އޮމާން ކައިރީގައި ތެޔޮ ޓޭންކަރަކަށް ހަމަލާދީފި
އޮމާންގެ އިރުމަތީ ބޭރުން ދަތުރުކުރި ތެޔޮ ޓޭންކަރަކަށް ހުކުރު ދުވަހު ދިން ހަމަލާއެއްގައި އެ އުޅަނދަށް ގެއްލުންތަކެއް ލިބިފައިވީ ނަމަވެސް، އެއްވެސް ފަޅުވެރިއަކަށް އަނިޔާއެއް ލިބިފައެއް ނުވޭ. މި ހާދިސާގައި ތިމާވެއްޓަށް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައި ނުވާއިރު، އެ އުޅަނދު މިހާރު ދަނީ އޭގެ މަންޒިލަށް ދަތުރުކުރަމުން.
2019 ވަނަ އަހަރުގެ ޖޫން މަހުގެ 15 ވަނަ ދުވަހު ނަގާފައިވާ މި ފޮޓޯއިން ފެންނަނީ، އެކުވެރި އަރަބި އިމާރާތުގެ އިރުމަތީ ފަރާތުގައި އޮންނަ ފުޖައިރާގެ އައްސޭރިފަށުން ބޭރުން، އޮމާން ކަނޑުގެ ސަރަހައްދުގައި ދަތުރުކުރަމުންދާ ތެޔޮ އުފުލާ ބޯޓުތަކެއް. | އޭއެފްޕީ
އޮމާންގެ އައްސޭރިފަށުން ދަތުރުކުރަމުންދިޔަ ތެޔޮ ޓޭންކަރަކަށް، ކޮން އެއްޗެއްކަން ނޭނގޭ އެއްޗަކުން ހަމަލާދީ، އެ އުޅަނދުގެ ވައަތްފަރާތު ކުރީކޮޅަށް ގެއްލުންތަކެއް ލިބިފައިވާ ކަމަށް ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫ.ކޭ.އެމް.ޓީ.އޯ) އިން ހޮނިހިރު ދުވަހު ބުނެފިއެވެ.
ޔޫ.ކޭ.އެމް.ޓީ.އޯ އިން ހާމަކޮށްފައިވާ ގޮތުގައި މި ހާދިސާ ހިނގާފައިވަނީ ހުކުރު ދުވަހު، އޮމާންގެ އިރުމަތިން 6 ނޯޓިކަލް މޭލު ބޭރުގައެވެ. މި ހަމަލާގައި އެއްވެސް ފަޅުވެރިއަކަށް އަނިޔާއެއް ލިބިފައި ނުވާކަމަށާއި، ތިމާވެއްޓަށް ވެސް އެއްވެސް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައި ނުވާ ކަމަށް އެ އިދާރާއިން ބުނެއެވެ. އަދި ހަމަލާ އަމާޒުވި ތެޔޮ ޓޭންކަރު މިހާރު ދަނީ އެ އުޅަނދު ދަތުރުކުރަން ހަމަޖެހިފައިވާ ކުރިއަށް އޮތް ބަނދަރަށް ދިއުމަށް ދަތުރުކުރަމުންނެވެ.
މަސްދަރު: ރޮއިޓާސް
