ވޯލްޑް ކަޕްގައި ވީއޭއާރް ބޭނުންކުރުމުގައި ތާރީޚީ ނިންމުމެއް ފެނިގެންދިޔައިރު، ބެލުންތެރިންނަށް ބޮޑު ހައިރާން ކަމެއް!

ވޯލްޑް ކަޕްގައި އެމެރިކާ ކުޅުނު ފުރަތަމަ މެޗު ކާމިޔާބުކޮށް، އެ ޓީމުން މުބާރާތުގެ ފެށުން ރަނގަޅުކޮށްފިއެވެ. ނަމަވެސް، މި މެޗުގެ ތެރެއިން ވީޑިއޯ އެސިސްޓަންޓް ރެފްރީ (ވީއޭއާރް) ބޭނުންކުރުމުގައި ތާރީޚީ ނިންމުމެއް ފެނިގެންދިޔައިރު، ސޯފައި ސްޓޭޑިއަމްގައި ތިބި އެންމެން ތިބީ ވީގޮތް ނޭނގި ހައިރާންވެފައެވެ.

މުބާރާތް ބާއްވާ އެއް ގައުމު ކަމަށްވާ އެމެރިކާ އާއި ޕެރަގުއޭ ބައްދަލުކުރި ގްރޫޕް 'ޑީ' ގެ މި މެޗުގައި އޮޅުންބޮޅުންތަކެއް އުފެދުނީ، 3-0 ގެ ނަތީޖާއަކުން އެމެރިކާ ކުރީގައި އޮއްވައެވެ.

އެމެރިކާގެ އުމުރުން 38 އަހަރުގެ ތަޖުރިބާކާރު ޑިފެންޑަރު ޓިމް ރީމް، ޕެރަގުއޭގެ މިގޭލް އަލްމިރޯންއަށް ކުރި ފައުލަކާ ގުޅިގެން ރެފްރީ ވަނީ އޭނާއަށް ރީނދޫ ކާޑެއް ދައްކައި، ޕެރަގުއޭއަށް ހިލޭ ޖެހުމެއް ދީފައެވެ.

އެ ހިލޭ ޖެހުން ފޮނުވާލި ފަހުން، ނެދަލެންޑްސްގެ ރެފްރީ ޑެނީ މަކެލީއަށް ވީއޭއާރްއިން އިރުޝާދު ދިނުމުން އޭނާ ވަނީ މޮނިޓަރު ބަލައި، ކުރިން ނިންމި ނިންމުން ބަދަލުކޮށްފައެވެ. މިއީ މީގެ ކުރިން ރެފްރީންނަށް ހުއްދަ އޮންނަ ކަމެއް ނޫނެވެ.

ރެފްރީ މަކެލީ ވަނީ ޓިމް ރީމްއަށް ދެއްކި ރީނދޫ ކާޑު ބާތިލުކުރުމަށްފަހު، ނިއުކާސަލް ޔުނައިޓެޑްގެ ކުރީގެ ފޯވާޑް އަލްމިރޯން ގަސްތުގައި ވެއްޓިގަތްކަން (ޑައިވް ކުރިކަން) ސާފުކޮށް އެނގެން އޮތުމުން އޭނާއަށް ރީނދޫ ކާޑު ދައްކާފައެވެ.

މިއީ ވޯލްޑް ކަޕްގެ ތާރީޚުގައި ވީއޭއާރް މެދުވެރިކޮށް ކުރީގެ ނިންމުން ބަދަލުކުރި ފުރަތަމަ ފަހަރެވެ. ނަމަވެސް، މި ގަވާއިދު ބޭނުންކުރެވުނީ ގިނަ ބަޔަކު އުންމީދުކުރި ގޮތަކަށް ނޫނެވެ.

ފީފާއިން ވަނީ މި މުބާރާތަށް ގަވާއިދުތަކަށް ބައެއް ބަދަލުތައް ގެނެސްފައެވެ. މީގެ ތެރެއިން ކުޅުންތެރިން އޮޅުމުގެ މައްސަލައަށް ހާއްސަ ގަވާއިދެއް ހިމެނުމަށް އެދުނީ ރެފްރީންގެ ކޮމިޓީގެ އިސްވެރިޔާ ޕިއެރްލުއީޖީ ކޮލީނާއެވެ.

އަލަށް އެކުލަވާލި މި ގަވާއިދު ބުނާގޮތުން، ކުޅުންތެރިއަކަށް ރީނދޫ ކާޑެއް ނުވަތަ ރަތް ކާޑެއް ދައްކާފައިވަނިކޮށް، އެ ފައުލަކީ އަސްލު އިދިކޮޅު ޓީމުގެ ކުޅުންތެރިއަކު ކުރި ކަމެއްކަން އެނގިއްޖެނަމަ، އެ ނިންމުން ބަދަލުކުރުމުގެ އިޚުތިޔާރު ރެފްރީއަށް ލިބިގެންވެއެވެ.

މީގެ އިތުރުން، ދެވަނަ ރީނދޫ ކާޑަކާއެކު ރަތް ކާޑު ދައްކާ ހާލަތްތައް ވީއޭއާރްއިން ބެލޭނެ ގޮތަށް ގަވާއިދު ވަނީ ބަދަލުކޮށްފައެވެ. ނަމަވެސް، ފުރަތަމަ ރީނދޫ ކާޑު ރިވިއުއެއް ނުކުރެވޭނެއެވެ. ރެފްރީ މަކެލީއަށް މި ނިންމުން ބަދަލުކުރެވުނު ހަމައެކަނި ސަބަބަކީ، ކުޅުންތެރިޔާ އޮޅުމުގެ ގަވާއިދުގެ ދަށުން އެކަން ކުރަން ފުރުސަތު އޮތުމުންނެވެ.

މެޗުގެ އޮފިޝަލުން ވަނީ ކުޅުން އަލުން ފެށުމަށްފަހު މެޗު ހުއްޓުވާފައެވެ. އާންމުގޮތެއްގައި ކުޅުން އަލުން ފެށުމަށްފަހު ކުރީގެ ނިންމުމެއް ބަދަލުނުކުރެވޭތީ، މިކަމުގެ ސަބަބުން ސަޕޯޓަރުންގެ މެދުގައި ބޮޑު އޮޅުންބޮޅުމެއް އުފެދުނެވެ.

މިކަމާ ގުޅޭގޮތުން ބީބީސީ ސްޕޯޓްސްއާ ވާހަކަދައްކަމުން އެވަޓަން އަދި ވޭލްސްގެ ކުރީގެ ޑިފެންޑަރު އޭޝްލީ ވިލިއަމްސް ބުނީ، ހިލޭ ޖެހުން ޖަހަން ފުރުސަތު ދިނުމަށްފަހު ނިންމުން ބަދަލުކުރުމަކީ އާދަޔާ ހިލާފު ކަމެއް ނަމަވެސް، އެއީ ރަނގަޅު ނިންމުމެއް ކަމަށެވެ.

އޭނާ އިތުރަށް ބުނީ، މިފަދަ ކަމެއް ފެނުނު މިއީ ފުރަތަމަ ފަހަރު ކަމަށާއި، ނަމަވެސް އިންސާފުވެރިކޮށް ކަންކަން ނިންމުމަކީ މުހިންމު ކަމެއް ކަމަށެވެ.

ބީބީސީ ސްޕޯޓްސްގެ ކޮމެންޓޭޓަރު އަދި އިންގްލެންޑްގެ ކުރީގެ މިޑްފީލްޑަރު ޑެނީ މާފީ ބުނިގޮތުގައި، ގަސްތުގައި ވެއްޓިގަނެގެން އޮޅުވާލަން މަސައްކަތްކުރާ ކުޅުންތެރިންނަށް އަދަބު ލިބޭނެ ކޮންމެ ގަވާއިދަކީވެސް ފުޓްބޯޅައަށް ލިބޭ ކުރިއެރުމެކެވެ.

ޓޮޓެންހަމްގެ ކުރީގެ ކޯޗު މައުރީސިއޯ ޕޮޗެޓީނޯގެ އިރުޝާދުގެ ދަށުން ކުޅޭ އެމެރިކާ ޓީމުން މި މެޗު ކާމިޔާބުކުރީ 4-1 ގެ ނަތީޖާއަކުންނެވެ. މި ކާމިޔާބީއާއެކު އަމިއްލަ ގައުމުގެ ސަޕޯޓަރުންގެ ކުރިމަތީގައި އެމެރިކާއިން ވަނީ އުފާވެރި ފެށުމެއް ހޯދާފައެވެ.

މެޗުގެ ފުރަތަމަ ހާފު ނިމުނުއިރު އެމެރިކާ އޮތީ 3-0 އިން ކުރީގައެވެ. މިއީ ޕެރަގުއޭގެ ދަމިއަން ބޮބަޑިލާ އަތުން ބައިކޮޅަށް ވަން ލަނޑަކާއި، ފޮލަރިން ބެލޮގުން ކާމިޔާބުކުރި ދެ ލަނޑުން ހޯދި ކުރިއެރުމެކެވެ.

މި ދެ ލަނޑާއެކު ބެލޮގުން ވެފައިވަނީ ވޯލްޑް ކަޕް މެޗެއްގައި އެއް ލަނޑަށްވުރެ ގިނަ ލަނޑު ޖެހި އެމެރިކާގެ ދެވަނަ ކުޅުންތެރިޔާއަށެވެ.

ބްރެޒިލަށް އުފަން މައުރީސިއޯ ޕެރަގުއޭއަށް ލަނޑެއް ޖަހައިދީ އުންމީދެއް ހޯދައިދިން ނަމަވެސް، މެޗުގެ އެންމެ ފަހު ވަގުތު ބަދަލު ކުޅުންތެރިއެއްގެ ގޮތުގައި ކުޅެން އެރި ޖިއޮވާނީ ރޭނާ ވަނީ ހިތްގައިމު ލަނޑެއް ޖަހާފައެވެ. އޭނާ މި ލަނޑު ކާމިޔާބުކުރީ އޭރިއާ ބޭރުން ފޮނުވާލި ބޯޅަ ގޯލުގެ ކަނަށް އޮއްސާލައިގެންނެވެ.