ރައީސް ނަޝީދު ރައީސް މުއިއްޒު އަށް: ޒިންމާދާރު ކަމެއް، އަމާޒެއް، ޕްލޭނެއް ނެތް!
އުތުރުގައި އިތުރު 4 އެއަރޕޯޓް އެޅުމުގެ ސަބަބުން ޤައުމީ އެއަރލައިނަށް ދެކޮޅު ނުޖެހޭ ޚަރަދުތަކެއް ހިންގަން ޖެހޭނެ
އޭރުގެ އިންތިހާބީ ރައީސް ޑރ.މުހައްމަދު މުއިއްޒު މަޖިލީހަށް ވަޑައިގެން މެހެމާނުން ސޮއި ކުރައްވާ ފޮތުގައި ސޮއި ކުރައްވާއިރު އޭރުގެ މަޖިލީހުގެ ރައީސް މުހައްމަދު ނަޝީދު މުއިއްޒު އަރިހުގައި - 2023 އޮކްޓޯބަރު 3
ރައީސް މުހައްމަދު މުއިއްޒު ކަންކަން ކުރައްވަމުން ގެންދަވާ ގޮތައް ކުރީގެ ރައީސް މުހައްމަދު ނަޝީދު ވަރަށް ބޮޑަށް ފާޑުވިދާޅުވެއްޖެ އެވެ.
ރައީސް ނަޝީދު ވިދާޅުވީ، ރައީސް މުއިއްޒު ކަންކަން ކުރައްވަމުން ގެންދަވަނީ ޒިންމާދާރު ކަމެއް، އަމާޒެއް، ޕްލޭނެއް ނެތި ކަމުގައެވެ.
ރައީސް ނަޝީދު ވިދާޅުވީ، އުތުރުގައި 4 އެއަރޕޯޓް އޮވެ، އިތުރު 4 އެއަރޕޯޓް މި އަޅަނީ 19-36 މިނެޓާ ދޭތެރޭގައި ސްޕީޑް ބޯޓުގައި ދެވޭހާ ކައިރިކައިރީގައި ކަމަށެވެ.
"ނަތީޖާ އަކީ، އެއްވެސް އެއަރޕޯޓެއްގައި އިޤްތިޞާދީ/މާލީ ދެކޮޅުޖެހުމެއް ނެތުން،" ކަމަށް ރައީސް ނަޝީދު ވިދާޅުވިއެވެ.
އޭގެ އިތުރުން ރައީސް ނަޝީދު ވިދާޅުވީ މިކަމުގެ ސަބަބުން ޤައުމީ އެއަރލައިނަށް ދެ އުޅި އެއްނުވާ ޚަރަދުތަކެއް ހިިންގަން ޖެހެނޭ ކަމަށާޢި، އަދި ލޯކަލް ޓޫރިޒަމަށް ވެސް ކުރަން ވީ މަންފާ މިކަމުގެ ސަބަބުން ނުކުރާނެ ކަމުގައެވެ.
"ސްޕީޑް ބޯޓުގައި ދެވޭ ހިސާބުގައި އެއަރޕޯޓަކަށް ފަހު އެއަރޕޯޓެއް އަޅަމުން ދިއުމުން ފެންނަނީ ދަތުރުފަތުރުގެ ގުޅިފައިވާ ނިޒާމެއްގެ އަމާޒާއި ޕްލޭން ނެއްކަމާއި، ޒިންމާދާރުކަން ކުޑަކަން!" ބުރާސްފަތި ދުވަހު އެކްސް ގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވިއެވެ.
