އަންނަ ހަފުތާގައި ރޫބިއޯ މެދު އިރުމައްޗަށް ވަޑައިގަންނަވަނީ

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ، ކުރިއަށް އޮތް ހަފުތާގައި މެދު އިރުމައްޗަށް ރަސްމީ ދަތުރުފުޅެއް ކުރެއްވުމަށް ރާވަމުންދާ ކަމަށް މީޑިއާ ރިޕޯޓުތައް ބުނެފި އެވެ.

މި ދަތުރުފުޅުގައި ރޫބިއޯ ކުވެއިތުގެ އިތުރުން، ޔުނައިޓެޑް އަރަބް އެމިރޭޓްސް (ޔޫއޭއީ) އަދި ބަހްރެއިން އަށް ޒިޔާރަތް ކުރައްވާނެ ކަމަށް ބެލެވޭ ކަމަށް ދެ މަސްދަރަކާ ހަވާލާދީ އެކްސިއޯސް ނޫހުން ހުކުރު ދުވަހު ވަނީ ރިޕޯޓު ކޮށްފައި އެވެ.

މި ދަތުރުފުޅާ ގުޅޭ އިތުރު ތަފުސީލު ހާމަކުރަމުން އެކްސިއޯސް އިން ފަހުން ރިޕޯޓު ކޮށްފައިވާ ގޮތުގައި، ބަހްރެއިންގައި ބޭއްވުމަށް ހަމަޖެހިފައިވާ ގަލްފް ކޯޕަރޭޝަން ކައުންސިލް (ޖީސީސީ) ގެ ގައުމުތަކުގެ ޚާރިޖީ ވަޒީރުންގެ ސަމިޓެއްގައި ރޫބިއޯ ބައިވެރިވެ ވަޑައިގަންނަވާނެ އެވެ. މިކަން ހާމަ ކޮށްފައި ވަނީ ނަން ހާމަ ކުރަން ބޭނުން ނުވާ ތިން ވަނަ މަސްދަރަކުން ކަމަށް ބުނެފައިވެ އެވެ.

މި ދަތުރުފުޅާ ގުޅޭ ގޮތުން މައުލޫމާތު ސާފު ކުރުމަށް އެމެރިކާގެ ސްޓޭޓް ޑިޕާޓްމަންޓް އަށް އީމެއިލް މެދުވެރިކޮށް ހުށަހެޅުމުން، އެ އިދާރާ އިން އަދި ވަކި ޖަވާބެއް ދީފައި ނުވެ އެވެ. އެހެންކަމުން މި ދަތުރުފުޅުގެ ރަސްމީ ތާރީޚު ތަކާއި، އެޖެންޑާ އެމެރިކާގެ ސަރުކާރުން މިހާތަނަށް ކަށަވަރުވެފައި ނުވެ އެވެ. 

ރޫބިއޯ މެދު އިރުމައްޗަށް ކުރައްވާ މި ދަތުރުފުޅަކީ އެމެރިކާގެ ޚާރިޖީ ސިޔާސަތުގެ ތެރެއިން ގަލްފުގެ ގައުމުތަކާ އެކު އޮންނަ ގުޅުން ބަދަހި ކުރުމަށް ކުރައްވާ މުހިންމު ދަތުރުފުޅެއްގެ ގޮތުގައި މަސްރަހު ދިރާސާކުރާ ފަރާތް ތަކުން ދެކެ އެވެ. ޚާއްސަކޮށް ސަރަހައްދީ ސަލާމަތާއި،  އިގްތިސާދީ އެއްބާރުލުމާ ގުޅޭ ގޮތުން މި ދަތުރުފުޅުގައި މަޝްވަރާ ކުރެވޭނެ ކަމަށް ބެލެވެ އެވެ.

މި ދަތުރުފުޅުގެ ތެރެއިން ބޭއްވުމަށް ރާވާފައިވާ ޖީސީސީގެ ޚާރިޖީ ވަޒީރުންގެ ބައްދަލުވުމަކީ މެދު އިރުމަތީގެ މިހާރުގެ ޙާލަތާއި، ބައިނަލްއަގުވާމީ ގޮތުން ކުރިމަތި ވެފައިވާ ގޮންޖެހުންތަކާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރުމަށް ލިބޭނެ މުހިންމު ފުރުސަތެކެވެ. ރޫބިއޯގެ މި ދަތުރުފުޅާ ގުޅޭ އިތުރު ތަފުސީލުތައް ކުރިއަށް އޮތް ދުވަސް ތަކުގައި ހާމަވާނެ ކަމަށް ބެލެވެ އެވެ.