުދިންގެ އަދަދު މަދެވެ.

ޖަޕާނުގައި އެންމެ ދޮށީ މީހާއަކީ ނާރާ ސިޓީގެ ބަނދަރު ސަރަހައްދު ކަމުގައިވާ ޔަމަތޯކޯރިޔާމާގެ 114 އަހަރުގެ ޝިގެކޯ ކަގަވާއެވެ. އެންމެ ދޮށީ ފިރިހެނަކީ އިވާޓާ ސިޓީގެ 111 އަހަރުގެ ކިޔޯތަކާ މިޒުނޯއެވެ.

ހެލްތު މިނިސްޓަރު ތަކަމަރޯ ފުކޯކާ ވަނީ ސަތޭކަ އަހަރު ފުރިފައިވާ 87،784 އަންހެނުންނާއި 11،979 ފިރިހެނުންނަށް އެމީހުންގެ ދިގު އުމުރަށް މަރުހަބާ ކިޔައި، "ގައުމު ތަރައްގީ ކުރުމަށް ގިނަ އަހަރުތަކެއް ވަންދެން ކޮށްފައިވާ ހިދުމަތްތަކަށް" ޝުކުރު އަދާކުރައްވާފައެވެ.

ސެޕްޓެމްބަރު 15 އަކީ ޖަޕާނުގެ އުމުރުން ދޮށީ މީހުންގެ ދުވަހެވެ. މިއީ ގައުމީ ބަންދު ދުވަހެކެވެ. މި ދުވަހު 100 އަހަރު ފުރޭ މީހުންނަށް ބޮޑުވަޒީރުގެ މަރުހަބާ ސިޓީއަކާއި ރިހި ތަށްޓެއް ލިބެއެވެ. މިއަހަރު 52،310 މީހުންނަށް މިކަމަށް ޝަރުތު ހަމަވިއެވެ.

1960 ގެ އަހަރުތަކުގައި، ޖީ7 ގައުމުތަކުގެ ތެރެއިން 100 އަހަރުން މަތީގެ މީހުންގެ ނިސްބަތް އެންމެ ދަށް ގައުމަކީ ޖަޕާނެވެ - ނަމަވެސް އޭގެ ފަހުގެ އަހަރުތަކުގައި މިކަން ވަރަށް ބޮޑަށް ބަދަލުވެފައިވެއެވެ.

1963 ގައި ސަރުކާރުން 100 އަހަރުން މަތީގެ މީހުންގެ ސަރވޭ ފެށިއިރު، 100 އަހަރު ނުވަތަ އެއަށްވުރެ ދޮށީ 153 މީހުން ތިއްބެވެ.

މި އަދަދު 1981 ގައި 1،000 އަށް އަރާ، 1998 ގައި 10،000 އަށް އަރާފައިވެއެވެ.

ދިގު އުމުރު ލިބުމުގެ މައިގަނޑު ސަބަބަކީ ހިތުގެ ބަލިތަކާއި އާންމު ކެންސަރުތަކުން، ޚާއްސަކޮށް އުރަމަތީ ކެންސަރާއި ޕްރޮސްޓޭޓް ކެންސަރުން މަރުވާ މީހުންގެ އަދަދު މަދުވުމެވެ.

ޖަޕާނުގައި ފަލަވުމުގެ ނިސްބަތް ދަށެވެ. މިއީ މި ދެ ބައްޔަކަށް މަގުފަހިވާ މައިގަނޑު ސަބަބެކެވެ. ފަލަވުމުގެ މައްސަލަ ދަށްވެފައި ވަނީ އެއްގަމު މަހުގެ ބަދަލުގައި މޫދުގައި ނުވަތަ ފެނުގައި އުޅޭ މަސްމަހާއި ތަރުކާރީ ގިނައިން ކެއުމުގެ ސަބަބުންނެވެ.

ފަލަވުމުގެ ނިސްބަތް ޚާއްސަކޮށް އަންހެނުންގެ މެދުގައި ދަށެވެ. މިއީ ޖަޕާނުގެ އަންހެނުންނަށް ފިރިހެނުންނަށްވުރެ ދިގު އުމުރު ލިބޭ އެއް ސަބަބު ކަމުގައި ވެދާނެއެވެ.

ދުނިޔޭގެ އެހެން ގައުމުތަކުގައި ކާނާގައި ހިމެނޭ ހަކުރާއި ލޮނުގެ މިންވަރު އިތުރުވަމުން ދިޔައިރު، ޖަޕާނުން ދިޔައީ އެހެން މަގަކުންނެވެ - އާންމު ސިއްހަތާ ގުޅޭ މެސެޖުތަކުގެ ސަބަބުން މީހުން ލޮނުގެ ބޭނުން މަދުކުރުމަށް ބާރުއެޅުނެވެ.

ނަމަވެސް މިއީ ހަމައެކަނި ކާނާގެ ސަބަބުން ނޫނެވެ. ޖަޕާނުގެ މީހުން ދޮށީ އުމުރުގައިވެސް ހަރަކާތްތެރިކޮށް އުޅެއެވެ. އެމެރިކާއާއި ޔޫރަޕުގެ ދޮށީ އުމުރުގެ މީހުންނާ އަޅާބަލާއިރު، ހިނގާބިނގާވެ އުޅުމާއި އާންމު ދަތުރުފަތުރުގެ ވަސީލަތްތައް ބޭނުން ކުރުން ޖަޕާނުގައި ގިނައެވެ.