އެމްޑީޕީގެ ޗެއަރޕާސަންގެ އިންތިހާބުގެ ވޯޓުލުން ފެށިއްޖެ
އެމްޑީޕީގެ 7 ވަނަ ޗެއަރޕާސަން ހޮވުމަށް ބާއްވާ މި އިންތިހާބުގައި ވާދަކުރައްވަނީ ކުރީގެ ރައީސް މުހައްމަދު ނަޝީދާއި މީކާއިލް އަހުމަދު ނަސީމް. މިއަދު މެންދުރުފަހު 2:30 އިން ރޭގަނޑު 8:30 އަށް ވޯޓުލުން ކުރިއަށްދާއިރު، ވޯޓުލުމުގެ ފުރުސަތު އޮތީ މިދިޔަ އޭޕްރީލް މަހުގެ 22 އާ ހަމައަށް ޕާޓީގެ ދަފްތަރުގައި ރަޖިސްޓްރީވެފައިވާ މެންބަރުންނަށް. ރާއްޖޭގެ އެކި ކަންކޮޅުތަކުގައި އަމާންކަމާއެކު ވޯޓުލުން ކުރިއަށްދާއިރު، މިއީ ކުރިން އެ މަގާމުގައި ހުންނެވި ފައްޔާޒް އިސްމާއިލް އިސްތިއުފާ ދެއްވުމާ ގުޅިގެން ބާއްވާ އިންތިހާބެއް.
މިއަދު ކުރިއަށްދާ އެމްޑީޕީގެ ޗެއަރޕާސަންގެ އިންތިހާބުގެ ވޯޓުލުމަށް މަރުކަޒުތައް ތައްޔާރުކުރެވިފައި. | ރާއްޖެ އެމްވީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަން ހޮވުމަށް ބާއްވާ އެތެރޭގެ އިންތިހާބުގައި ވޯޓުލުން ފަށައިފި އެވެ.
މި އިންތިހާބުގައި ވޯޓުލުން ކުރިއަށްދާނީ ހުކުރު ދުވަހުގެ މެންދުރު 2:30 އިން ރޭގަނޑު 8:30 އަށެވެ. މި އިންތިހާބުގެ ޓައިމްލައިންގައިވާ ގޮތުން ވޯޓުލުމުގެ ފުރުސަތު ލިބިގެންވަނީ މިއަހަރުގެ އެޕްރީލް މަހުގެ 22 ވަނަ ދުވަހުގެ ނިޔަލަށް އެމްޑީޕީގެ ދަފްތަރުގައި މެންބަރުންގެ ގޮތުގައި ރަޖިސްޓްރީވެފައިވާ ފަރާތްތަކަށެވެ.
ޗެއަރޕާސަންގެ އިންތިހާބުގައި ވާދަކުރައްވަނީ ކުރީގެ ރައީސް މުހައްމަދު ނަޝީދާއި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.
ރާއްޖޭގެ އެކި ހިސާބުތަކުގައި ވެސް ވޯޓުލުން ފެށިފައިވާ އިރު، މިހާތަނަށް އެއްވެސްތަނެއްގައި މައްސަލައެއް ޖެހިފައި ނުވެ އެވެ.
ވޯޓުލާން ދާ ފަރާތްތަކުން ކާކުކަން އަންގައިދޭ ރަސްމީ ލިޔުން ގެންދަން ޖެހެ އެވެ. ރަސްމީ ލިޔުމުގެ ގޮތުގައި ބަލައިގަންނަނީ ދިވެހި ރައްޔިތެއްކަން އަންގައިދޭ ކާޑު (އައިޑީ ކާޑު)، ޕާސްޕޯޓް، ލައިސަންސް ކާޑް އަދި ޕާސްޕޯޓް ކާޑެވެ.
މިއީ އެމްޑީޕީގެ 7 ވަނަ ޗެއަރޕާސަން ހޮވުމަށް ބާއްވާ އިންތިހާބެވެ. ކުރިން ޗެއަރޕާސަން ކަމުގައި ހުންނެވި ފައްޔާޒް އިސްމާއިލް މަގާމުން އިސްތިއުފާ ދެއްވުމާއި ގުޅިގެން މިވަގުތު ވަގުތީ ޗެއަރޕާސަންގެ މަގާމު އަދާކުރައްވަމުން ގެންދަވަނީ ހަނިމާދޫ ދާއިރާގެ މެންބަރު އަބްދުލްޣަފޫރު މޫސަ އެވެ.
