ޑެންމާކުގައި ބަންގީގެ އަޑު އިއްވުން މަނާ ކުރަނީ

ޑެންމާކުގެ މުޅި ސަރަހައްދުގައި ބަންގީގެ އަޑު އިއްވުން މަނާކުރުމަށް އެ ގައުމުގެ ސަރުކާރުން ވިސްނަމުންދާ ކަމަށް ހާމަ ކޮށްފިއެވެ. އެ ގައުމުގެ އިމިގްރޭޝަން މިނިސްޓަރު މޯޓަން ބޮޑްސްކޯވް ވިދާޅުވި ގޮތުގައި، ބަންގީގެ އަޑަކީ ޑެންމާކުން ޖާގަދެވޭނެ ކަމެއް ނޫނެވެ. މި ނިންމުމަކީ އެ ގައުމުގައި "އިސްލާމީ ވަންތަކަން" ފެތުރުން ހުއްޓުވުމަށް ޑެންމާކް ސަރުކާރުން ފަށާފައިވާ ހަރުކަށި ފިޔަވަޅުތަކުގެ ތެރެއިން ނިންމުމެކެވެ.

ބުދަ ދުވަހު އެ ގައުމުގެ ޚަބަރު ފަތުރާ ވަސީލަތެއް ކަމަށްވާ "ރިޓްޒާއު" އަށް ދެއްވި ބަސްދީގަތުމެއްގައި، ވެރިކަންކުރާ ސޯޝަލް ޑިމޮކްރެޓްސް ޕާޓީގެ އިސް ބޭފުޅެއް ކަމަށްވާ ބޮޑްސްކޯވް ވިދާޅުވީ، މުޅި ޑެންމާކުގައި ބަންގި ގޮވުން ގާނޫނީ ގޮތުން މަނާކުރެވިދާނެތޯ ބެލުމަށްޓަކައި ކުރިއަށްގެންދާ ތަހުގީގުތައް އަލުން ފެށުމަށް ކަމާބެހޭ އިދާރާތަކުން ތައްޔާރުވަމުންދާ ކަމަށެވެ.

ބޮޑްސްކޯވް "ރިޓްޒާއު" އަށް ވިދާޅުވި ގޮތުގައި، ޑެންމާކުގެ ފުރާޅުތަކުގެ މަތިން ބަންގީގެ އަޑު އިވިގެން ނުވާނެއެވެ. އަދި ޑެންމާކުގެ މަގުތަކުގައި ހިނގާބިނގާވެ އުޅޭއިރު، ތިމާ ހުރީ ޕާކިސްތާނުގެ އިސްލާމްއާބާދުގެ އަވަށެއްގައި ކަމާމެދު އެއްވެސް މީހެއްގެ ހިތުގައި ޝައްކު އުފެދިގެން ނުވާނެ ކަމަށާއި، އެއީ ޑެންމާކުން ޖާގަދެވޭނެ ކަމެއް ނޫން ކަމަށްވެސް އޭނާ ވިދާޅުވިއެވެ.

ޑެންމާކުގެ ބައެއް ސިޓީތަކުގައި، އޭގެ ތެރޭގައި ކޯޕަންހޭގަން ހިމެނޭ ގޮތަށް، އަޑުގަދަކުރުމާ ގުޅޭ އާންމު ގަވާއިދުތަކުގެ ދަށުން ބަންގީގެ އަޑު ފެތުރުން މިހާރުވެސް ވަނީ ހަނިކޮށްފައެވެ. ނަމަވެސް، ގާތްގަނޑަކަށް ހަ މިލިއަން މީހުންގެ އާބާދީއެއް އޮންނަ ޑެންމާކުގައި "އިސްލާމީ ވަންތަކަން" އާންމު ތަންތަނުގައި މާ ބޮޑަށް ފާޅުވަމުންދާ ކަމަށް ބޮޑްސްކޯވް ވިދާޅުވިއެވެ. ޑެންމާކުގައި ގާތްގަނޑަކަށް 270،000 މުސްލިމުން (މުޅި އާބާދީގެ 5 އިންސައްތަ) ދިރިއުޅޭއިރު، އެ ގައުމުގައި ގާތްގަނޑަކަށް 100 މިސްކިތް ހުރެއެވެ.

ބަންގި މަނާކުރުމުގެ މި ހުށަހެޅުން އައިސްފައިވަނީ ބޮޑުވަޒީރު މެޓޭ ފްރެޑްރިކްސަންގެ ތިންވަނަ ދައުރު ފެއްޓެވި ދަނޑިވަޅެއްގައެވެ. މިދިޔަ މާރިޗު މަހު ބޭއްވި އިންތިޚާބުގައި، ދިރިއުޅުމުގެ ޚަރަދުތައް ބޮޑުވުމާއި، އިޖުތިމާއީ ރައްކާތެރިކަމުގެ ނިޒާމަށް އޮތް ޕްރެޝަރާއި، ހިޖުރަކުރާ މީހުންގެ މައްސަލައިގައި އާންމުންގެ ނުރުހުން އަމާޒުވުމުގެ ސަބަބުން، ފްރެޑްރިކްސަންގެ ސޯޝަލް ޑިމޮކްރެޓްސް ޕާޓީއަށް ވަނީ ފާއިތުވި ސަތޭކަ އަހަރު ތެރޭގައި ކުރިމަތިވި އެންމެ ދަށް ނަތީޖާ ލިބިފައެވެ.

މި ދަނޑިވަޅުގައި، މުސްލިމުން އެ ގައުމަށް ހިޖުރަކުރުން މުޅިން ހުއްޓުވުމަށް ކެމްޕޭން ކުރި ކަނާތު ފިޔައިގެ "ޑެނިޝް ޕީޕަލްސް ޕާޓީ" އަށް އޮތް ތާއީދު ވަނީ ގާތްގަނޑަކަށް ތިން ގުނަ އިތުރުވެފައެވެ.

މީގެ ރައްދުގައި ބޮޑުވަޒީރު ފްރެޑްރިކްސަން ވަނީ އާންމު ތަންތަނުގައި އިސްލާމީ ކަންކަން ފާޅުކުރުމާ ދެކޮޅަށް ގެންގުޅޭ ސިޔާސަތުތައް އިތުރަށް ހަރުކަށި ކުރައްވާފައެވެ. މީގެ ތެރޭގައި، މޫނު ބުރުގާ އެޅުން މަނާކޮށްފައި އޮތް އޮތުން ސްކޫލްތަކާއި ޔުނިވަރސިޓީތަކަށް ފުޅާކުރުމާއި، ކެމްޕަސްތަކުގައި ހުންނަ ނަމާދުކުރާ ކޮޓަރިތައް ނައްތާލުން ހިމެނެއެވެ.

މީގެ ކުރިންވެސް ފްރެޑްރިކްސަންގެ ސަރުކާރުން ވަނީ ހިޖުރަކުރާ މީހުންނަށް ހިމާޔަތް ދިނުމުގެ ގަވާއިދުތައް ހަރުކަށިކޮށް، ގިނަ އަދަދަކަށް ބޭރު މީހުން ދިރިއުޅޭ ސަރަހައްދުތަކަށް އަމާޒުކޮށް "ގެޓޯ" ގާނޫނުތައް ތައާރަފުކޮށްފައެވެ. އަދި އެ ގައުމުގެ ސަގާފަތާ އެކަށީގެންވާ މިންވަރަށް މަސްހުނިނުވާ ކަމަށް ބެލެވޭ އަވަށްތަކުން މީހުން އެހެން ތަންތަނަށް ބަދަލުކުރުމުގެ ބާރުވެސް ކަމާބެހޭ އިދާރާތަކަށް ވަނީ ދީފައެވެ.

ބަންގި މަނާކުރުމަށް ތާއީދުކުރާ ފަރާތްތަކުން ބުނާ ގޮތުގައި، މިއީ ޑެންމާކުގެ ސެކިއުލަރ މާހައުލު ރައްކާތެރިކުރުމަށާއި، އިސްލާމީ އާދަކާދަތަކުން އެ ގައުމު ދުރުކުރުމަށް ކުރާ ކަމެކެވެ. ނަމަވެސް، ފާޑުކިޔާ ފަރާތްތަކުން ބުނަނީ މިއީ ވަކި ދީނަކަށް އަމާޒުކޮށްގެން ކުރާ ކަމެއް ކަމަށާއި، މީގެ ސަބަބުން އަޅުކަން ކުރުމުގެ މިނިވަންކަމަށް ގާނޫނުއަސާސީން ދީފައިވާ ރައްކާތެރިކަމާ ޚިލާފުވެދާނެ ކަމަށެވެ.

މުޅި ޔޫރަޕްގައިވެސް މިހާރު ދަނީ ހިޖުރަކުރާ މީހުންނާއި އިސްލާމީ އާދަކާދަތަކާ ދެކޮޅަށް ވަރުގަދަ ރޫހެއް އުފެދެމުންނެވެ. އެގޮތުން ނެދަލޭންޑްސް، ބެލްޖިއަމް، އޮސްޓްރިއާ، ސްވިޒަލޭންޑް އަދި ޑެންމާކުން ވަނީ މޫނު ނިވާކުރުން މުޅިން ނުވަތަ ބައެއް ހާލަތްތަކުގައި މަނާކުރާ ގާނޫނުތައް ފަހަކަށް އައިސް ފާސްކޮށްފައެވެ.