ސަމްޕާ ސަރަހައްދަށް ވަދެވޭނީ ރަޖިސްޓްރީވެފައިވާ އުޅަނދުތަކަށް އެކަނިކަމަށް ކަނޑައަޅައިފި

އދ. އަތޮޅުގައި އޮންނަ ހިމާޔަތްކޮށްފައިވާ ސަރަހައްދެއް ކަމަށްވާ "ސައުތު އަރި މެރިން ޕްރޮޓެކްޓެޑް އޭރިއާ" (ސަމްޕާ) އަށް ދެން ވަދެވޭނީ އެކަމަށްޓަކައި ހާއްސަކޮށް ރަޖިސްޓްރީކޮށްފައިވާ އުޅަނދުތަކަށް އެކަނި ކަމަށް ސަރުކާރުން ނިންމައިފި އެވެ.

އެންވަޔަރަމެންޓް މިނިސްޓްރީން ބުނި ގޮތުގައި، ފެހުރިހި ބެލުމަށާއި ސްނޯކަލް އަދި ޑައިވް ކުރުމަށް އެ ސަރަހައްދަށް ވަންނަ ހުރިހާ އުޅަނދެއް މިހާރު ރަޖިސްޓްރީ ކުރަން ޖެހޭނެ އެވެ. މިގޮތުން އެ މިނިސްޓްރީގެ ކަމާ ގުޅޭ ޕޯޓަލް މެދުވެރިކޮށް އުޅަނދުތައް ރަޖިސްޓްރީ ކުރުމުގެ ފުރުސަތު މިހާރު ވަނީ ހުޅުވާލާފަ އެވެ.

އާ އުސޫލުގެ ދަށުން ސަމްޕާ ސަރަހައްދަށް ވަންނަ އުޅަނދުތަކުން ފުރިހަމަކުރަންޖެހޭ މުހިންމު ކަންތައްތަކެއް މިނިސްޓްރީން ވަނީ ހިއްސާކޮށްފަ އެވެ. އެގޮތުން އެ ސަރަހައްދަށް ވަނުމުގެ ކުރިން ރަޖިސްޓްރީ ކުރަން ޖެހޭއިރު، ރަޖިސްޓްރީ ކުރުމުން ދޫކުރާ ހާއްސަ ދިދަ އެ ސަރަހައްދުގައި އުޅޭއިރު ނަގާފައި ބަހައްޓަން ޖެހޭނެ އެވެ. މީގެ އިތުރުން އެ ސަރަހައްދަށް ވަނުމުގެ ކުރިން އެތަން ބެލެހެއްޓުމަށް ތިބޭ ރޭންޖަރުންނަށް އަންގަން ޖެހޭނެ ކަމަށާއި، އެ ސަރަހައްދުގައި ހަރަކާތްތެރިވާ ވަގުތު އުޅަނދުގެ "ލައިވް ލޮކޭޝަން" ހިއްސާކުރަން ޖެހޭނެ ކަމަށްވެސް މިނިސްޓްރީން ބުނެ އެވެ.

އެންވަޔަރަމެންޓް މިނިސްޓްރީން މި ފިޔަވަޅު އަޅަން ނިންމީ، އެކަށީގެންވާ ގަވައިދުތަކެއް ނެތުމާއި، ހެދިފައިވާ ގަވައިދުތަކަށް ބޯނުލެނބުމުގެ ސަބަބުން އެ ސަރަހައްދުގައި ހިތާމަވެރި ގިނަ ހާދިސާތަކެއް ހިނގާފައިވާތީ އެވެ. މިކަން ހައްލުކުރުމަށްޓަކައި ސަރުކާރުން ވަނީ މީގެ ކުރިންވެސް އެކި ފަހަރު މަތިން ގަވައިދުތައް ހަރުކަށިކޮށް، އެ ސަރަހައްދު ބެލެހެއްޓުން ފުލުހުންނާ ވެސް ހަވާލުކޮށްފަ އެވެ.

ސަމްޕާ ސަރަހައްދު ރައްކާތެރިކޮށް ދެމެހެއްޓުމަށް އެކުލަވާލާފައިވާ އާ މެނޭޖްމަންޓް ޕްލޭންގެ ދަށުން، އެ ސަރަހައްދުގައި ޖެޓް ސްކީ އާއި ޖެޓް ކާރު ފަދަ އުޅަނދުތައް ދުއްވުން މިހާރު ވަނީ މަނާކޮށްފަ އެވެ. އަދި އަދި ކަނޑުއަޑީގެ ދިރުންތަކަށް ލިބޭ ގެއްލުން ކުޑަކުރުމަށްޓަކައި، އެ ސަރަހައްދަށް ވަންނަ ސްނޯކަލް އަދި ޑައިވް ދޯނިފަހަރާއި ލޯންޗުތަކުގެ ބުރަފަތީގައި "ޕްރޮޕެލާ ގާޑު" މި މަސް ނިމުމުގެ ކުރިން ހަރުކުރުމަށް ވަނީ އަންގާފަ އެވެ.

މި ސަރަހައްދަކީ އދ. ރަންގަލި ފަރުގެ ހުޅަނގު އުތުރުން ފެށިގެން އެ އަތޮޅު ދިގުރަށުގެ އުތުރު ކަނާ ދެމެދު ހުރި ރަށްރަށުގެ ފަރުގެ ބޭރު ތޮށިން ފެށިގެން އެއް ކިލޯމީޓަރުގެ ސަރަހައްދެކެވެ. މީގެ 17 އަހަރު ކުރިން، 2009 ވަނަ އަހަރު ހިމާޔަތްކޮށްފައިވާ މި ސަރަހައްދަކީ ރާއްޖޭގައި އެންމެ ގިނަ އަދަދަކަށް ފެހުރިހި އުޅޭ ސަރަހައްދު ވެސްމެ އެވެ.