ޖީ7 ގެ ލީޑަރުންނަށް ޓްރަމްޕް: "އަހަރެންނަކީ ބޮސް!"

ފްރާންސްގައި ކުރިއަށް ދިޔަ ޖީ7 ގެ ބައްދަލުވުމުގައި ބައިވެރިވެ ވަޑައިގެން، އޭނާ އަކީ ބޮސް ކަމަށް އެމެެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޖީ7 ގެ ބައްދަލުވުމަށް ޓްރަމްޕް ވަޑައިގެންނެވިއިރު، އެ ތަނުގައި ޤައުމު ތަކުގެ ލީޑަރުން ވަޑައިގެން ތިއްބެވި އެވެ. ހިންގަވާފައި ވަޑައި ގެންނެވި ވަގުތު، އިރުކޮޅަކަށް ހުއްޓިވަޑައިގެންނެވުމަށް ފަހު ޓްރަމްޕް ވިދާޅުވީ، "އަހަރެންނަކީ ބޮސް" ކަމަށެވެ. އެވަގުތު އެ ތަނުގައި ތިއްބެވި ޤައުމު ތަކުގެ ލީޑަރުން ހިނިފުޅުވަޑުވާ އަޑު ވެސް އިވެ އެވެ. 

އެއަށް ފަހު ވަޑައިގެން ގޮނޑީގައި އިށީންނެވުމުގެ ކުރިން ޓްރަމްޕް ވަނީ، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އާއި ފްރާންސްގެ ރައީސް އިމަނުއެލް މެކްރޮންއާ ސަލާމް ކުރައްވައި ވާހަކަ ދައްކަވައިފަ އެވެ. ޓްރަމްޕް އިށީންނެވުމާ އެކު، ފްރާންސްގެ ރައީސް މެކްރޮން ވަނީ ބައްދަލުވުން ފައްޓަވައިފަ އެވެ.

ފްރާންސްގެ އީވިއަން ލެ ބެއިންސްގައި ޖީ7 ގެ ބައްދަލުވުން ކުރިއަށް ގެންގޮސްފައި ވަނީ ހޯމަ ދުވަހުން ފެށިގެން ބުދަ ދުވަހުގެ ނިޔަލަށެވެ. އެ ބައްދަލުވުމުގައި ޓްރަމްޕް ވަނީ، ރަޝިޔާ އިން ޔޫކްރެއިންއާ ދެކޮޅަށް ހިންގަމުން އަންނަ ހަނގުރާމަ ނިންމުމަށް ވެސް ބާރު އަޅުއްވައިފަ އެވެ. އަދި ރަޝިޔާއާ ދެކޮޅަށް ތެލުގެ ދަތި ކުރުމުގެ ފިޔަވަޅުތައް އެޅުއްވުމަށް ތައްޔާރަށް ހުންނެވި ކަމަށް ވެސް ޓްރަމްޕް ވަނީ ވިދާޅުވެފައި އެވެ.

ޖީ7 ގެ ބައްދަލުވުމުގެ ހަވާސާގައި ޓްރަމްޕް ވަނީ ޔޫކްރެއިންގެ ރައީސް ވުލޮޑިމިއަރ ޒެލެންސްކީއާ ވެސް ބައްދަލު ކުރައްވައިފަ އެވެ. އެއަށް ފަހު ޓްރަމްޕް ވިދާޅުވެފައި ވަނީ، ޒެލެންސްކީއާ އެކު ކުރިއަށް ގެންދިޔަ ބައްދަލުވުމަކީ ވަރަށް ރަނގަޅު ބައްދަލުވުމެއް ކަމަށެވެ. އެއާ އެކު ޓްރަމްޕް ވިދާޅުވެފައި ވަނީ، ޔޫކްރެއިން އާއެކު ސުލްޙައިގެ އެއްބަސްވުމަކަށް އައުމަކީ ރަޝިޔާ އިން ކުރަން ޖެހޭ ކަމެއް ކަމަށެވެ. 

މި ބައްދަލުވުމުގައި ޖީ7 ގެ ޤައުމު ތަކުގެ ލީޑަރުންގެ އިތުރުން، ގަލްފު ސަރަހައްދުގެ ޤައުމު ތަކުގެ ލީޑަރުން ވެސް ވަނީ ބައިވެރިވެ ވަޑައިގެންފައި އެވެ.