އެމެރިކާ އާއި އީރާންގެ މަޝްވަރާތައް "އުންމީދީ": ވިކްޓޮފް

އެމެރިކާ އާއި އީރާނާ ދެމެދު ކުރިއަށް ގެންދެވޭ މަޝްވަރާތައް ވަރަށް އުންމީދީ ކަމަށް، އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން މެދު އިރު މައްޗަށް ކަނޑައަޅާފައި ހުންނަވާ ޚާއްސަ މަންދޫބު ސްޓީވް ވިކްޓޮފް ވިދާޅުވެއްޖެ އެވެ.

ފޮކްސް ނިއުސްގެ ޝޯއެއްގައި ބައިވެރިވެ ވަޑައިގެން ވާހަކަ ދައްކަވަމުން ވިކްޓޮފް ވިދާޅުވެފައި ވަނީ، އީރާނާ އެކު ކުރިއަށް ގެންދެވޭ މަޝްވަރާތައް ވަރަށް އުންމީދީ ކަމަށާއި، ދިގު މުއްދަތެއްގެ ސުލްހަވެރިކަމަކަށް އެމެރިކާ އިން އުންމީދު ކުރާ ކަމަށެވެ. 

އެ ޝޯގައި ވާހަކަ ދައްކަވަމުން ވިކްޓޮފް ވިދާޅުވީ އެމެރިކާ އާއި އީރާނާ ދެމެދު ސީދާ ގޮތުން މަޝްވަރާ ކުރެވެމުން އަންނަ ކަމަށާއި، އަދި އެހެން ފަރާތްތަކުގެ އެހީގައި ވެސް މަޝްވަރާ ކުރެވެމުން އަންނަ ކަމަށެވެ. އަދި އޭނާ ވިދާޅުވީ، މަޝްވަރާތަކުގެ އަލީގައި ސުލްހަވެރި ކަމުގެ އުންމީދެއް އޭނާ އަށް ވެސް އޮތް ކަމަށެވެ. 

މިއަހަރުގެ އޭޕްރީލް މަހުން ފެށިގެން އީރާނާއި އެމެރިކާއާ ދެމެދު އަންނަނީ މަޝްވަރާތައް ކުރިއަށް ގެންދަމުންނެވެ. އެގޮތުން ނިއުކްލިއާ ޕްރޮގްރާމާ ގުޅުން ހުރި މަޝްވަރާތައް ކުރިއަށް ގެންދަމުން އަންނަނީ އޮމާން އިން މެދުވެރިއެއްގެ އަދާ ކުރާ ގޮތަށެވެ. އީރާން އިން ބުނަމުން އަންނަނީ އެ ޤައުމުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ކުރިއަށް ގެންދެވޭ ޕްރޮގްރާމެއް ކަމަށެވެ. 

އެހެން ނަމަވެސް، އެމެރިކާ އިން ބުނަމުން އަންނަނީ އީރާނަށް އެއްވެސް މިންވަރަަކަށް ނިއުކްލިއާ ހަތިޔާރު އުފެއްދިގެން ނުވާނެ ކަމަށެވެ. އަދި އަބަދު ވެސް އެމެރިކާ އިން އެކަމާ ދެކޮޅު ހަދަމުން އަންނައިރު، ދެ ޤައުމަށް އެއްބަސްވުމަަކަށް ވެސް ނާދެވިގެން އުޅެނީ އެ ސަބަބާ ހުރެ އެވެ. 

އެމެރިކާ އާއި އީރާނާ ދެމެދު ކުރިއަށް ގެންދަމުން އަންނަ މަޝްވަރާތަކުގައި މިހާތަނަށް ވަނީ ފަސް ބައްދަލުވުމެއް ބާއްވައިފަ އެވެ. ހަ ވަނަ ބައްްދަލުވުމެއް ތާވަލު ކުރުމަށް ފަހު، ފަހު ވަގުތު ކެންސަލް ކުރީ އީރާން އިސްރާއީލް ހަނގުރާމައިގެ ސަބަބުންނެވެ.