އުރީދޫން ވޯލްޑް ކަޕް "ފުޓްބޯޅަ ފޯރި" އަށް ހުޅުމާލޭގައި ކުޑަކުދިންގެ ހަވީރެއް

ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ ވޯލްޑް ކަޕްގެ ފޯރި ދިވެހިންގެ މެދުގައި އިތުރުކުރުމަށްޓަކައި، އުރީދޫ މޯލްޑިވްސްއިން އިސްނަގައިގެން ހުކުރު ދުވަހު ހަވީރު ހުޅުމާލޭގައި ޚާއްޞަ ކުޑަކުދިންގެ ހަވީރެއް ބޭއްވުމަށް ނިންމައިފިއެވެ.

"ފުޓްބޯޅަ ފޯރި" ގެ  ދަށުން ކުރިއަށް ދާ މި ހަރަކާތަކީ އުރީދޫ އާއި، އެލައިޑް އިންޝުއަރެންސް އަދި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގުޅިގެން ކުރިއަށްގެންދާ ހަރަކާތެކެވެ. އުރީދޫން މައުލޫމާތު ދީފައިވާ ގޮތުގައި، މި ކުޑަކުދިންގެ ހަވީރު އޮންނާނީ ހުކުރު ދުވަހު ހަވީރު 04:00 އިން ފެށިގެން 06:00 އަށް ހުޅުމާލޭ ސެންޓްރަލް ޕާކުގަ އެވެ. މި ހަވީރުގައި ފުޓްބޯޅައާ ގުޅުންހުރި ތަފާތު ކުޅިވަރުތަކާއި، ކުޑަކުދިން ގަޔާވާނެ ފަދަ ގިނަ ހަރަކާތްތަކެއް ކުރިއަށްދާނެ ކަމަށް އެރީދޫ އިން ބުނެއެވެ. 

މި ކެމްޕެއިންގެ މަގުސަދަކީ އުރީދޫގެ ޕްރީޕެއިޑް، ޕޯސްޓްޕެއިޑް އަދި ސުޕަނެޓްގެ ޚިދުމަތްތައް ބޭނުންކުރާ ކަސްޓަމަރުންނަށް ވޯލްޑް ކަޕްގެ ފޯރިގަދަ ތަޖުރިބާއެއް ފޯރުކޮށްދިނުން ކަމަށް އެ ކުންފުނިން ބުނެއެވެ. އެގޮތުން ކަސްޓަމަރުންނަށް ލުއިފަސޭހަކޮށް މެޗުތައް ބަލައިލުމަށްޓަކައި، ތިން ޖީބީގެ ޑޭޓާއާއެކު މުބާރާތް ނިމެންދެން މީޑިއާނެޓު އެޕްލިކޭޝަން މެދުވެރިކޮށް މެޗުތައް ބަލައިލެވޭނެ ޚާއްސަ ޕެކޭޖެއް ވަނީ ތައާރަފްކޮށްފައެވެ.

މީގެ އިތުރުން، އުރީދޫ ސުޕަނެޓް ބޭނުންކުރާ ކަސްޓަމަރުންނަށް ވެސް މި ކެމްޕެއިންގެ ދަށުން ގިނަ ފުރުސަތުތަކެއް ވަނީ ހުޅުވާލާފައެވެ. އެގޮތުން ޖުލައި މަހުގެ ނިޔަލަށް ސުޕަނެޓް ޕެކޭޖުތައް ހިލޭ އަޕްގްރޭޑް ކުރެވޭނެ އިންތިޒާމު ވަނީ ހަމަޖައްސާފައެވެ. އަދި މި މުއްދަތުގެ ތެރޭގައި ޕެކޭޖު އަޕްގްރޭޑްކުރާ ކަސްޓަމަރުންނާއި، އަލަށް ސުޕަނެޓް ކަނެކްޝަން ނަގާ ފަރާތްތަކުގެ މެދުގައި ގުރުއަތެއް ނަގައި، ހޮވޭ ނަސީބުވެރިއަކަށް 75 އިންޗީގެ ހައިސެންސް ޓީވީއެއް ދިނުމަށް ވެސް ވަނީ ނިންމާފައެވެ.