ބައެއް ރަށްތައް ފެންބޮޑުވެ، ގެއްލުން ލިބުނުއިރު، ފާއިތުވި 24 ގަޑިއިރު ސ. ގަމަށް 106.7 މިލިމީޓަރުގެ ވާރޭ ވެހިފައިވޭ!
ރާއްޖެއަށް މިހާރު ކުރަމުންދާ ވިއްސާރައިގައި ގދ. މަޑަވެއްޔާއި އައްޑޫ ސިޓީގެ ބައެއް ރަށްތަކުގައި ފެންބޮޑުވެ، އެމްއެންޑީއެފުން ފެންހިންދުމުގެ މަސައްކަތް ވަނީ ކޮށްފައި. މި ވިއްސާރައިގައި އައްޑޫ ސިޓީ ހިތަދޫގެ ބައެއް ގޭގޭގެ ފުރާޅު އެއްލާލައި ގެއްލުންތަކެއް ލިބިފައިވާއިރު، އެންމެ ގިނައިން ވާރޭވެހިފައިވަނީ ސ. ގަމަށް. ކުރިއަށް އޮތް 24 ގަޑިއިރުވެސް ބައެއް ރަށްތަކަށް ގުގުރުމާއެކު ވާރޭވެހި، ކަނޑުތައް އާދައިގެ ވަރަކަށް ގަދަވާނެ ކަމަށް މޫސުމާބެހޭ ގައުމީ އިދާރާ އިން ބުނޭ. އަދި ޖޫން-ޖުލައިގެ ވިއްސާރައާ ގުޅޭގޮތުން މޫސުމާބެހޭ ގައުމީ އިދާރާއިން ބުނީ، މެއި މަހަށްވުރެ، ޖޫން މަހު ވާރޭ ވެހޭ މިންވަރު ދަށްވާނެ ކަމަށް ލަފާ ކުރެވޭ ކަމަށާއި، ޖުލައި މަހު ވާރޭ ވެހުން އިތުރުވާނެ ކަމަށް.
ރާއްޖޭގެ އެކި ހިސާބުތަކަށް ކުރަމުންދާ ވިއްސާރައިގައި، އައްޑޫ ސިޓީ ފޭދޫއަށް ބޯކޮށް ވާރޭވެހި ބައެއް މަގުތަކުގައި ފެން ބޮޑުވުމުން، ފެން ހިންދުމުގައި އެމްއެންޑީއެފުން ހަރަކާތްތެރިވަނީ. | އެމްއެންޑީއެފް
ދިވެހިރާއްޖެއަށް މިހާރު ކުރަމުންދާ ވިއްސާރައިގައި ބައެއް ރަށްތައް ފެން ބޮޑުވެ، ގެއްލުން ވެއްޖެ އެވެ.
އާދިއްތަ ދުވަހު އެމްއެންޑީއެފުން ބުނީ، ގދ. މަޑަވެއްޔަށް ބޯކޮށް ވާރޭވެހި ބައެއް މަގުތަކުގައި ފެން ބޮޑުވުމުން، ފެން ހިންދުމުގައި އެމްއެންޑީއެފް ސަދަން އޭރިއާ ކޮމާންޑް، ތިނަދޫ ފަޔަރ ސްޓޭޝަނުން ހަރަކާތެރިވެފައިވާ ކަމަށެވެ.
ފެން ހިންދުމުގެ މަސައްކަތް ހޮނިހިރު ދުވަހުގެ ރޭ 01:35 ހާއިރު ފެށިއިރު، އާއްމު ހާލަތަށް ގެނެވުނީ އާދިއްތަ ދުވަހުގެ ހެނދުނު 9:40 ހާއިރު ކަމަށް އެމްއެންޑީއެފުން ބުންޏެވެ.
މީގެ އިތުރުން އައްޑޫ ސިޓީ ފޭދޫއަށް ބޯކޮށް ވާރޭވެހި ބައެއް މަގުތަކުގައި ފެން ބޮޑުވުމުން، ފެން ހިންދުމުގައި، އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނުން ހަރަކާތްތެރިވެފައިވެ އެވެ.
ފެން ހިންދުމުގެ މަސައްކަތް ހޮނިހިރު ދުވަހުގެ ރޭ ދަންވަރު 3:45 ހާއިރު ފެށިއިރު، ރަށުތެރެ އާއްމު ހާލަތަށް ގެނެވުނީ އާދިއްތަ ދުވަހުގެ ހެނދުނު 10:10 ހާއިރު ކަމަށް އެމްއެންޑީއެފުން ބުންޏެވެ. އަދި އައްޑޫ ސިޓީ ހިތަދޫގެ ބައެއް ގެތަކުގެ ފުރާޅު ވަޔާ އެއްލާލުމާ ގުޅިގެން ވެސް އެމްއެންޑީއެފް ސަދަން އޭރިއާ ކޮމާންޑްގެ ސިފައިން އެހީތެރިކަން ފޯރުކޮށްދީފައިވެ އެވެ.
މޫސުމާބެހޭ ގައުމީ އިދާރާއިން ބުނީ، މޫސުން ގޯސްވެ، ބައެއް ރަށްތަކަށް ގެއްލުން ވަމުންދާއިރު، ހޮނިހިރު ދުވަހުގެ ހެނދުނު 8:00ން އާދިއްތަ ދުވަހު ހެނދުނު 8:00ށް އެންމެ ގިނައިން ވާރޭ ވެފައިވަނީ ސ.ގަމަށް ކަމަށެވެ. އެރަށަށް 106.7 މިލިމީޓަރުގެ ވާރޭ ވެހިފައިވާ ކަމަށެވެ. ދެ ވަނަ އަށް 102.7 މިލިމީޓަރުގެ ވާރޭ ގދ.ކާނޑެއްދޫ އަށް ވެހިފައިވާއިރު، ތިން ވަނަ އަށް ހދ.ހަނިމާދޫ 68.6 މިލިމީޓަރުގެ ވާރޭ ވެހިފައިވާ ކަމަށެވެ. އަދި ސ.ހިތަދޫ 64.9 މިލިމީޓަރުގެ ވާރޭ، ގއ.ގެމަނަފުށި 63.6 މިލިމީޓަރުގެ ވާރޭ، ސހުޅުމީދޫ 46.5 މިލިމީޓަރުގެ ވާރޭ، ގދ.ތިނަދޫ 37.1 މިލިމީޓަރުގެ ވާރޭ، ގއ.ކޫއްޑޫ 26.0 މިލިމީޓަރުގެ ވާރޭ، މ.މުލި 20.0 މީޓަރުގެ ވާރޭ، ރ.އަލިފުށި 20.3 މިލިމީޓަރުގެ ވާރޭ ވެހިފައިވާ ކަމަށް މޫސުމާބެހޭ ގައުމީ އިދާރާއިން ބުނެ އެވެ.
ކުރިއަށް އޮތް 24 ގަޑިއިރު މޫސުން ލަފާކުރާ ގޮތާއި ގުޅޭގޮތުން އެއިދާރާއިން ބުނީ، ބައެއް ރަށްތަކަށް ކެރީގެ އަސަރުފޯރާ ގުގުރުން އެކަށީގެން ވާ ކަމަށާއި، ހުޅަނގުދެކުނާއި ހުޅަނގުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެ ކަމަށެވެ. އަދި ކަނޑުތައް އާދައިގެ ވަރަކަށް ގަދަވާނެ ކަމަށާއި، ރާޅުގެ އުސްމިނުގައި 5 ނުވަތަ 3 ފޫޓު ހުންނާނެ ކަމަށް މޫސުމާބެހޭ ގައުމީ އިދާރާއިން ބުނެ އެވެ.
ޖޫން-ޖުލައިގެ ވިއްސާރައާ ގުޅޭގޮތުން މޫސުމާބެހޭ ގައުމީ އިދާރާއިން ބުނީ، މެއި މަހަށްވުރެ، ޖޫން މަހު ވާރޭ ވެހޭ މިންވަރު ދަށްވާނެ ކަމަށް ލަފާ ކުރެވޭ ކަމަށެވެ. ނަމަވެސް ޖުލައި މަހު ވާރޭ ވެހުން އިތުރުވާނެ ކަމަށް އެ އިދާރާއިން ބުންޏެވެ.
މިދިޔަ އަހަރުގެ ތަފާސްހިސާބުތަކާ ހަވާލާދީ، އަންނަ މަހަށް ލަފާކޮށް، މޫސުމާބެހޭ ގައުމީ އިދާރާއިން ބުނީ، މުޅި ރާއްޖެއަށް ވިއްސާރަ ކުރާ މިންވަރު ކުޑަކޮށް ދަށްވާނެ ކަމަށެވެ. ނަމަވެސް އިހުސާސް ކުރެވޭ ހޫނުމިން އާންމުކޮށް ހުންނަ މިންވަރަށް ވުރެ މަތިވާނެ ކަމަށް ލަފާކޮށްފައިވެ އެވެ.
