އެމެރިކާގެ ޑިފެންސް ސެކްރެޓަރީގެ އިންޒާރު އީރާނަށް

އީރާނުން ހޫތީންނަށް އެހީތެރިވަމުން އަންނާތީ، އެކަމާ ގުޅިގެން އެމެރިކާގެ ޑިފެންސް ސެކްރެޓަރީ ޕީޓް ހެގްސެތު އީރާނަށް އިންޒާރު ދެއްވައިފި އެވެ.

ބުދަ ދުވަހު އޭނާ ވިދާޅުވީ ހޫތީންނަށް އެހީތެރިވުމުގެ އެންމެހައި ނަތީޖާއަކާ އީރާނުން ކުރިމަތިލާން ޖެހޭނެ ކަމަށެވެ. އޭނާ މިފަދައިން ވާހަކަ ދައްކަވާފައި މި ވަނީ، އެމެރިކާ އާއި އީރާނާ ދެމެދު ނިއުކްލިއާ ޕްރޮގްރާމާ ގުޅޭ މަޝްވަރާތައް އަލުން ފެށިފައިވާ ދަނޑިވަޅެެއްގަ އެވެ. އޮމާން މެދުވެރިކޮށް މިހާތަނަށް ވަނީ އެކަމާ ގުޅުން ހުރި މަޝްވަރާތަކުގެ ތިން ބައްދަލުވުމެއް ބާއްވައިފަ އެވެ. 

މި މަޝްވަރާތަކުގެ މަޤުސަދަކީ އީރާނަށް ނިއުކްލިއާ ހަތިޔާރު ހޯދުން ހުއްޓުވުމާއި، އެމެރިކާ އިން އަޅާފައިވާ އިޤްތިސާދީ ފިޔަވަޅުތައް ލުއި ކުރުމެވެ. 

ހެގްސެތު ވިދާޅުވީ އީރާނުން ހޫތީން އަށް ދެމުން އަންނަ އެހީތެރިކަން އެމެރިކާ އަށް ވަރަށް ރަނގަޅަށް ފެންނަ ކަމަށެވެ. އަދި އީރާނުން ކުރަމުން އަންނަ ކަންތައްތައް ވެސް ވަރަށް ރަނގަޅަށް އިނގޭ ކަމުގައި އޭނާ ވިދާޅުވި އެވެ. 

އެކްސްގައި ކުރެއްވި ޕޯސްޓެއްގައި އިތުރަށް އޭނާ ވިދާޅުވެފައި ވަނީ، އެމެރިކާ ސިފައިންގެ ޤާބިލުކަން އީރާނަށް އިނގެންވާނެ ކަމަށެވެ. އެކަމުގެ އިންޒާރު ވެސް ދެވިފައިވާނެކަން ފާހަގަ ކުރައްވައި އޭނާ ވިދާޅުވީ، އެމެރިކާ އިން ކަނޑައަޅާ ވަގުތެއްގައި، އެމެރިކާ އިން ކަނޑައަޅާ ތަނެއްގައި އޭގެ ނަތީޖާތަކާ ކުރިމަތިލާން ޖެހޭނެ ކަމަށެވެ.

ޔަމަންގެ އުތުރު ސަރަޙައްދު ކޮންޓްރޯލު ކުރާ ހޫތީނުން ވަނީ ރަތް ކަނޑު ގައި ދަތުރު ކުރާ އުޅަނދު ފަހަރަށް ހަމަލާދީފަ އެވެ. މިއީ ފަލަސްޠީނުގެ ރައްޔިތުންނާ އެއްބައިވަންތަކަން ފާޅުކުރުމަށް ކަމަށް ބުނެ ހޫތީން އިން ދެމުން އަންނަ ހަމަލާތަކެކެވެ.

މިދިޔަ މާޗު މަހުން ފެށިގެން، އެމެރިކާ އިން ވަނީ ޔަމަންގެ 1,000 އަމާޒަށް ހަމަލާ ދީފަ އެވެ.