އުރުދުން ގައި ވޯލްޑް ކަޕް މެޗު ބަލަން އެއްވި ބަޔަކު ތޮއްޖެހި ފިތި ބާރުވެގެން އެކަކު މަރުވެ، އެތައް ބަޔަކަށް އަނިޔާވެއްޖެ

އުރުދުންގެ ވެރިރަށް އައްމާންގައި ވޯލްޑް ކަޕް މެޗެއް ބަލަން އެއްވެ ތިބި އެތައް ހާސް ފުޓްބޯޅަ ސަޕޯޓަރުންގެ މެދުގައި ފިތި ބާރުވުމުގެ ހާދިސާއެއް ހިނގައި، އެކަކު މަރުވެ އަށް މީހަކަށް އަނިޔާވެއްޖެ ކަމަށް އެ ގައުމުގެ ކަމާބެހޭ އިދާރާތަކުން ބުނެފިއެވެ.

މި ހާދިސާ ހިނގާފައިވަނީ އަންގާރަ ދުވަހުގެ ކުރީކޮޅު ވޯލްޑް ކަޕްގައި އަލްޖީރިއާއާ ދެކޮޅަށް އުރުދުންގެ ގައުމީ ޓީމު ކުޅުނު މެޗަށް ސަޕޯޓްކުރުމަށްޓަކައި، އެ ގައުމުގެ "ހާޝިމައިޓް ޕްލާޒާ" އަށް ގިނަ އަދަދެއްގެ ބަޔަކު އެއްވެފައި ވަނިކޮށެވެ. މިއީ މެދުއިރުމަތީގެ މި ގައުމު ވޯލްޑް ކަޕަށް ކޮލިފައިވި ފުރަތަމަ ފަހަރެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ބޮޑެތި ސްކްރީންތަކުން މެޗު ބަލަން "ރޯމަން ތިއޭޓަރު" ސަރަހައްދަށް ގިނަ އަދަދެއްގެ ސަޕޯޓަރުން އެއްވެ ތިބުމުގެ ސަބަބުން އެ ތަން އޮތީ ވަރަށް ބޮޑަށް ތޮއްޖެހިފައެވެ.

އެއް ވީޑިއޯއަކުން ފެންނަ ގޮތުގައި، އެއްވެފައި ތިބި މީހުން ކޮންޓްރޯލުން ނެއްޓި، އެ ސަރަހައްދުގައި ވަނީ ވަރަށް ބޮޑު ހަލަބޮލިކަމެއް އުފެދިފައެވެ.

މީގެ އިތުރުން، އެހެން ވީޑިއޯތަކުން ފެންނަ ގޮތުގައި ކުއްލި ހާލަތްތަކުގައި ހަރަކާތްތެރިވާ ފަރާތްތަކާއި ސަލާމަތީ ބާރުތަކުން ދަނީ އަނިޔާވި މީހުންނަށް ފުރަތަމަ އެހީ ފޯރުކޮށްދީ، އެ މީހުން އެ ސަރަހައްދުން ބޭރަށް ނެރުމުގެ މަސައްކަތް ކުރަމުންނެވެ.

އުރުދުންގެ ޕަބްލިކް ސެކިއުރިޓީ ޑައިރެކްޓްރޭޓުން މައުލޫމާތު ދޭ ގޮތުގައި، މި ހާދިސާގައި އަނިޔާވި ނުވަ މީހަކު ހޮސްޕިޓަލަށް ގެންދެވުނު އިރު، އޭގެ ތެރެއިން އެކަކު ވަނީ ފަހުން މަރުވެފައެވެ. މަރުވި މީހާ މަރުވާން ދިމާވި ސަބަބު ދެނެގަތުމަށްޓަކައި ފޮރެންސިކް ތަހުލީލުތަކެއް ކުރުމަށް ކަމާބެހޭ އިދާރާތަކުން މިހާރު ވަނީ އަމުރުކޮށްފައެވެ.