މިހާރު ކޭޝްކާޑު ޓެކްސީތަކުގައި ވެސް ބޭނުންކުރެވޭ
ޕިއޯއެސް ޚިދުމަތް ފެށީ ފަސް ޓެކްސީގަ
ޓެކްސީތަކުގައި ޕީއޯއެސް ބޭނުން ކުރެވެން ފެށުން
ބީއެމްއެލް އިން ޓެކްސީތަކުގައި ޕޮއިންޓް އޮފް ސޭލްސް (ޕީއޯއެސް) ޚިދުމަތް ތައާރަފްކޮށްފި އެވެ.
އަންގާރަ ދުވަހު ދަރުބާރު ގޭގައި ބީއެމްއެލް އިން ބޭއްވި ހަރަކާތުގައި ވާހަކަ ދައްކަވަމުން، އެކުންފުނީގެ ޑެޕިއުޓީ ސީސީއޯ އަދި ޑިރެކްޓަރ އޮފް އޮޕަރޭޝަންސް މުހައްމަދު ޝަރީފު ވިދާޅުވީ، ބީއެމްއެލް އިން ޓެކްސީތަކުގައި ޕީއޯއެސް ޚިދުމަތް ތައާރަފް ކޮށްފައިވާ އިރު މި ހިދުމަތުގެ ސަބަބުން ރައްޔިތުންނަށް ޓެކްސީ ހިދުމަތް ހޯދަން ފަސޭހަ ވެގެންދާނެ ކަމަށެވެ.
"ނަގުދު ފައިސާއާ ނުލާ ޕީއޯއެސް ބޭނުންކޮށްގެން ފައިސާ ނެގުމުގެ ޚިދުމަތް ފަށާފަ މިވަނީ. ޚިދުމަތް އަޅުގަނޑުމެން ފަށަނީ ފަސް ޓެކްސީ. އަދި މަސް ދުވަސް ފަހުން އިތުރު ޓެކްސް ވެސް ޚިދުމަތް ލިބިގެންދާނެ" މުހައްމަދު ޝަރީފު ވިދާޅުވި އެވެ.
އޭނާ ވަނީ ކޭޝް ކާޑު ބޭނުންކޮށްގެން ޓެކްސީތަކުގައި ފައިސާ ދެއްކޭ ގޮތަށް އެކުންފުނިން ފެށި ޚިދުމަތް ކަންކަން ބެލުމަށް ފަހު އިތުރު ފަސޭހަތަކާ އެކު ކުރިއަށް އޮތްތަނުގައި ފެށިގެންދާނެ ކަމަށް ވިދާޅުވެފަ އެވެ.
މުހައްމަދު ޝަރީފު ވިދާޅުވީ، ފިހާރަތަކުގައި ޕޭމެންޓް ހަދާ އުސޫލުން ޓެކްސީތަކުގައި ވެސް ޕޭމެންޓް ހެދިގެން ދިއުމުގެ ސަބަބުން ބީއެމްއެލްގެ ޕީއޯއެސް ޚިދުމަތް އިތުރަށް ފުޅާ ވެގެންދާނެ ކަމަށެވެ. ބީއެމްއެލް އިން މިހާރު ވެސް 4،000 ވުރެ ގިނަ ޕީއޯއެސް މާރޗެންޓުން ތިބެއެވެ.
ޝަރީފު ވިދާޅުވީ މި ހިދުމަތް ދެނީ ޓެކްސީ ދުއްވާ މީހުންނާ އެކު ހާއްސަ އެއްބަސްވުމެއްގެ ދަށުން ކަމަށާއި އެއާ އެކަށީގެންވާ ފީއެއް ނެގޭނެ ކަމަށެވެ. އެހެން ނަމަވެސް ހިދުމަތް ހޯދާ ފަރާތްތަކަށް އެއްވެސް އަގެއް ނެތި ޚިދުމަތް ލިބިގެންދާނެ ކަމަށް ބީއެމްއެލް އިން ވަނީ ބުނެފަ އެވެ.
ބީއެމްއެލްގެ "އަހަރެންގެ ބޭންކް"ގެ ނަމުގައި ޚާއްސަ ކެމްފެއިނެއް ފަށައިގެން ކުރިއަށް ގެންދާ އިރު މި ހިނގާ ފެބުރުއަރީ މަހުގެ ކޮންމެ ދުވަހަކު މުޖުތަމައުއަށް ފައިދާ ކުރާނެ ހަރަކާތެއް ކުރުމަށް ވަނީ ހަމަޖައްސަފަ އެވެ.
