އީޕީއޭ ގެ ހުރިހާ ބާރެއް ތިމާވެއްޓާ ބެހޭ މިނިސްޓަރުގެ ދަށަށް ބަދަލުކޮަށް އެކުލަވާލި އެންވަޔަރަމެންޓަލް ރެގިއުލޭޓަރީ އޮތޯރިޓީ (އީއާރުއޭ) ގެ އެންމެ އިސްވެރިޔަކަށް، ތިމާވެއްޓާ ބެހޭ މިނިސްޓްރީގެ ކުރީގެ ޑެޕިއުޓީ މިނިސްޓަރ ހައްސާން މުހައްމަދު "ޗީފް އެގްޒެކެޓިވް" ގެ ގޮތުގައި އައްޔަނުކޮށްފި އެވެ.

ހައްސާން މި މަގާމަށް އައްޔަނު ކުރި އިރު މީގެ ކުރިން ރައީސް އޮފީހުން މައުލޫމާތު ދީފައިވާގޮތުން، މި އިދާރާގެ ވެރިޔާގެ މަގާމަކީ ސިވިލް ސާވިސް ކޮމިޝަންގެ ފަރާތުން އާއްމުކޮށް އިއުލާނު ކޮށްގެން ހޮވާ "ޗީފް އެޑްމިނިސްޓްރޭޓަރ" އެވެ.

ސޯޝަލް މީޑިޔާގައި ކުރި ޕޯސްޓެގައި އީއާރުއޭ އިން ވަނީ އެ އިދާރާގެ ޗީފް އެގްޒެކެޓިވްގެ މަގާމަށް ހައްސާން އައްޔަނު ކުރިކަން އިއުލާނުކޮށް މަރުހަބާ ކިޔާފައެވެ.

ކުރިން މިނިވަން އިދާރާއެއްގެ ގޮތުގައި އޮތް އީޕީއޭގެ ނަން ބަދަލުކޮށް، އުފެއްދި އީއާރުއޭ ގެ ޗީފް އެޑްމިނިސްޓްރޭޓަރ ގެ މަގާމަށް މީހަކު ހޯދަން ސިވިލް ސާވިސް ކޮމިޝަން އިން ވަނީ އިއުލާނު ކޮށްފައެވެ. އަދި އިއުލާނުގެ މުއްދަތު ހަމަވާނީ މި ހިނގާ އޮގަސްޓް މަހުގެ 26 ވަނަ ދުވަހަށެވެ. ރައީސް އޮފީހުން މީގެ ކުރިން މައުލޫމާތު ދީފައިވާ ގޮތުން އީއާރުއޭގެ ވެރިޔަކަށް ހުންނާނީ މި އިއުލާނެ ދަށުން އޮންނަ އުސޫލުގެ ތެރެއިން ކަނޑައަޅާ ޗީފް އެޑްމިނިސްޓްރޭޓަރ އެވެ. ނަމަވެސް މި އިއުލާނު ކުރިތާ އެންމެ 48 ގަޑި އިރުވެސް ހަމަ ނުވަނީސް މިވަނީ، މީގެ ކުރިން ޑެޕިއުޓީ މިނިސްޓަރުގެ މަގާމުގައި ހުރި ބޭފުޅަކު "ޗީފް އެގްޒެކެޓިވް" ގެ ނަމުގައި އީއާރުއޭ ގެ ވެރިޔަކަށް އައްޔަނު ކޮށްފައެވެ.

އީޕީއޭގެ ނަން އަދި ހިންގުމަށް ރައީސް މުއިއްޒު ގެންނެވި ބަދަލު ތަކުގެ ސަބަބުން އެ އިދާރާގެ ހުރިހާ ބާރެއް މިހާރު ވަނީ ތިމާވެއްޓާ ބެހޭ މިނިސްޓަރުގެ ދަށަށް ބަދަލު ކޮށްފަ އެވެ. އެމްޑީޕީގެ ފުރަތަމަ ވެރިކަމުގައި އޭރުގެ ރައީސް މުހައްމަދު ނަޝީދުގެ ގަރާރަކުން އުފެއްދިެވި އީޕީއޭ، މީގެ ކުރިން ހިނގަމުން ދިޔައީ ގަވަރނިންގ ބޯޑެއްގެ ލަފާގެ ދަށުންނެވެ.

އީޕީއޭގެ ބާރު ކެނޑޭ ގޮތަށް ރައީސް މުއިއްޒު ގެންނެވި ބަދަލު ތަކުގެ ސަބަބުން ގިނަ ބަޔަކު ވަނީ ކަންބޮޑުވުން ފާޅު ކޮށްފައެވެ. މި ބަދަލުތަކާ ގުޅޭ ގޮތުން ކުރީގެ ރައީސް އިބްރާހިމް މުހައްމަދު ސާލިހް ވިދާޅުވީ އީޕީއޭގެ ދައުރެއް ނެތި އީއައިއޭ ހެދޭ ގޮތަށް ސަރުކާރުން އީއައިއޭގެ ގަވާއިދަށް އިސްލާހު ގެނައުމުން އީޕީއޭގެ ބާރެއް ނެތްކަން ދައްކުވައިދޭ ކަމަށެވެ. އަދި މިއީ ސަރުކާރުގެ މަސައްކަތްތައް ބެލުމުގެ ޒިންމާ ހަވާލުކޮށްފައިވާ އެކި މުއައްސަސާތަކުގެ ދައުރު ހަނިކޮށް، ބަލިކަށި ކުރުމަށް މިހާރު އޮތް ސަރުކާރުން ކުރާ މަސައްކަތެއް ކަމަށް ވެސް ރައީސް ސޯލިހު ވިދާޅުވި އެވެ.

މިކަމާ ގުޅިގެން އެމްޑީޕީގެ ޗެއާޕާސަން ފައްޔާޒް އިސްމާއިލް އެކްސްގައި ކުރެއްވި ޕޯސްޓެއްގައި ވިދާޅުވީ، އީޕީއޭގެ ރެގިއުލޭޓަރީ ދައުރު ހަރުދަނާ ކުރުމުގެ ފުރުސަތު އޮއްވައި، އެތަނުގެ މިނިވަންކަން ނަގާލުމަކީ ބޮޑު މައްސަލައެއް ކަމަށެވެ. އަދި ވިދާޅުވީ، އެއީ ބާރުތައް ޖަމާ ކުރަން މުއިއްޒު ކުރައްވަމުން ގެންދަވާ މަސައްކަތްތަކަށް އިތުރުވި ބޮޅެއް ކަމަށެވެ.

ރައީސް އޮފީހުން ބުނި ގޮތުގައި، މި ބަދަލު ގެނައީ އީޕީއޭއިން މިހާތަނަށް ކުރަމުން އައި މައިގަނޑު މަސައްކަތްތަކަކީ ރާއްޖޭގެ ތިމާވެއްޓާ ބެހޭ ކަންކަން ރެގިއުލޭޓްކުރުމާ ގުޅުންހުރި މަސައްކަތްތަކެއް ކަމަށް ވާތީ، އެ އިދާރާއިން ކުރަމުން ގެންދާ މައިގަނޑު މަސައްކަތްތަކާ ވީހާ ވެސް ގުޅުންހުރި ނަމެއް ހަމަޖެއްސުމަށެވެ. އަދި އެ އިދާރާގެ މަސައްކަތްތައް މިހާރަށް ވުރެ ހަރުދަނާކޮށް، ހަލުވިކުރުމުގެ ބޭނުމުގައި ކަމަށެވެ.