މަސައްކަތްތައް ނިންމުމަށް ކޮންޓްރެކްޓަރުންނަށް އެއް މުއްދަތެއް ދީގެން ނޫނީ ކޮރަޕްޝަނެއް ނުހުއްޓުވޭނެ: ޖަނާހު
މަސައްކަތް ނިންމަން ކޮންޓްރެކްޓަރުންނަށް އިތުރު ވަގުތު ބޭނުންވޭ
މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ޗެއަރމަން މުހައްމަދު އަލީ ޖަނާހު
ކޮވިޑާއި ގުޅިގެން ހުއްޓިފައި އޮތް އިމާރާތްކުރުމުގެ ސިނާއަތުގެ މަސައްކަތްތައް އަލުން ނިންމުމަށް ހުރިހާ އިންވެސްޓަރުންނަށް ވެސް އެއް މުއްދަތެއް ދޭންޖެހޭ ކަމަށް މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ޗެއަރމަން މުހައްމަދު އަލީ ޖަނާހު ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ޖަނާހު ވިދާޅުވީ ކޮވިޑާ ގުޅިގެން ގިނަ ދުވަސްތަކެއް ވަންދެން މަސައްކަތް ހުއްޓިފައި ތިބެންޖެހުމުގެ ސަބަބުން ހުރިހާ ކޮންޓްރެކްޓަރުންނަށް ވެސް މަސައްކަތްތައް ނިންމުމުގައި ވަރަށް ބޮޑު ލަސްތަކެއް ދިމާވެފައިވާކަމަށެވެ. ކޮންޓްރެކްޓެއްގައި ސޮއިކޮށްގެން ވަކި މުއްދަތެއްގެ ތެރޭގައި މަސައްކަތް ނިންމަން އޮންނައިރު، މަސައްކަތް ނުކުރެވި ދާ ކޮންމެ ދުވަހަކީ ވެސް މަސައްކަތް ނިންމުމަށް މަދުވާ ދުވަހެއް ކަމަށް ޖަނާހު ވިދާޅުވިއެވެ.
އެހެންކަމުން މަސައްކަތް ކުރިއަށްނުގޮސް ގެއްލިގެންދިޔަ ވަގުތަށް އިތުރު ވަގުތު ދެއްވުމަށް ސަރުކާރާއި، އަމިއްލަ ކުންފުނިތަކާއެކު މަޝްވަރާކޮށްފައިވާނެ ކަމަށް ޖަނާހު ވިދާޅުވިއެވެ. މިކަމުގައި ބޭނުންވަނީ ފައިސާއެއް ނޫން ކަމަށާއި، ބޭނުންވަނީ މި މަސައްކަތް ނިންމަން އޮތް މުއްދަތުން ގެއްލުނު ވަގުތު ކަމަށް ޖަނާހު ވިދާޅުވިއެވެ.
މެލޭޝިއާ ފަދަ ބޮޑެތި ގައުމުތަކުން ވެސް އަމަލުކުރަމުންދަނީ މިފަދައިން ކަމަށާއި، ގެއްލުނު ވަގުތަށް ހުރިހާ ކޮންޓްރެކްޓަރުންނަށް ވެސް ހަ މަސް ދުވަސް ދިނުމަށް އެދިފައިވާނެ ކަމަށް ޖަނާހު ވިދާޅުވިއެވެ.
ސަރުކާރުން މިކަމުގައި ނިންމީ މަސައްކަތް ނިންމަން އޮތް މުއްދަތަށް ނުވަތަ މަސައްކަތް ނިންމިފައި އޮތް އިންސައްތައަށް ބަލައި، އެކި ކޮންޓްރެކްޓަރުންނަށް އެކި ވަގުތު ދިނުމަށް ކަމަށް ޖަނާހު ވިދާޅުވިއެވެ. އެހެންނަމަވެސް ހުރިހާ ކޮންޓްރެކްޓަރުންނަށް އެކި ވަގުތު ދިނުމަކީ ކޮރަޕްޝަނަށް މަގުފަހިވާނެ ކަމެއް ކަމަށާއި، މިގޮތަށް މިކަން ކުރާނަމަ އެކި ޑީލްތައް ހަދައި، ކޮރަޕްޝަނަށް މަގުފަހިވާފަދަ އެތައް ކަމެއް ހިނގާނެ ކަމަށް ޖަނާހު ވިދާޅުވިއެވެ.
ކޮވިޑް-19ގެ ހާލަތު ދިމާވިއިރު، ރާއްޖޭގެ އިމާރަތްކުރުމުގެ ސިނާއަތް އޮތީ ވަރަށް ރަނގަޅު ފައްތަރެއްގައި ކަމަށާއި، 2020 ވަނަ އަހަރަށް ވެސް މި ސިނާއަތް އޮތީ ވަރަށް ބޮޑު އުންމީދެއްގައި ކަމަށް ޖަނާހު ވިދާޅުވިއެވެ. އެހެންނަމަވެސް މި ސިނާއަތް ނުހުއްޓި ކުރިއަށްދިޔައީ ހުރިހަ ކަމެއްގައި ވެސް ސަރުކާރާއި އެހެނިހެން ފަރާތްތަކާއެކު މަޝްވަރާކޮށްގެން ކުރިއަށްދިޔައީމާ ކަމަށް ޖަނާހު ވިދާޅުވިއެވެ.
