ރާއްޖެއަށް 'އުދުހޭ' ވޯޓާ ޓެކްސީ ތައާރަފުކުރަނީ

ރާއްޖޭގެ ރަށްތަކުގެ މެދުގައި ކުރާ ދަތުރުފަތުރުގެ ޚިދުމަތް ދިނުމަށް ކުރިއަށް އޮތް ތިން އަހަރު ދުވަހުގެ ތެރޭގައި ކަރަންޓުން ދުއްވާ 100 ވޯޓާ ޓެކްސީ ރާއްޖެއަށް ގެނައުމަށް ބޭރުގެ ކުންފުންޏަކުން ނިންމައިފިއެވެ.

މިއީ މަތީ ފަންތީގެ ފަތުރުވެރިކަމަށް މަޝްހޫރު ރާއްޖެއިން 2030 ވަނަ އަހަރުގެ ނިޔަލަށް ކާބަން ނިއުޓްރަލް ގައުމަކަށް ވުމަށް ކަނޑައަޅާފައިވާ ލަނޑުދަނޑި ހާސިލުކުރުމަށް އެހީތެރިވެދޭނެ މަޝްރޫއެއް ކަމަށް، އެމެރިކާގެ މެރިޓައިމް ޓެކްނޮލޮޖީ ކުންފުންޏެއް ކަމަށްވާ 'ނޭވިއާ' އިން ބުނެއެވެ. މި މަޝްރޫއު ކުރިއަށް ގެންދަނީ ޔޫއޭއީގެ 'ޖޭއައިއެޗް ގްލޯބަލް އިންވެސްޓްމަންޓް' އާ ގުޅިގެންނެވެ.

ޖޫން މަހުގެ ކުރީކޮޅު ނެރުނު ބަޔާނެއްގައި ބުނެފައިވަނީ، މި ޕާޓްނަޝިޕްގެ ދަށުން ރާއްޖޭގައި 'ނޭވިއާ ނެޓްވޯކް' ގާއިމުކުރެވޭނެ ކަމަށެވެ. މިއީ އެއާޕޯޓްތަކާއި، ރިސޯޓްތަކާއި، ޕްރައިވެޓް ވިލާތަކުގެ އިތުރުން މީހުން ދިރިއުޅޭ ރަށްތައް ގުޅުވާލުމަށް ފަރުމާކޮށްފައިވާ، ސޮފްޓްވެއާގެ އެހީގައި ހިންގާ ދެމެހެއްޓެނިވި ކަނޑުދަތުރުފަތުރުގެ ނިޒާމެކެވެ. މި މަޝްރޫއުގެ ދަށުން ގެންނަ ހައި-ޕާފޯމަންސް ހައިޑްރޯފޮއިލް އުޅަނދުތަކުގެ އަގު ގާތްގަނޑަކަށް 100 މިލިއަން ޑޮލަރަށް އަރާނެ ކަމަށް ލަފާކުރެވެއެވެ.

މި މަޝްރޫއުގެ ދަށުން 2026 ވަނަ އަހަރު 'ނޭވިއާ އެން30' މޮޑެލްގެ ފަސް އުޅަނދު ފުރަތަމަ މަރުހަލާގައި ރާއްޖެއަށް ގެނައުމަށް ވަނީ ހަމަޖެހިފައެވެ. އަދި އޭގެ ފަހުން ކުރިއަށް އޮތް ތިން އަހަރު ދުވަހުގެ ތެރޭގައި އިތުރު 95 އުޅަނދު ރާއްޖޭގައި ބޭނުންކުރަން ފަށާނެއެވެ.

ނޭވިއާ ކުންފުނީގެ ބާނީ އަދި ސީއީއޯ ސަމްޕްރިތީ ބަޓަޗާރިޔާ ވިދާޅުވީ، ރާއްޖެއަށް އަންނަ ކޮންމެ ފަތުރުވެރިއަކާއި، ކޮންމެ މުވައްޒަފަކާއި، ކޮންމެ ރިސޯޓެއް އަދި ކޮންމެ ރަށެއް ބަރޯސާވަނީ ކަނޑު ބޯޓުފަހަރަށް ނުވަތަ ސީޕްލޭންތަކަށް ކަމަށެވެ. އެހެންކަމުން، ކަނޑުދަތުރުފަތުރުގެ ނިޒާމަކީ ސާފު، އަޑުމަޑު، އެއް މިންގަނޑަކުން ހިންގޭ، ސޮފްޓްވެއާގެ އެހީގައި މަސައްކަތްކުރާ އަދި ފަތުރުވެރިންގެ ތަޖުރިބާ އިންތިހާއަށް ރަނގަޅުކޮށްދޭ ނިޒާމަކަށް ހެދިދާނެކަން ސާބިތުކޮށްދިނުމަށް ރާއްޖެއަކީ އެންމެ އެކަށީގެންވާ ގައުމު ކަމަށް އޭނާ ވިދާޅުވިއެވެ.

ކުރިން ނާސާގެ އެއަރޯސްޕޭސް އިންޖިނިއަރެއްގެ ގޮތުގައި މަސައްކަތް ކުރެއްވި ބަޓަޗާރިޔާ އިތުރަށް ވިދާޅުވީ، އެ ކުންފުނިން ހަމައެކަނި ބޯޓުތަކެއް ތައާރަފުކުރަނީ ނޫން ކަމަށާއި، އެއީ ކަނޑުމަތީގައި ދެމެހެއްޓެނިވި ގޮތެއްގައި ހިންގާ ދުނިޔޭގެ ފުރަތަމަ ލަގްޒަރީ ދަތުރުފަތުރުގެ ނެޓްވޯކް ބިނާކުރުން ކަމަށެވެ.

ޖޭއައިއެޗް ގްލޯބަލް އިންވެސްޓްމަންޓްގެ ޗެއާމަން މުހައްމަދު އަލީ ޖަނާހު ވިދާޅުވީ، ރާއްޖެއަކީ އަބަދުވެސް މަތީ ފަންތީގެ ފަތުރުވެރިކަމުގައި އެންމެ ކުރީގައި އުޅޭ ގައުމެއް ކަމަށެވެ. ނަމަވެސް މޫސުމަށް އަންނަ ބަދަލުތަކުގެ ނުރައްކާ އެންމެ ބޮޑަށް އޮތް ޖަޒީރާ ގައުމަކަށް ވުމާއެކު، މުސްތަގުބަލުގައި ކަނޑުދަތުރުފަތުރުގެ ނިޒާމު އޮންނާނެ ގޮތް ދުނިޔެއަށް ދައްކުވައިދިނުމުގެ ފުރުސަތު ރާއްޖެއަށް އެބައޮތް ކަމަށް އޭނާ ވިދާޅުވިއެވެ.

އެ ބަޔާނުގައި ބުނެފައިވާ ގޮތުގައި، ރާއްޖޭގައި މި ގާއިމުކުރާ ނިޒާމު ވެގެންދާނީ އެހެން ޖަޒީރާ ގައުމުތަކާއި އައްސޭރިފަށުގެ މާކެޓްތަކުގައި ޒަމާނީ ކަނޑުދަތުރުފަތުރުގެ ނިޒާމު ފުޅާކުރުމަށް ބޭނުންކުރާނެ ނަމޫނާއަކަށެވެ.

މި ދެ ކުންފުނިން ބުނާ ގޮތުގައި، މި އުޅަނދުތަކާއެކު ދުނިޔޭގެ ފުރަތަމަ ފުލް-އިލެކްޓްރިކް ހައިޑްރޯފޮއިލް ޓްރާންސްޕޯޓް ނެޓްވޯކް އުފެދިގެންދާނެއެވެ. މީގެ ސަބަބުން ވެލާނާ އިންޓަނޭޝަނަލް އެއާޕޯޓާއި، ލަގްޒަރީ ރިސޯޓްތަކާއި، ޕްރައިވެޓް ރަށްތަކާއި، މީހުން ދިރިއުޅޭ ރަށްތައް އަދި ވިލާތައް މުޅި ރާއްޖޭގައި ގުޅުވާލެވޭނެއެވެ.

މަތީ ފަންތީގެ ފަސިންޖަރުން އުފުލުމަށް ޚާއްސަކޮށް ފަރުމާކޮށްފައިވާ ކޮންމެ އުޅަނދަކީ ކަރަންޓުން 75 ނޯޓިކަލް މޭލަށް ދަތުރުކުރުމުގެ ގާބިލުކަން ލިބިފައިވާ އުޅަނދެކެވެ. މީގެ އިތުރުން، މި އުޅަނދުތަކުގައި އެއާކޮންޑިޝަން ކޮށްފައިވާ ކެބިންތަކާއި، ލައުންޖް ފެންވަރުގެ ގޮނޑިތަކާއި، ސްޓާލިންކް ސެޓެލައިޓް އިންޓަނެޓްގެ އިތުރުން، ޑިޖިޓަލްކޮށް ދަތުރުތައް ބުކްކޮށް ބެލެހެއްޓޭނެ ސޮފްޓްވެއާ ހިމެނެއެވެ.