ދަރަނި ކުޑަކުރުމަށް އައިއެމްއެފް އިން ދިވެހި ސަރުކާރަށް އިރުޝާދު ދީފި
17 ޖޫން 2026 | ބުދަ 06:56މެދުއިރުމަތީގެ ހަމަނުޖެހުންތަކުގެ ސަބަބުން ރާއްޖޭގެ އިގްތިސާދަށް ގޮންޖެހުންތަކެއް ކުރިމަތިވެފައިވާތީ، ދައުލަތުގެ ދަރަނި ކުޑަކޮށް މާލީ ހަމަޖެހުން ގާއިމުކުރުމަށް ސިޔާސަތުތައް އަލުން ތަރުތީބުކުރަންޖެހޭ ކަމަށް އައިއެމްއެފުން ބުނެފި. މި ބަދަލުތައް ގެންނައިރު އެންމެ އެހީތެރިކަން ބޭނުންވާ ފަރާތްތަކަށް ރައްކާތެރިކަން ކަށަވަރުކުރުމަށާއި، އޮނިގަނޑަށް ބޭނުންވާ އިސްލާހުތައް ގެނައުމަށް އެ އިދާރާއިން ވަނީ ލަފާދީފައި. މީގެ އިތުރުން، މޫސުމީ ބަދަލުތަކުން ކުރާ އަސަރުތައް ކުޑަކުރުމަށްޓަކައި މާލީ އެހީތެރިކަން ހޯދުމާއި ހަރަދުތަކުގެ އޮނިގަނޑު ހަރުދަނާކުރުމުގެ މުހިންމުކަންވެސް އެ ބަޔާނުގައި ފާހަގަކޮށްފައިވޭ.
އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ މައި އިދާރާ ހުންނަނީ އެމެރިކާގެ ވޮޝިންޓަން ޑީސީގައި. | ގެޓީ އިމޭޖަސް
ދަރަނި ކުޑަކުރުމަށް އައިއެމްއެފް އިން ދިވެހި ސަރުކާރަށް އިރުޝާދު ދީފި އެވެ.
އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އާޓިކަލް IV ކޮންސަލްޓޭޝަންގެ ދަށުން، ރާއްޖޭގެ އިގްތިސާދީ ހާލަތާއި ކުރިމަގަށް ހުރި ފުރުސަތުތަކާއި އަދި ސަރުކާރުން އިސްކަންދޭ ސިޔާސަތުތަކާ ގުޅޭގޮތުން މަޝްވަރާކުރުމަށް، އެ އިދާރާގެ ވަފުދެއް 2026 ޖޫން 4 އިން 14 އަށް ރާއްޖެ އަށް ޒިޔާރަތްކޮށްފިއެވެ. މި ވަފުދުގެ އިސްވެރިއެއްގެ ގޮތުގައި ހުންނެވި ޕިޔަޕޯން ސޮޑްސްރީވިބޫން، މި ދަތުރު ނިންމަވާލެއްވުމަށްފަހު ނެރުއްވި ބަޔާނުގައި ވިދާޅުވީ:
"ވޭތުވެދިޔަ އަހަރުގެ ތެރޭގައި، ރާއްޖޭގެ އިގްތިސާދު ވަނީ މާލީ ގޮތުންނާއި މެކްރޯއިކޮނޮމިކް ގޮތުން ކުރިމަތިވި ގޮންޖެހުންތަކާއެކުވެސް، ކުރިއަށްވުރެ ބޮޑަށް ހަރުދަނާކަން ދައްކުވައިދީފައެވެ. އެހެންނަމަވެސް، މެދުއިރުމަތީގައި ހިނގަމުންދާ ހަމަނުޖެހުންތަކުގެ ނޭދެވޭ އަސަރު ރާއްޖޭގެ އިގްތިސާދީ ހަރަކާތްތަކަށާއި، ދައުލަތުގެ މާލިއްޔަތަށާއި އަދި ބޭރުގެ މާލީ މުއާމަލާތްތަކަށް ވަނީ ފޯރާފައެވެ. އެހެންކަމުން، މިވަގުތު އެންމެ ބޮޑު އިސްކަމެއް ދޭންޖެހެނީ، އިގްތިސާދީ ނުތަނަވަސްކަން ދާއިމީ ގޮތެއްގައި ހައްލުކުރުމަށާއި، ދައުލަތުގެ ދަރަނި ކުޑަކުރުމަށާއި، އަދި މާލީ ހަމަޖެހުން ގާއިމުކުރުމަށްޓަކައި ސިޔާސަތުތައް އަލުން ތަރުތީބުކުރުމަށެވެ. މި ބަދަލުތައް ގެންނައިރު، މުޖުތަމައުގައި ތިބި އެންމެ އެހީތެރިކަން ބޭނުންވާ ފަރާތްތަކަށް ލިބޭ ރައްކާތެރިކަން ކަށަވަރުކުރަންޖެހެއެވެ.
"މެދު ރާސްތާގައި އިގްތިސާދީ ކުރިއެރުން ވަރުގަދަކުރުމަށްޓަކައި، އޮނިގަނޑަށް ގެންނަންޖެހޭ އިސްލާހުތައް ގެނައުމާއި، އިންސާނީ ވަސީލަތްތައް ތަރައްގީކުރުމާއި، އަދި މޫސުމީ ބަދަލުތަކަށް ކެތްކުރެވޭނެ ފަދަ ގާބިލުކަން އިތުރުކުރުމަކީ އަދިވެސް އެންމެ އިސްކަންދޭންޖެހޭ ކަންކަމެވެ. ރާއްޖެއަކީ މޫސުމީ ބަދަލުތަކުގެ ނުރައްކާ ބޮޑު ގައުމަކަށް ވުމާއެކު، މޫސުމީ ބަދަލުތަކަށް ހޭނުމަށާއި އޭގެ އަސަރުތައް ކުޑަކުރުމަށް ސަރުކާރުން ކުރަމުންދާ މަސައްކަތްތަކަކީ ވަރަށް މުހިންމު މަސައްކަތްތަކެކެވެ. މި މަސައްކަތްތައް ކުރިއަށް ގެންދިއުމަށާއި ދެމެހެއްޓެނިވި ތަރައްގީ ކަށަވަރުކުރުމަށްޓަކައި، މޫސުމީ ބަދަލުތަކާ ގުޅޭ ހަރަދުތަކުގެ އޮނިގަނޑު ހަރުދަނާކުރުމާއި، މޫސުމީ ކަންކަމަށް ބޭނުންވާ މާލީ އެހީތެރިކަން ހޯދުމަކީ ކޮންމެހެން ބޭނުންތެރި ކަމެކެވެ."
