އެމެރިކާ އާއި އީރާނާ ދެމެދު ކުރިއަށް ގެންދާ މަޝްވަރާ ބައްދަަލުވުންތަކުގެ ހަތަރު ވަނަ ބުރުގެ ބައްދަލުވުން ފަސް ކޮށްފި އެވެ.

އޮމާން މެދުވެރި ވެގެން ކުރިއަށް ގެންދާ މި މަޝްވަރާއް ބައްދަލުވުންތަކާ ގުޅޭ ގޮތުން އެ ޤައުމުން ބުނީ، "ލޮޖިސްޓިކަލް" ސަބަބުތަކާ ހުރެ އެ ބައްދަލުވުމުގެ ހަތަރު ވަނަ ބުރު ފަސްކޮށްފައިވާ ކަމަށެވެ.

އޮމާންގެ ފޮރިން މިނިސްޓަރު ބަދުރު އަލް ބުސައިދީ އެކްސްގައި ކުރެއްވި ޕޯސްޓެއްގައި ވިދާޅުވީ، މެއި މަހުގެ ތިން ވަނަ ދުވަހު ބާއްވަން ހަަމަޖެހިފައިވާ ބައްދަލުވުން އެހެން ތާރީޚަކަށް ފަސްކޮށްފައިވާ ކަމަށެވެ. 

އެހެން ތާރީޚަކަށް ބައްދަލުވުން ފަސް ކުރި ނަމަވެސް، ދެން ބައްދަލުވުން އޮންނާނެ ތާރީޚެއް ހާމަ ކޮށްފައި ނުވެ އެވެ. އޭގެ ބަދަލުގައި އޭނާ ވިދާޅުވީ، ދެ ފަރާތުން އެއްބަސްވާ ތާރީޚެއް ފަހުން ހާމަ ކުރައްވާނެ ކަމަށެވެ. 

އެހެން ނަމަވެސް ބައެއް އިތުބާރު ހުރި މަސްދަރުތަކާ ހަވާލާދީ މީޑިއާ ތަކުގައި ބުނެފައިވާ ގޮތުން، ހޮނިހިރު ދުވަހު ބާއްވަން ތާވަލު ކޮށްފައި އޮތް ބައްދަލުވުމަށް މީގެ ކުރިން އެމެރިކާ އިން އެއްބަސްވެފައި ނުވެ އެވެ.

އީރާންގެ އިސް އޮފިޝަލަކާ ހަވާލާދީ ރޮއިޓާސްގައި ބުނެފައިވާ ގޮތުން، އެ މަޝްވަރާ ބައްދަލުވުންތައް ކުރިއަށް ދިޔައިރު ވެސް، އެމެރިކާ އިން ދިޔައީ އެ ޤައުމާ ދެކޮޅަށް ދަތި ކުރުމުގެ ފިޔަވަޅުތައް އަޅަމުންނެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ރިޔާސީ ފުރަަތަމަ ދައުރުގެ ތެރޭގައި ވަނީ ނިއުކްލިއާ އެއްބަސްވުމުން ބޭރުވެފަ އެވެ. އަދި މިހާރު ދެ ވަނަ ދައުރެއް ފުރުއްވަމުން އަންނައިރު، ޓްރަމްޕް ވިދާޅުވެފައި ވަނީ އެއްބަސްވުމަކަށް ނާންނަ ނަމަ، އީރާނަށް ހަމަލާ ދިނުމަށް ވެސް އެމެރިކާ އިން ފަސް ނުޖެހޭނެ ކަމަށެވެ.