ޤަތަރުން ހަދިޔާކުރި ލަގްޒަރީ ޖެޓު، ޓްރަމްޕްގެ އެއާ ފޯސް ވަން އަށް

އެމެރިކާގެ ރައީސް ޑޮނަލްޑް ޓްރަމްޕްގެ ރަސްމީ ދަތުރުފުޅު ތަކުގައި ބޭނުންކުރާ "އެއާ ފޯސް ވަން" ފްލީޓަށް ގަތަރު ސަރުކާރުން ހަދިޔާ ކުރި ބޮއިންގް 747-8 މަރުކާގެ ލަގްޒަރީ ޖެޓު ދައްކާލައިފި އެވެ.

މި ބޯޓަކީ މިދިޔަ އަހަރުގެ ތެރޭގައި އެއްވެސް ޝަރުތަކާ ނުލައި ގަތަރުން އެމެރިކާ އަށް ދިން ހަދިޔާ އެކެވެ.

އެމެރިކާގެ އަސްކަރިއްޔާ އިން މިހާރު ވަނީ ގާތްގަނޑަކަށް 400 މިލިއަން ޑޮލަރު، ނުވަތަ 300 މިލިއަން ޕައުންޑުގެ އަގުހުރި މި ޖަމްބޯ ޖެޓަށް ގެންނަން ޖެހޭ ބަދަލުތައް ގެނެސް ނިންމާފައި އެވެ. ހުކުރު ދުވަހު ޖޮއިންޓް ބޭސް އެންޑްރޫސްގައި ބޭއްވި ރަސްމިއްޔާތެއްގައި ވާހަކަ ދައްކަވަމުން ޓްރަމްޕް ވިދާޅުވީ، މި ބޯޓު ބަދަލު ކޮށްލާފައި ވަނީ މީގެ ކުރިން ދުވަހަކު ވެސް ފެނިފައި ނުވާ ފަދަ މަތީ ފެންވަރުގެ ލަގްޒަރީ "ފްލައިންގް ވައިޓް ހައުސް" އަކަށް ކަމަށެވެ.

އެމެރިކާގެ އެއާ ފޯސް އިން ނެރުނު ބަޔާނެއްގައި ބުނެފައި ވަނީ، ރައީސްގެ ދަތުރުފުޅު ތަކުގައި ބޭނުން ކުރަން ފެށުމުގެ ކުރިން، ބޯޓަށް ގެނައި ބަދަލުތައް ޓެސްޓު ކުރުމުގެ ގޮތުން "ފައިނަލް އެގްޒާމް" ފްލައިޓް ތަކެއް ކުރިއަށް ގެންދާނެ ކަމަށެވެ. މި ބޯޓަށް ގެނައި ބަދަލު ތަކުގެ ތެރޭގައި ސަލާމަތީ ކަންކަމާއި، މުވާސަލާތީ ނިޒާމާއި، ލޮޖިސްޓިކް ސަޕޯޓުގެ އިތުރުން އެންމެ ފަހުގެ ޓެކްނޮލޮޖީ ހިމެނެ އެވެ. އަދި މިއީ ކުރިން އަމިއްލަ ފަރާތަކުން ބޭނުން ކޮށްފައިވާ ބޯޓަކަށް ވާތީ، އޭގެ ސަބަބުން ކުރިމަތި ވެދާނެ އެންމެހާ ނުރައްކާތައް ނައްތާލާފައިވާ ކަމަށް ވެސް އެއާ ފޯސް އިން ބުނެ އެވެ.

ބޯޓުގެ އެތެރޭގެ ފަރުމާ އަށް މާ ބޮޑު ބަދަލެއް ގެނެސްފައި ނުވި ނަމަވެސް، ބޯޓުގެ ބޭރުގައި ވަނީ ރަތް، ހުދު، ނޫ އަދި ރަން ކުލައިގެ އައު ފަރުމާއެއް ކުރަހާފައި އެވެ. ޤަތަރުގެ ޝާހީ އާއިލާ އިން މި ބޯޓު އެމެރިކާގެ ޑިފެންސް ޑިޕާޓްމަންޓް އަށް ހަދިޔާ ކުރީ 2025 ވަނަ އަހަރުގެ މެއި މަހުގެ ތެރޭގައި އެވެ.

މި ބޯޓު ހަދިޔާއެއްގެ ގޮތުގައި ގަބޫލުކުރުމާ ގުޅިގެން މިދިޔަ އަހަރު އެމެރިކާގެ ސިޔާސީ މަސްރަހުގައި ބޮޑެތި ފާޑުކިޔުން ތަކެއް ޓްރަމްޕް އަށް އަމާޒުވި އެވެ. މީގެ ތެރޭގައި ޓްރަމްޕްގެ ބައެއް ބައިވެރިން ވެސް ހިމެނެ އެވެ. ފާޑުކިޔާ ފަރާތް ތަކުން ބުނަމުން ދިޔައީ މިފަދަ އަގު ބޮޑު ހަދިޔާއެއް ގަބޫލު ކުރުމަކީ މަސްލަހަތު ފުށުއަރާ ކަމެއް ކަމަށާއި، އެއީ ގާނޫނު އަސާސީއާ ޚިލާފު ކަމެއް ކަމަށެވެ.

އެމެރިކާގެ ފެޑަރަލް ގާނޫނު ބުނާ ގޮތުން އޮފިޝަލުންނަށް ގަބޫލު ކުރެވޭނީ 480 ޑޮލަރަށް ވުރެ ކުޑަ ހަދިޔާ އެވެ. ނަމަވެސް ވައިޓް ހައުސް އިން ބުނަނީ ބޯޓު ގަބޫލު ކުރުމަކީ ގާނޫނީ ގޮތުން މައްސަލައެއް ނޫން ކަމަށާއި، ޓްރަމްޕްގެ ރިޔާސީ ދައުރު ނިމުމުން އެ ބޯޓު އޭނާގެ ރިޔާސީ ލައިބްރަރީ އަށް ހަދިޔާ ކުރާނެ ކަމަށެވެ.

މީގެ އިތުރުން ޓްރަމްޕްގެ ވާހަކަފުޅުގައި ބޯޓުގެ މަސައްކަތް ތަކަށް ވަރަށް ބޮޑަށް ތައުރީފު ކުރެއްވި އެވެ. ބޯޓުގައި ބޭނުން ކޮށްފައިވާ ލަކުޑި އާއި، އެހެނިހެން ސާމާނުގެ ފެންވަރު ރަނގަޅުކަން ފާހަގަ ކުރައްވައި، ބޯޓުގައި ވަނީ ދުނިޔޭގެ އެންމެ ފެންވަރު ރަނގަޅު އިންޖީނުތައް ކަމަށް ވެސް ޓްރަމްޕް ވިދާޅުވި އެވެ. އަދި މިއީ ލިބުނު ޝަރަފެއް ކަމަށް ސިފަ ކުރައްވައި، ޤަތަރުގެ އަމީރަށް ޝުކުރު އަދާ ކުރެއްވި އެވެ.

މި އައު ބޯޓު އިތުރުވުމުގެ ކުރިން "އެއާ ފޯސް ވަން" ފްލީޓުގައި ބޭނުން ކުރަމުން ދިޔައީ 1990 އިން ފެށިގެން ބޭނުން ކުރަމުން އައި 747-200B މަރުކާގެ ދެ ބޯޓެވެ. ވައިޓް ހައުސްގެ ކޮމިއުނިކޭޝަންސް ޑައިރެކްޓަރު ސްޓީވަން ޗަންގް ވިދާޅުވި ގޮތުގައި، އޭގެ ތެރެއިން އެއް ބޯޓު މިހާރު ވަނީ ބޭނުން ކުރުން ހުއްޓާލާފައި އެވެ.

އެއާ ފޯސް އިން ބުނި ގޮތުގައި ގަތަރުން ދިން މި ބޯޓު ރައީސް ބޭނުން ކުރައްވާނީ ވަގުތީ ގޮތުންނެވެ. އެއީ ބޮއިންގް ކުންފުނިން އުފައްދަމުންދާ، ދާއިމީކޮށް ބޭނުން ކުރުމަށް ހަމަޖެހިފައިވާ ދެ VC-25B ޖެޓު ލިބެން ދެނެވެ. އެ ބޯޓުތައް އުފެއްދުމުގައި މިހާރު ވަނީ ބޮޑެތި ލަސް ތަކެއް ކުރިމަތިވެފައި އެވެ.