ބްރެޒިލް އާއި މޮރޮކޯ ވޯލްޑް ކަޕްގައި ހޮނިހިރު ދުވަހު ވަރުގަދަ ކުރިމަތިލުމަކަށް ނުކުންނަނީ

2026 ވަނަ އަހަރުގެ ވޯލްޑް ކަޕްގައި މިހާތަނަށް ކުޅޭނެ އެންމެ ފޯރިގަދަ މެޗު ހޮނިހިރު ދުވަހު ފެނިގެންދާނެއެވެ. މި މެޗުގައި ބައްދަލުކުރާނީ ފަސް ފަހަރު ދުނިޔޭގެ ޗެމްޕިއަންކަން ހޯދާފައިވާ ބްރެޒިލާއި އެފްރިކާގެ ގަދަބާރު މޮރޮކޯއެވެ. ގްރޫޕް ސީގެ މި ފޯރިގަދަ ކުރިމަތިލުމަށް ގިނަ ބަޔަކު އަންނަނީ އިންތިޒާރު ކުރަމުންނެވެ.

ވޯލްޑް ކަޕްގެ ތާރީޚުގައި އެންމެ ކާމިޔާބު ޓީމުގެ ގޮތުގައި ބްރެޒިލް އޮތް ނަމަވެސް، މިފަހަރުގެ މުބާރާތް ކާމިޔާބު ކުރާނެ ކަމަށް ބެޓިން މާކެޓްތަކުން ލަފާކުރާ އެންމެ ކުރީގެ ޓީމުތަކުގެ ތެރޭގައި އެ ޓީމެއް ނުހިމެނެއެވެ.

ކާލޯ އަންޗެލޮޓީގެ އިރުޝާދުގެ ދަށުން ކުޅޭ މި ޓީމަކީ ބްރެޒިލްގެ ތާރީޚުގައި ވޯލްޑް ކަޕަކަށް ނުކުންނަ އެންމެ ބަލިކަށި އެއް ޓީމުގެ ގޮތުގައި ބައެއް ފަރާތްތަކުން ސިފަކުރި ނަމަވެސް، ސްކޮޑުގައި ހުނަރުވެރި ކުޅުންތެރިން މަދެއް ނޫނެވެ. އޭގެ ތެރޭގައި ވިނީޝިއަސް ޖޫނިއާ އާއި ރަފީނިއާގެ އިތުރުން ތަޖުރިބާކާރު ނޭމާ ޖޫނިއާ ފާހަގަކޮށްލެވެއެވެ.

އާންމުކޮށް ބޮޑެތި ޓީމުތަކުން މުބާރާތް ފަށާއިރު ބައްދަލުކުރަން ޖެހޭ އާދައިގެ ޓީމުތަކާ ޚިލާފަށް، ބްރެޒިލަށް މިފަހަރު ޖެހިފައިވަނީ އުނދަގޫ ފެށުމެކެވެ. އެގޮތުން ގްރޫޕް ސްޓޭޖުގައި އެ ޓީމަށް ކުރިމަތިވާނެ އެންމެ ވަރުގަދަ އިމްތިހާނަކަށް ވާނީ އެފްރިކާގެ މިހާރުގެ ޗެމްޕިއަން މޮރޮކޯއާ ދެކޮޅަށް ކުޅެންޖެހޭ މެޗެވެ.

އަޝްރަފް ހަކީމީ އާއި ބްރަހީމް ދިއާޒް ފަދަ ތަރިންނާއެކު މޮރޮކޯ ޓީމަކީ އުއްމީދުން ފުރިގެންވާ، ވަރުގަދަ ހަމަލާތަކެއް އުފެއްދުމުގެ ގާބިލުކަން ހުރި ޓީމެކެވެ. ތާރީޚަށް ބަލާއިރު، އެ ޓީމަކީ ދުނިޔޭގެ އެންމެ ވަރުގަދަ ޓީމުތަކަށް ގޮންޖަހާލުމުގެ ފެންވަރު ހުރި ޓީމެއްކަން ވަނީ ސާބިތުކޮށްދީފައެވެ.

ހަވަނަ ފަހަރަށް ދުނިޔޭގެ ތަށި ހޯދުމަށް ބްރެޒިލުން ކުރާ އުއްމީދު

އާ ކޯޗަކާއެކު، އަނިޔާގެ ގިނަ މައްސަލަތަކެއްގެ ތެރެއިންނާއި ހަލަބޮލި ކޮލިފައިން މަރުހަލާއަކަށް ފަހު، 2026 ވަނަ އަހަރުގެ ވޯލްޑް ކަޕަށް ބްރެޒިލުން ކުރި ދަތުރު އެންމެ ފުރިހަމައެއް ނޫނެވެ. ހަވަނަ ފަހަރަށް ވޯލްޑް ކަޕްގެ ތަށި އުފުލާލުމުގެ މުހިންމު އަމާޒުގައި ނުކުންނައިރު، ފާއިތުވި ފަސް މުބާރާތުގެ ތެރެއިން ހަތަރު މުބާރާތެއްގައި ކުއާޓާ ފައިނަލުން ކަޓާފައިވާ ބްރެޒިލް ޓީމުގެ ނަތީޖާ ބަދަލުކުރުމަކީ އަންޗެލޮޓީއަށް އޮތް ބޮޑު ގޮންޖެހުމެކެވެ.

ބްރެޒިލަކީ އަބަދުވެސް ވޯލްޑް ކަޕްގައި ބޮޑު ސަމާލުކަމެއް ލިބޭ ޓީމެއް ނަމަވެސް، މިފަހަރު އެ ޓީމަށް އޮތް އުއްމީދުތައް އާދަޔާ ޚިލާފަށް ކުޑައެވެ. ބްރެޒިލުން އެންމެ ފަހުން ދުނިޔޭގެ ޗެމްޕިއަންކަން ހޯދިތާ މިހާރު ވަނީ 24 އަހަރު ވެފައެވެ.

"ޓީމާ މެދު ބައެއް ފަރާތްތަކުން ޝައްކު އުފެއްދުމަކީ ރަނގަޅު ކަމެއް. މީގެ ކުރިންވެސް ބައެއް މުބާރާތްތަކުގައި އެކަން އޮތީ އެގޮތަށް،" މީގެ ކުރިން ފޭވަރިޓުންގެ ގޮތުގައި ނުބެލެވުނު ނަމަވެސް ތަށި ހޯދި ބްރެޒިލް ޓީމުތަކަށް އިޝާރާތް ކުރަމުން ގޯލްކީޕަރު އެލިސަން ބުންޏެވެ.

ބްރެޒިލްގެ ސްކޮޑަށް ބަލާއިރު، ފަހަތުގައި މާކީނިއޯސް އާއި ގަބްރިއަލް، އަރިމަތިން ވިނީޝިއަސް ޖޫނިއާ އާއި ރަފީނިއާ އަދި ކުރިއަށް މެތިއަސް ކޫންޔާ ފަދަ ތަރިން ހިމެނެއެވެ. ދެ އަހަރާއި ބައިގެ މެދުކެނޑުމަކަށް ފަހު ނޭމާ ވެސް ވަނީ ޓީމާ ގުޅިފައެވެ. ނަމަވެސް، ޓީމުގެ އެންމެ މުހިންމު ތަރީގެ މަގާމުން، އަނިޔާގެ ސަބަބުން ކުޅެވޭނެ ކަމުގެ ޔަގީންކަމެއް ނެތް ކުޅުންތެރިއަކަށް ނޭމާ ބަދަލުވުމަކީ ބްރެޒިލްގެ ކެމްޕޭނަށް އޮތް ބޮޑު ނުތަނަވަސްކަމެކެވެ.

މޮރޮކޯއަށް ބްރެޒިލް ސިއްސުވާލެވިދާނެތަ؟

މޮރޮކޯއަކީ 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގައި ސްޕެއިން އާއި ޕޯޗުގަލް ކަޓުވާލުމަށްފަހު ސެމީ ފައިނަލަށް ދަތުރުކޮށް، ދުނިޔެ ސިއްސުވާލި ޓީމެވެ. އެ ޓީމު ސެމީގައި ބަލިވީ ފްރާންސް އަތުންނެވެ.

ވޯލްޑް ކަޕްގެ ސެމީ ފައިނަލަށް ދަތުރުކުރި އެފްރިކާ އަދި އަރަބި ފުރަތަމަ ގައުމުގެ ގޮތުގައި އޮތް މޮރޮކޯ، 2026 ވަނަ އަހަރުގެ މުބާރާތަށް ނުކުންނަނީ މެދުއިރުމައްޗާއި އުތުރު އެފްރިކާ ސަރަހައްދުގެ ޓީމުތަކުގެ ތެރެއިން އެންމެ ކުރިއަށް ދާނެ ކަމަށް ބެލެވޭ ޓީމުގެ ގޮތުގައެވެ.

ސްޕެއިން އާއި ފްރާންސްގެ އެކަޑަމީތަކާއި ލީގުތަކުން ތަމްރީނުވެފައިވާ ކުޅުންތެރިންގެ މައްޗަށް އެކުލެވޭ މޮރޮކޯ ޓީމަކީ، ބްރެޒިލްގެ ފުރަތަމަ މެޗު އުނދަގޫ ކޮށްލުމުގެ ފެންވަރު ހުރި ޓީމެކެވެ. ނަމަވެސް، އެ ޓީމުގެ ތެރޭގައި ވެސް ބައެއް މައްސަލަތައް އެބަހުއްޓެވެ.

މޮރޮކޯއިން 2026 ވަނަ އަހަރު ފެށީ އަމިއްލަ ގައުމުގައި ބޭއްވި އެފްރިކާ ކަޕް އޮފް ނޭޝަންސްގެ ފައިނަލުގައި ސެނެގާލް އަތުން ބަލިވެގެންނެވެ. ނަމަވެސް، ފަހުން އެ ޓީމަށް ތަށި ލިބުނީ، ޕެނަލްޓީއަކާ މެދު ހިތްހަމަނުޖެހިގެން އިދިކޮޅު ޓީމުން ދަނޑުން ފޭބުމާ ގުޅިގެން އެޅި ފިޔަވަޅެއްގެ ގޮތުންނެވެ.

ގިނަ ދުވަސްތަކެއް ވަންދެން ކޯޗުކަން ކުރި ވަލީދު ރެގްރާގީ، ވޯލްޑް ކަޕްގެ ތިން މަސް ކުރިން މަގާމުން ވަކިވުމުން، އެ މަގާމަށް މިހާރު އައްޔަންކޮށްފައިވަނީ ބެލްޖިއަމަށް އުފަން މުހައްމަދު އުއާބީއެވެ. އޭނާއަކީ މިދިޔަ އަހަރު ޗިލީގައި ބޭއްވި 20 އަހަރުން ދަށުގެ ވޯލްޑް ކަޕް މޮރޮކޯއަށް ކާމިޔާބުކޮށްދިން ކޯޗެވެ.

ބްރެޒިލް އާއި މޮރޮކޯ މެޗުގެ ލަފާކުރުންތައް

ތަފާސްހިސާބުތައް ދިރާސާކުރާ އޮޕްޓާ އެނަލިސްޓުން ލަފާކުރާ ގޮތުގައި މި މެޗުން ބްރެޒިލް މޮޅުވުމުގެ ފުރުސަތު 57.7 އިންސައްތަ އެބައޮތެވެ. މޮރޮކޯ މޮޅުވުމުގެ ފުރުސަތު އޮތީ 18.8 އިންސައްތައެވެ.

މި މެޗު އެއްވަރުވުމުގެ ފުރުސަތު އޮތީ 23.5 އިންސައްތައިގައެވެ. މުޅި ގްރޫޕް ސީގެ އެއްވަނަ ބްރެޒިލަށް ލިބުމުގެ 65.85 އިންސައްތަ ފުރުސަތު އޮތްއިރު، މޮރޮކޯއަށް އެ ފުރުސަތު އޮތީ 23.14 އިންސައްތައިގައެވެ.

ވޯލްޑް ކަޕްގެ ގްރޫޕް ސްޓޭޖު ކުރިއަށްދާ ގޮތް

ގްރޫޕް ސީގައި ހިމެނެނީ ބްރެޒިލް، މޮރޮކޯ، ހެއިޓީ އަދި ސްކޮޓްލޭންޑެވެ.

ކޮންމެ ގްރޫޕަކުން އެންމެ ކުރި ހޯދާ ދެ ޓީމުގެ އިތުރުން، ތިންވަނައަށް ދާ ޓީމުތަކުގެ ތެރެއިން އެންމެ ނަތީޖާ ރަނގަޅު އަށް ޓީމު ދެވަނަ ބުރަށް ނުވަތަ ގަދަ 32 ގެ ބުރަށް ދަތުރުކުރާނެއެވެ. މިއީ ވޯލްޑް ކަޕްގެ ތާރީޚުގައި އަލަށް ތައާރަފުކުރި ބުރެކެވެ.

ޓީމުތަކުގެ ފަހުގެ ނަތީޖާ:

(އެންމެ ފަހުން ކުޅުނު ފަސް މެޗު)

ބްރެޒިލް: މޮޅު - މޮޅު - މޮޅު - ބަލި - އެއްވަރު

މޮރޮކޯ: އެއްވަރު - މޮޅު - މޮޅު - މޮޅު - އެއްވަރު

އެންމެ ފަހުން ކުޅުނު ފަސް މެޗަށް ބަލާއިރު ބްރެޒިލަށް ވުރެ މޮރޮކޯގެ ރެކޯޑް ރަނގަޅެވެ. އެގޮތުން ޖޫން މަހު ކުޅުނު އެކުވެރިކަމުގެ މެޗުތަކުގައި ނޯވޭއާ އެއްވަރުކޮށް، މަޑަގަސްކަރަ އަތުން ވަނީ ބޮޑު ތަފާތަކުން މޮޅުވެފައެވެ. އޭގެ ކުރިން މެއި މަހު ބުރުންޑީ ބަލިކޮށް، މާރިޗު މަހު ޕެނަމާ އަތުން މޮޅުވެ އިކުއެޑޯއާ ވަނީ އެއްވަރުކޮށްފައެވެ.

ބްރެޒިލުން ވޯލްޑް ކަޕްގެ ކުރިން ކުޅުނު އެކުވެރިކަމުގެ މެޗުތަކުގައި މިސްރާއި ޕެނަމާ ބަލިކުރިއެވެ. އަދި މާރިޗު މަހު ކްރޮއޭޝިއާ އަތުން މޮޅުވި ނަމަވެސް، އެ މަހު ފްރާންސް އަތުން ވަނީ ބަލިވެފައެވެ. އަދި މިދިޔަ އަހަރުގެ ނޮވެމްބަރު މަހު ޓިއުނީޝިއާއާ ވަނީ އެއްވަރުވެފައެވެ.

ކުރިމަތިލުންތަކުގެ ތާރީޚު

ހޮނިހިރު ދުވަހުގެ މެޗަކީ މި ދެ ޓީމު ބައްދަލުކުރާ ހަތަރުވަނަ ފަހަރެވެ. މީގެ ކުރިން ކުޅުނު މެޗުތަކުގެ ތެރެއިން ބްރެޒިލް ދެ މެޗުން މޮޅުވެފައިވާއިރު، މޮރޮކޯ މޮޅުވީ އެންމެ މެޗަކުންނެވެ. އެއީ 2023 ވަނަ އަހަރު ކުޅުނު އެކުވެރިކަމުގެ މެޗަކުން 2-1 އިންނެވެ.

ވޯލްޑް ކަޕެއްގައި މި ދެ ޓީމު އެންމެ ފަހުން ބައްދަލުކުރީ 1998 ވަނަ އަހަރުގެ ގްރޫޕް ސްޓޭޖުގައެވެ. އެ މެޗު 3-0 އިން ބްރެޒިލް ކާމިޔާބުކުރީ ރޮނާލްޑޯ، ރިވާލްޑޯ އަދި ބެބެޓޯ ޖެހި ލަނޑުތަކުންނެވެ.

ނޭމާ އާއި އެޒަލްޒޫލީ އަދި އަގުއާޑަށް މެޗުން ނުފެންނާނެ

ބްރެޒިލްގެ ފުރަތަމަ އެގާރައިގައި ހިމެނޭނެ ކަމަށް ބެލެވުނު ރޮޑްރީގޯ، އެސްޓެވާއޯ، އެޑާ މިލިޓާއޯ އަދި ވެސްލީއަށް އަނިޔާގެ ސަބަބުން ސްކޮޑުން ޖާގަ ނުލިބުނުއިރު، ފައިގެ ފަލަމަސްގަނޑަށް ލިބުނު އަނިޔާއަކުން ރަނގަޅު ނުވާތީ ނޭމާ ވެސް ވަނީ މޮރޮކޯ މެޗުން ބާކީކޮށްފައެވެ. އޭނާއަށް އަލުން ކުޅުމަށް އެނބުރި އާދެވޭނީ ކޮން އިރަކު ކަމެއް އަދި ނޭނގެއެވެ.

މޮރޮކޯ ޓީމަށް ވެސް ވަނީ އަނިޔާގެ މައްސަލަތައް ކުރިމަތިވެފައެވެ. އެގޮތުން އެންމެ ފަހުން ކުޅުނު އެކުވެރިކަމުގެ މެޗުގައި ލިބުނު އަނިޔާތަކާ ގުޅިގެން ނާއިފް އަގުއާޑް އަދި އަބްދޭ އެޒަލްޒޫލީ ވަނީ ސްކޮޑުން އުނިކޮށްފައެވެ. އެ ކުޅުންތެރިންގެ ބަދަލުގައި ޓީމަށް ނަގާފައިވަނީ އަމީން ސުބައި އާއި މަރުވާން ސާދާންއެވެ.