2026 ވަނަ އަހަރުގެ ވޯލްޑް ކަޕް: މުބާރާތާ ގުޅޭ މުހިންމު ބައެއް މައުލޫމާތު

ފީފާ ވޯލްޑް ކަޕާ ގުޅިގެން އުފެދިފައިވާ ފޯރިއާއި ޖޯޝު ފާހަގަނުކޮށް ދޫކޮށްލުމަކީ ދަތި ކަމެކެވެ.

ފުޓްބޯޅައަކީ ދުނިޔޭގައި އެންމެ މަގުބޫލު ކުޅިވަރެވެ. އަދި ވޯލްޑް ކަޕަކީ މި ކުޅިވަރުގެ ދުނިޔޭގައި ކާމިޔާބު ކުރެވޭނެ އެންމެ ޝަރަފުވެރި ތައްޓެވެ.

މި މުބާރާތުގެ ގާތްގަނޑަކަށް 100 އަހަރުވީ ތާރީޚުގައި ފުރަތަމަ ފަހަރަށް، 2026 ވަނަ އަހަރުގެ މުބާރާތް ބާއްވާނީ ތިން ގައުމެއް ގުޅިގެންނެވެ. އެއީ މެކްސިކޯ، ކެނެޑާ އަދި އެމެރިކާއެވެ.

މުބާރާތް ހުޅުވާ މެޗު ޖޫން މަހުގެ 11 ވަނަ ދުވަހު މެކްސިކޯ ސިޓީގައި ކުޅުމަށް ހަމަޖެހިފައިވާއިރު، ފައިނަލް މެޗު އޮންނާނީ ޖުލައި މަހުގެ 19 ވަނަ ދުވަހު އެމެރިކާގެ ނިއު ޖާޒީގައެވެ.

ވޯލްޑް ކަޕް ބާއްވަނީ ކޮންމެ ހަތަރު އަހަރަކުން އެއްފަހަރުއެވެ. 2026 ވަނަ އަހަރުގެ މުބާރާތަކީ ތާރީޚުގައިވެސް އެންމެ ގިނަ ގައުމު ވާދަކުރާ މުބާރާތެވެ. މިގޮތުން 48 ގައުމެއް މި މުބާރާތުގައި ވާދަކުރާނެއެވެ. ދުނިޔޭގެ ރޭންކިންއަށް ބަލައި، ޓީމުތައް ވަނީ ކޮންމެ ގްރޫޕެއްގައި ހަތަރު ގައުމު ހިމެނޭހެން 12 ގްރޫޕަކަށް ބަހާލާފައެވެ.

ކޮންމެ ގްރޫޕަކުން އެންމެ ކުރި ހޯދާ ދެ ޓީމު އޮޓޮމެޓިކުން ދެވަނަ ބުރަށް ނުވަތަ "ރައުންޑް އޮފް 32" އަށް ހޮވޭނެއެވެ.

މެޗަކުން މޮޅުވުމުން ޓީމަކަށް ތިން ޕޮއިންޓް ލިބޭއިރު، އެއްވަރުވުމުން ކޮންމެ ޓީމަކަށް ލިބޭނީ އެއް ޕޮއިންޓެވެ. އަދި ބަލިވާ ޓީމަށް އެއްވެސް ޕޮއިންޓެއް ނުލިބޭނެއެވެ.

ދެވަނަ ބުރުގެ ބާކީ ޖާގަތައް ފުރޭނީ ގްރޫޕް ސްޓޭޖުގައި ތިންވަނައަށް ދިޔަ ޓީމުތަކުގެ ތެރެއިން އެންމެ ނަތީޖާ ރަނގަޅު ޓީމުތަކުންނެވެ. މި މަރުހަލާގައި ޖުމްލަ 16 ޓީމެއް މުބާރާތުން ވަކިވާނެއެވެ.

މެޗެއްގެ ދިގުމިނަކީ 90 މިނެޓެވެ. މިއީ 45 މިނެޓުގެ ދެ ހާފަށް ބަހާލެވިފައިވާ ވަގުތެކެވެ. ދެ ހާފު ދެމެދު ކުޅުންތެރިންނަށް 15 މިނެޓުގެ މެދުކެނޑުމެއް ލިބޭނެއެވެ.

މެޗުގެ ވަގުތު ހިނގަމުންދާއިރު، ކުޅުން މެދުކެނޑުނު ނަމަވެސް ގަޑިއެއް ނުހުއްޓޭނެއެވެ. ކުޅުންތެރިންނަށް ލިބޭ އަނިޔާތަކަށް ފަރުވާ ދިނުމާއި، އެހެނިހެން ސަބަބުތަކާ ހުރެ ގެއްލޭ ވަގުތުގެ ބަދަލުގައި ކޮންމެ ހާފެއްގެ ނިމުމުގައި އިތުރު ވަގުތު ދެވޭނެއެވެ. މީގެ އިތުރުން، ހޫނުގަދަވުމުގެ ސަބަބުން ކުޅުންތެރިންނަށް ފެން ބުއިމަށް ފީފާއިން ކަނޑައަޅާފައިވާ ވަގުތުވެސް މީގެ ތެރޭގައި ހިމެނެއެވެ.

ގްރޫޕް ސްޓޭޖުގެ މެޗުތަކުގައި ނަތީޖާ ނެރުމަށް ޕެނަލްޓީ ޖެހުމެއް ނޯންނާނެއެވެ.

ނަމަވެސް ގްރޫޕް ސްޓޭޖަށްފަހު ކުޅޭ މެޗުތައް އެއްވަރުވެއްޖެނަމަ، އިތުރު 30 މިނެޓު ކުޅޭނެއެވެ. އެ ވަގުތުގެ ތެރޭގައިވެސް ނަތީޖާއެއް ނުނިކުމެއްޖެނަމަ، މޮޅުވާ ޓީމެއް ކަނޑައަޅާނީ ޕެނަލްޓީ ޖަހައިގެންނެވެ.

މެކްސިކޯގައި މެޗުތައް ކުޅޭނީ ގުއަޑަލަހާރާ، މޮންޓެރޭ އަދި މެކްސިކޯ ސިޓީގައެވެ. ކެނެޑާގައި ޓޮރޮންޓޯ އަދި ވެންކޫވަރުގައި މެޗުތައް އޮންނައިރު، އެމެރިކާގައި އެޓްލާންޓާ، ބޮސްޓަން، ޑަލަސް، ހިއުސްޓަން، ކެންސަސް ސިޓީ، ލޮސް އެންޖެލިސް، މިއާމީ، ނިއު ޔޯކް/ނިއު ޖާޒީ، ފިލަޑެލްފިއާ، ސެން ފްރެންސިސްކޯ ބޭ އޭރިއާ އަދި ސިއެޓްލްގައި މެޗުތައް ކުރިއަށްދާނެއެވެ.

މިފަހަރުގެ މުބާރާތް ކާމިޔާބު ކުރާނެ ކަމަށް ބޮޑަށް ބެލެވެނީ ދެ ފަހަރު ތަށި ހޯދާފައިވާ ފްރާންސާއި 2010 ވަނަ އަހަރުގެ ޗެމްޕިއަން ސްޕެއިނެވެ.

ފްރާންސްގެ ޓީމުގައި ކީލިއަން އެމްބާޕޭ އާއި އޮސްމާނޭ ޑެމްބެލޭ ފަދަ ޔޫރަޕްގެ ބޮޑެތި ކްލަބުތަކުގައި މޮޅު ކުޅުމެއް ދައްކަމުންދާ ތަރިން ހިމެނެއެވެ.

ސްޕެއިނުން ބަރޯސާވަނީ 18 އަހަރުގެ ލަމީން ޔަމާލް ފަދަ ޒުވާން ހުނަރުވެރިންނަށެވެ. އެ ޓީމުގެ އުންމީދަކީ ދެ އަހަރު ތެރޭގައި ދެވަނަ ބޮޑު މުބާރާތެއް ކާމިޔާބު ކުރުމެވެ.

ޔޫރަޕިއަން ޗެމްޕިއަންޝިޕްގެ ފައިނަލުން ޖެހިޖެހިގެން ދެ ފަހަރު ބަލިވުމުގެ ހިތްދަތިކަން ތަހައްމަލު ކުރަން ޖެހުނު އިންގްލެންޑަށްވެސް މިފަހަރު ފުރުސަތު އެބައޮތެވެ.

މީގެ އިތުރުން، ވޯލްޑް ކަޕްގެ ތާރީޚުގައި އެންމެ ކާމިޔާބު ގައުމު ކަމަށްވާ ބްރެޒިލަކީ އަބަދުވެސް ފޭވަރިޓުންނެވެ.

ބްރެޒިލުން މަސައްކަތް ކުރަމުންދަނީ ހަވަނަ ފަހަރަށް ދުނިޔޭގެ ތަށި އުފުލާލުމަށެވެ. މިއީ 2002 ވަނަ އަހަރަށްފަހު އެ ގައުމަށް މި ތަށި ހޯދޭނެ ފުރަތަމަ ފަހަރެވެ.

މި ހޫނު މޫސުމުގައި އެންމެ ފާހަގަކޮށްލެވޭނެ ކުޅުންތެރިންގެ ތެރޭގައި އެމްބާޕޭ އާއި ޔަމާލް ހިމެނޭނެ ކަމަށް ބެލެވެއެވެ. އެމްބާޕޭ ފްރާންސަށް ކުޅޭ މިއީ ތިންވަނަ ވޯލްޑް ކަޕެވެ. އޭނާ ވަނީ ޖެހިޖެހިގެން ދެ ފައިނަލަށް އެ ގައުމު ގެންގޮސްދީފައެވެ.

އޭގެ ތެރެއިން 2018 ވަނަ އަހަރު އޭނާ ތަށި ހޯދިއިރު، 2022 ވަނަ އަހަރު ވީ ބައްޔެވެ.

ސްޕެއިންގެ ޔަމާލަކީ ފުޓްބޯޅައިގެ އާ ޖީލުގެ ހުނަރުވެރިއެކެވެ. އޭނާއަކީ މުސްތަގުބަލުގައި މި ކުޅިވަރުގެ އެންމެ ބޮޑު އެއް ތަރިއަށް ވުމުގެ ފުރުސަތު އޮތް ކުޅުންތެރިއެކެވެ.

ވޭތުވެދިޔަ ވިހި އަހަރު ފުޓްބޯޅައިގައި ރަސްކަންކުރި އާޖެންޓީނާގެ ލިއޮނަލް މެސީ އާއި ޕޯޗުގަލްގެ ކްރިސްޓިއާނޯ ރޮނާލްޑޯއަށް ގިނަ ބައެއްގެ ސަމާލުކަން ހުއްޓޭނެއެވެ.

މި ޖޫން މަހު މެސީއަށް 39 އަހަރު ފުރޭއިރު، ރޮނާލްޑޯގެ އުމުރަކީ 41 އަހަރެވެ. އެހެންކަމުން މިއީ ކުޅުން ހުއްޓާލުމުގެ ކުރިން އެ ދެ ކުޅުންތެރިން ފެންނާނެ ފަހު ބޮޑު މުބާރާތަށް ވުން ގާތެވެ.

މީގެ އިތުރުން ބްރެޒިލްގެ ނޭމާ އާއި ވިނީޝިއަސް ޖޫނިއާ، އިންގްލެންޑްގެ ޖޫޑް ބެލިންހަމް، އެމެރިކާގެ ކްރިސްޓިއަން ޕުލިސިކް، ކެނެޑާގެ އަލްފޮންސޯ ޑޭވީސް، ދެކުނު ކޮރެއާގެ ސޮން ހިއުން-މިން، ގާނާގެ އެންޓޮއިން ސެމެންޔޯ އަދި ނޯވޭގެ އާލިން ހާލަންޑަކީ ފާހަގަކޮށްލެވޭނެ ކުޅުންތެރިންނެވެ. މެންޗެސްޓާ ސިޓީއަށް ކުޅޭ ހާލަންޑަކީ ވޭތުވެދިޔަ ހަތަރު ސީޒަނުގެ ތެރެއިން ތިން ސީޒަނެއްގައި އިނގިރޭސި ޕްރިމިއާ ލީގުގެ އެންމެ ގިނަ ލަނޑު ޖެހި ކުޅުންތެރިޔާއެވެ.

މުބާރާތުގެ ފޯމެޓަށް ގެނައި ބަދަލާއެކު ގިނަ ގައުމުތަކަކަށް ފުރުސަތު ލިބިގެންދިޔައެވެ. މީގެ ސަބަބުން މީގެ ކުރިން ދުވަހަކުވެސް ވޯލްޑް ކަޕުން ނުފެންނަ ގައުމުތަކެއް މިފަހަރު ފެންނާނެއެވެ.

އާބާދީގައި އެންމެ 156,000 މީހުން ހިމެނޭ ކިއުރަސާއޯއަކީ ވޯލްޑް ކަޕަށް ހޮވުނު އެންމެ ކުޑަ ގައުމުގެ ގޮތުގައި ތާރީޚީ ރެކޯޑެއް ގާއިމުކުރާނެ ގައުމެވެ. މީގެ ކުރިން މި ރެކޯޑު އޮތީ 2018 ވަނަ އަހަރު މުބާރާތުގައި ވާދަކުރި އައިސްލޭންޑް އަތުގައެވެ.

މުބާރާތުގައި އަލަށް ބައިވެރިވާ އަނެއް ކުޑަ ޖަޒީރާ ގައުމަކީ ކޭޕް ވާޑޭއެވެ. ގާތްގަނޑަކަށް 500,000 މީހުންގެ އާބާދީއެއް އޮތް މި ގައުމަކީ ވޯލްޑް ކަޕަށް ހޮވުނު ތިންވަނައަށް އެންމެ ކުޑަ ގައުމެވެ.

އުރުދުން (ޖޯޑަން) އިން ވަނީ ފަހަކަށް އައިސް ފުޓްބޯޅައިގައި ބޮޑެތި ކުރިއެރުންތަކެއް ހޯދައި، ފުރަތަމަ ފަހަރަށް ވޯލްޑް ކަޕަށް ކޮލިފައިވެފައެވެ. އެ ޓީމުގެ ހެޑް ކޯޗު، މޮރޮކޯއަށް އުފަން ޖަމާލް ސެލާމީއަށް ވަނީ އުރުދުންގެ ރަސްގެފާނު އަބްދުﷲ ދެވަނަ އެ ގައުމުގެ ރައްޔިތުކަން ދެއްވާފައެވެ. އެއީ އެ ޓީމު ދުނިޔޭގެ ފެންވަރަށް ގެންގޮސްދިނުމުގެ އަގުވަޒަން ކުރުމުގެ ގޮތުންނެވެ.

މުބާރާތުގައި އަލަށް ވާދަކުރާ އަނެއް ގައުމަކީ އުޒްބެކިސްތާނެވެ. އެ ޓީމުގެ ކޯޗަކީ ކުޅުންތެރިއެއްގެ ގޮތުގައި ހަތަރު ވޯލްޑް ކަޕެއްގައި ވާދަކޮށް، 2006 ވަނަ އަހަރު އިޓަލީގެ ކެޕްޓަނެއްގެ ގޮތުގައި ތަށި އުފުލާލި ފަބިއޯ ކަނަވާރޯ ކަމަށްވުމުން، އެ ޓީމަށް އޭނާގެ ތަޖުރިބާގެ ފައިދާ ކުރާނެއެވެ.

ފުޓްބޯޅައަކީ ހަމައެކަނި ކުޅިވަރެއް ނޫނެވެ. ބައެއް މުހިންމު މެޗުތަކުގެ ފަހަތުގައި ސިޔާސީ އަދި ތާރީޚީ ސަބަބުތައް އެކުލެވިގެންވެއެވެ.

ޖޫން 16 ވަނަ ދުވަހު ފްރާންސާއި ސެނެގާލް ބައްދަލުކުރާއިރު، އެ މެޗުން ފެނިގެންދާނީ އެ ދެ ގައުމުގެ ދެމެދުގައި އޮތް އިސްތިއުމާރީ ތާރީޚުގެ އަސަރުތަކެވެ.

2002 ވަނަ އަހަރުގެ ވޯލްޑް ކަޕްގައި ސެނެގާލުން ވަނީ އޭރުގެ ޗެމްޕިއަން ފްރާންސް ބަލިކޮށް ދުނިޔެ ސިއްސުވާލާފައެވެ.

އިސްތިއުމާރީ ގުޅުންތަކެއް އޮތް ގާނާ އާއި އިންގްލެންޑް ބައްދަލުކުރާ މެޗު އޮންނާނީ ޖޫން 23 ވަނަ ދުވަހު ފިލަޑެލްފިއާގައެވެ.

އީރާނުން މި މުބާރާތަށް އަންނަނީ މުބާރާތް ބާއްވާ އެއް ގައުމު ކަމަށްވާ އެމެރިކާއާއެކު ހަނގުރާމައިގެ ހާލަތެއްގައި އޮވެއެވެ.

ގްރޫޕް ސްޓޭޖުގައި އީރާނުގެ ހުރިހާ މެޗެއް އެމެރިކާގައި އޮތް ނަމަވެސް، އެ ޓީމުން ބޭސް ކޭމްޕް ޖަހާފައިވަނީ މެކްސިކޯގައެވެ. އެ ޓީމުން މެޗުތަކަށް އެމެރިކާއަށް ދަތުރުކުރާނީ މެކްސިކޯއިންނެވެ.

ހައިޓީން 1974 ވަނަ އަހަރަށްފަހު ފުރަތަމަ ފަހަރަށް ވޯލްޑް ކަޕަށް އެނބުރި އަންނައިރު، އެ ޓީމު ބައްދަލުކުރާނީ 28 އަހަރުގެ މެދުކެނޑުމަކަށްފަހު މުބާރާތަށް ކޮލިފައިވި ސްކޮޓްލޭންޑާއެވެ.