އީރާން ހަނގުރާމައިގައި ވަކި ފަރާތަކަށް ނުޖެހޭތީ، ޓްރަމްޕްގެ ޝުކުރު ޗައިނާ އާއި ރަޝިޔާ އަށް

އީރާން އާއެކު ކުރި ހަނގުރާމައިގައި ޗައިނާ އާއި ރަޝިޔާ އިން ގެންގުޅުނު "ނިއުޓްރަލް" ނުވަތަ ވަކި ފަރާތަކަށް ނުޖެހޭ ސިޔާސަތަށްޓަކައި އެ ދެ ގައުމުގެ ވެރިންނަށް އެމެރިކާގެ ރައީސް ޑޮނަލްޑް ޓްރަމްޕް ޝުކުރު އަދާ ކުރައްވައިފި އެވެ.

ފްރާންސްގެ އެވިއަން-ލެ-ބެއިންސްގައި ކުރިއަށް ދިޔަ ގްރޫޕް އޮފް ސެވަން (ޖީ7) ސަމިޓްގެ ހަވާސާގައި ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން  ޓްރަމްޕް ވަނީ ޗައިނާގެ ރައީސް ޝީ ޖިންޕިންގް އާއި، ރަޝިޔާގެ ރައީސް ވްލަޑިމިއަރ ޕުޓިން އަށް ވަރަށް ބޮޑަށް ތައުރީފު ކުރައްވާފައި އެވެ. ޓްރަމްޕް ވިދާޅުވީ އީރާންއާ ދެކޮޅަށް ކުރި ހަނގުރާމައިގައި އެ ދެ ބޭފުޅުން ގެންގުޅުއްވި ހަމަހަމަ ސިޔާސަތުގެ ސަބަބުން ކަންކަން ވަރަށް ބޮޑަށް ފަސޭހަ ވެގެން ދިޔަ ކަމަށެވެ.

ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވީ، އެ ދެ ގައުމުގެ ވެރިންނަށް ޝުކުރު އަދާ ކުރަން ބޭނުންފުޅުވާ ކަމަށާއި، އެ ބޭފުޅުންގެ ސަބަބުން މަސްރަހު ވަރަށް ބޮޑަށް ރަނގަޅު ވެގެން ދިޔަ ކަމަށެވެ. އަދި ހަނގުރާމައިގެ ދަނޑިވަޅުގައި ދެ ގައުމުން ވެސް އަމަލު ކޮށްފައި ވަނީ ވަކި ފަރާތަކަށް ނުޖެހި، މަސްރަހު އިތުރަށް ގޯސް ނުވާނެ ފަދަ ގޮތަކަށް ކަމަށް ވެސް ޓްރަމްޕް ފާހަގަ ކުރެއްވި އެވެ.

ދުނިޔޭގެ ބޮޑެތި ބާރު ތަކުގެ މެދުގައި އޮންނަ ނުތަނަވަސް ކަމުގެ ތެރެއިން، އީރާންގެ މައްސަލައިގައި ޗައިނާ އާއި ރަޝިޔާ އިން ގެންގުޅުނު މި ސިޔާސަތަކީ އެމެރިކާ އިން ބޭނުންވި ގޮތް ކަމަށް ޓްރަމްޕްގެ ވާހަކަފުޅުން ދޭހަވެ އެވެ. ޚާއްސަކޮށް ބައިނަލްއަގުވާމީ ބޮޑެތި މައްސަލަ ތަކުގައި މި ދެ ގައުމުގެ ދައުރު ބޮޑު ވެފައިވާ އިރު، އީރާން ހަނގުރާމައިގައި އެ ގައުމު ތަކުން ސީދާ ގޮތުން ބައިވެރި ނުވުމަކީ އެމެރިކާ އަށް ލިބުނު ލުޔެއްގެ ގޮތުގައި ޓްރަމްޕް ވަނީ ސިފަ ކުރައްވާފައި އެވެ.

ނޫސްވެރިންގެ މި ބައްދަލުވުމުގައި ޓްރަމްޕް ވަނީ ޗައިނާ އާއި ރަޝިޔާގެ ލީޑަރުންނަކީ "ނިއުޓްރަލް" ބައެއްގެ ގޮތުގައި ތަކުރާރުކޮށް ސިފަ ކުރައްވާފަ އެވެ. މިއީ ދުނިޔޭގެ އެންމެ ކުރި އަރާފައިވާ ހަތް ގައުމު ހިމެނޭ ޖީ7 ސަމިޓްގެ ތެރެއިން ޓްރަމްޕް ދެއްވި މުހިންމު ބަޔާން އެވެ.