ކުރިއަށް 24 ގަޑިއިރު މޫސުން ގޯސް، މެދުރާއްޖެތެރެ އާއި އުތުރުގެ ކަނޑުތައް ވަރަށް ގަދަވާނެ: މޫސުމާބެހޭ ގައުމީ އިދާރާ

ރާއްޖޭގެ މޫސުން ގޯސްވެ، މެދުރާއްޖެތެރެ އާއި އުތުރުގެ ކަނޑުތައް ވަރަށް ގަދަވާނެ ކަމަށް މޫސުމާ ބެހޭ ގައުމީ އިދާރާއިން ބުނެފި އެވެ. 

މޫސުމާ ބެހޭ ގައުމީ އިދާރާއިން ބުނީ ހުކުރު ދުވަހުގެ ހެނދުނު 10:00ން ހޮނިހިރު ދުވަހުގެ 10:00ށް ރާއްޖޭގެ އެކިހިސާބަށް ވިއްސާރަ ކުރާނެ ކަމަށާއި، ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެން ވާ ކަމަށެވެ.

ދެކުނުގެ އަތޮޅުތަކަށް ދެކުނާއި ހުޅަނގު ދެކުނުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، އެހެން ހިސާބުތަކަށް ހުޅަނގުދެކުނާއި،  ހުޅަނގުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށް އެ އިދާރާއިން ބުނެ އެވެ. އަދި ވިލާގަނޑުގައި ގަޑިއަކު 40 މޭލު ބާރުމިނަށް ވައިގަދަވުން އެކަށީގެން ވާ ކަމަށް މޫސުމާބެހޭ ގައުމީ އިދާރާއިން ބުނެ އެވެ. 

މީގެ އިތުރުން މޫސުމާބެހޭ ގައުމީ އިދާރާއިން ބުނީ، މެދުރާއްޖެތެރެއާއި އުތުރުގެ ކަނޑުތައް ގަދަވާނެ ކަމަށާއި، ރާޅުގެ އުސްމިނުގައި 4 ނުވަތަ 7 ފޫޓު ހުންނާނެ ކަމަށެވެ. އަދި ދެކުނުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ރާޅުގެ އުސްމިނުގައި 3 ނުވަތަ 5 ފޫޓު ހުންނާނެ ކަމަށެވެ. 

މޫސުމާބެހޭ ގައުމީ އިދާރާއިން ބުނީ، މޫސުން ގޯސްވެ، ބައެއް ރަށްތަކަށް ގެއްލުން ވަމުންދާއިރު، ބުރާސްފަތި ދުވަހުގެ ހެނދުނު 8:00ން ހުކުރު ދުވަހު ހެނދުނު 8:00ށް އެންމެ ގިނައިން ވާރޭ ވެފައިވަނީ ގއ. ގަމަނަފުއްޓަށް ކަމަށެވެ. އެރަށަށް 115 މިލިމީޓަރުގެ ވާރޭ ވެފައިވާ ކަމަށް ތަފާސްހިސާބުތަކުން ދައްކަ އެވެ. އަދި ގދ.ފަރެސްމާތޮޑާ އަށް 27.7 މިލިމީޓަރުގެ ވާރޭ، އއ.ތޮއްޑޫ އަށް 25.9 މިލިމީޓަރުގެ ވާރޭ، ކ.ގާފަރަށް 20.8 މިލިމީޓަރުގެ ވާރޭ ވެހިފައިވެ އެވެ. 

މީގެ އިތުރުން ހުކުރު ދުވަހު މާލެސިޓީ އަށް ބޯކޮށް ވާރޭ ވެހުމާއެކު، މާލެ ފެން ބޮޑުވެފައިވެ އެވެ. އަދި މާލޭގެ މަގުތަކުގައި ފެންބޮޑުވަމުން ދާތީ، ފެން ހިންދުމުގެ މަސައްކަތުގައި އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވެފައިވެ އެވެ. 

ރާއްޖޭގެ މޫސުން ގޯސްވެފައިވާތީ، ހުރިހާ ފަރާތްތަކުން ވެސް މޫސުމަށް ސަމާލުވުމަށް އިލްތިމާސްކޮށްފައިވެ އެވެ.